ਰਹਿਮਤ ਵਸਦੀ ਗੁਰੂ ਨਾਨਕ ਜੀ ਦੇ ਦਰ ਉੱਤੇ, ਜੋ ਕੁਝ ਮੰਗਣਾ ਤੈਥੋਂ ਦਾਤਾਰ ਮੰਗਿਆ
ਗੁਰੂ ਅੰਗਦ ਜੀ ਦੇ ਚਰਨਾਂ ਦੀ ਧੂੜ ਮੰਗੀ, ਗੁਰੂ ਅਮਰਦਾਸ ਜੀ ਤੋਂ ਅਮਰ ਪਿਆਰ ਮੰਗਿਆ
ਗੁਰੂ ਰਾਮਦਾਸ ਜੀ ਤੋਂ ਸੇਵਾ ਦੀ ਦਾਤ ਮੰਗੀ, ਗੁਰੂ ਅਰਜਨ ਦੇਵ ਜੀ ਤੋਂ ਲਿਖਣ ਦਾ ਸਾਰ ਮੰਗਿਆ
ਮੀਰੀ ਪੀਰੀ ਵਾਲੇ ਦੀ ਸੁਣ ਸੋਭਾ, ਇਸ ਜਗਤ ਤੋਂ ਹੋਣਾ ਮੈਂ ਪਾਰ ਮੰਗਿਆ
ਸ੍ਰੀ ਗੁਰੂ ਹਰਿਰਾਇ ਜੀ ਵੇਖੇ ਹਰੀ ਰੂਪ ਅੰਦਰ, ਗੁਰੂ ਹਰਿਕ੍ਰਿਸ਼ਨ ਜੀ ਦਾ ਕਰਨਾ ਦੀਦਾਰ ਮੰਗਿਆ
ਗੁਰੂ ਤੇਗ ਬਹਾਦਰ ਜੀ ਤੋਂ ਤੇਗ ਦੀ ਦਾਤ ਮੰਗੀ, ਗੁਰੂ ਗੋਬਿੰਦ ਸਿੰਘ ਜੀ ਤੋਂ ਸਿੱਖੀ ਪਿਆਰ ਮੰਗਿਆ

ਦਰ ਗੁਰੂ ਨਾਨਕ ਜੀ ਦੇ ਮੰਗਣ ਜੋ ਆਇਆ, ਖਾਲੀ ਵੇਖਿਆ ਕਦੀ ਮੁੜਦਾ ਨਹੀਂ
ਹੋ ਨਿਮਾਣਿਆਂ ਜਿਸ ਅਰਦਾਸ ਕੀਤੀ, ਡਾਂਵਾਂਡੋਲ ਹੋ ਵੇਖਿਆ ਰੁੜਦਾ ਨਹੀਂ
ਮਨ ਨੀਵਾਂ ਮੱਤ ਉਸਦੀ ਹੋਏ ਉੱਚੀ, ਕਰ ਕ੍ਰੋਧ ਉਹ ਕਦੀ ਵੀ ਕੁੜਦਾ ਨਹੀਂ
ਮਿਹਰ ਨਿਰੰਕਾਰ ਦੀ ਜਿਸ ’ਤੇ ਹੋ ਜਾਏ, ਭੰਡਾਰਾ ਉਸਦਾ ਫਿਰ ਥੁੜਦਾ ਨਹੀਂ
ਇੱਛਾਂ ਪੂਰੀਆਂ ਉਦੋਂ ਹੁੰਦੀਆਂ ਨੇ, ਜਦੋਂ ਹੱਥ ਜੋੜ ਨਾਲ ਪਿਆਰ ਮੰਗਿਆ
ਦਰ ਦਰ ਉੱਤੇ ਕਦੀ ਉਹ ਭਟਕਦਾ ਨਹੀਂ, ਗੁਰੂ ਨਾਨਕ ਜੀ ਦਾ ਜਿੰਨੇ ਦਰਬਾਰ ਮੰਗਿਆ

ਜੋ ਹੰਕਾਰੀਆਂ ਨੂੰ ਪਲਾਂ ਦੇ ਵਿਚ ਤਾਰੇ, ਗੁਰੂ ਨਾਨਕ ਜੀ ਵਰਗਾ ਨਾ ਮੀਤ ਕੋਈ
ਸਭੇ ਮੁਰਾਦਾਂ ਪੂਰੀਆਂ ਹੋਣ ਏਥੇ, ਸੇਵਾ ਕਰੇ ਜੇ ਨਾਲ ਪ੍ਰੀਤ ਕੋਈ
ਨਿਆਸਰਿਆਂ ਨੂੰ ਆਸਰੇ ਦੀ ਦਾਤ ਮਿਲਦੀ, ਕਰ ਕੇ ਵੇਖੇ ਸੇਵਾ ਨਾਲ ਸੱਚੀ ਨੀਤ ਕੋਈ
ਉਸਦੀਆਂ ਭਟਕਣਾ ਸਭੇ ਹੀ ਮੁੱਕ ਜਾਣ, ਉਲਟੀ ਗੁਰਮਤਿ ਤੋਂ ਰਹੇ ਨਾ ਰੀਤ ਕੋਈ

ਜਾਤ ਪਾਤ ਦਾ ਇੱਥੇ ਵਿਤਕਰਾ ਨਹੀਂ, ਏਸ ਦਰ ਤੋਂ ਸਾਰੇ ਸੰਸਾਰ ਮੰਗਿਆ
ਹਰ ਕਾਮਨਾ ਉਸਦੀ ਹੋਏ ਪੂਰੀ, ਬਣ ਕੇ ਜਿਸ ਵੀ ਸੇਵਾਦਾਰ ਮੰਗਿਆ

ਲੋਭੀ ਲਾਲਚੀ ਨੂੰ ਇੱਥੇ ਥਾਂ ਕੋਈ ਨਹੀਂ, ਸਦਾ ਨਿਮਾਣਿਆਂ ਨੂੰ ਮਿਲਦਾ ਮਾਣ ਇੱਥੇ
ਰਾਜਾ ਰੰਕ ਬਰਾਬਰ ਇਸ ਦਰ ਉੱਤੇ, ਇੱਕੋ ਪੰਗਤ ਵਿਚ ਬੈਠ ਕੇ ਖਾਣ ਏਥੇ
ਸ਼ਹਿਨਸ਼ਾਹੀਆਂ ਉਨ੍ਹਾਂ ਨੂੰ ਮਿਲਦੀਆਂ ਨੇ, ਜੋ ਆਣ ਮਸਤਕ ਝੁਕਾਣ ਏਥੇ
ਜਿੱਤ ਉਨ੍ਹਾਂ ਦੇ ਸਦਾ ਹੀ ਕਦਮ ਚੁੰਮੇ, ਸ਼ਰਧਾ ਨਾਲ ਜੋ ਸੀਸ ਨਿਵਾਣ ਏਥੇ

ਸੱਚੇ ਪਾਤਸ਼ਾਹ ਸਿਰਜਣਹਾਰ ਕੋਲੋਂ, ਕਿਸੇ ਮਾਣ ਮੰਗਿਆ ਕਿਸੇ ਤਾਣ ਮੰਗਿਆ
ਸੁਰਜੀਤ ਸਿੰਘਾ ਉਹ ਦਾਤਾ ਦਾਤਾਂ ਦੇਣ ਵਾਲਾ, ਹਰ ਇਕ ਜੀਵ ਨੇ ਬਾਰ-ਬਾਰ ਮੰਗਿਆ।