ਵੀਹ ਰੁਪਏ ਦੇ ਕੇ ਕਿਹਾ ਪਿਤਾ ਜੀ ਨੇ, ਸੱਚਾ ਸੌਦਾ ਕਰ ਵਪਾਰ ਵਧਾਈਂ ਨਾਨਕ,
ਵਸਤ ਲੈਣ ਲੱਗਿਆਂ ਸੋਚ ਸਮਝ ਲੈਣੀ, ਹੋਏ ਕਮਾਈ ਡਿਉੜੀ ਜਾਂ ਸਵਾਈ ਨਾਨਕ।
ਸੋਹਣਾ ਸੁਚੱਜਾ ਕੋਈ ਵੇਖ ਧੰਦਾ, ਪੈਸੇ ਉਸ ਦੇ ਵਿਚ ਤੂੰ ਲਗਾਈਂ ਨਾਨਕ,
ਕਰੀਂ ਵਪਾਰ ਐਸਾ ਸਦਾ ਰਹੇ ਚੱਲਦਾ, ਸੱਚਾ ਸੁੱਚਾ ਸੌਦਾ ਕਰ ਕੇ ਛੇਤੀ ਆਈਂ ਨਾਨਕ। ਮਾਣ ਸਨਮਾਨ ਵਧੇ ਤਲਵੰਡੀ ਵਿਚ ਸਾਡਾ, ਸੋਹਣਾ ਵਪਾਰ ਚੱਲੇ ਨਾਲੇ ਕਰੀਂ ਕਮਾਈ ਨਾਨਕ,
ਜੋ ਆਵੇ ਖੁਸ਼ੀਆਂ ਲੈ ਜਾਵੇ, ਕਰਨੀ ਕਿਰਤ ਨੇਕ ਐਸੀ ਹੱਟ ਚਲਾਈਂ ਨਾਨਕ।
ਗੁਰੂ ਨਾਨਕ ਜੀ ਪਿਤਾ ਤੋਂ ਰਾਸ ਲੈ ਕੇ, ਵੀਹਾਂ ਰੁਪੱਈਆਂ ਨਾਲ ਕਰਨ ਵਪਾਰ ਤੁਰ ਪਏ,
ਖ਼ਤਮ ਭੰਡਾਰੇ ’ਚੋਂ ਕਦੀ ਨਾ ਹੋ ਸਕੇ, ਅਨਾਜ ਖਰੀਦਣ ਕਰ ਵਿਚਾਰ ਤੁਰ ਪਏ। ਭੁੱਖਾ ਸੌਵੇਂ ਨਾ ਕੋਈ ਜਹਾਨ ਅੰਦਰ, ਰਜਾਉਣ ਲਈ ਸਾਰਾ ਸੰਸਾਰ ਤੁਰ ਪਏ,
ਸ਼ਹਿਨਸ਼ਾਹ ਮਾਲਕ ਸਾਰੀ ਸ੍ਰਿਸ਼ਟੀ ਦੇ, ਕਰਨ ਸੰਤਾਂ ਦੇ ਨਾਲ ਪਿਆਰ ਤੁਰ ਪਏ।
ਇੱਕੋ ਪੰਗਤ ’ਚ ਬੈਠ ਕੇ ਛਕਣ ਸਾਰੇ, ਸਾਂਝਾ ਕਰਨ ਦੇ ਲਈ ਪ੍ਰਚਾਰ ਤੁਰ ਪਏ,
ਦੂਈ-ਦਵੈਤ ਦਾ ਭਰਮ ਮਿਟ ਜਾਵੇ, ਮਿਲਾਪ ਸਭ ਦਾ ਕਰਾਉਣ ਐਸਾ ਦਾਤਾਰ ਤੁਰ ਪਏ। ਵੀਹਾਂ ਰੁਪੱਈਆਂ ’ਚੋਂ ਲੈ ਕੇ ਰਸਦ ਸਤਿਗੁਰ, ਭੋਜਨ ਸਭ ਨੂੰ ਦਾਤਾ ਛਕਾਉਣ ਲੱਗੇ,
ਜ੍ਹੀਦੇ ਤਨ ’ਤੇ ਕੱਪੜਾ ਹੈ ਕੋਈ ਨਹੀਂ, ਸੁੰਦਰ ਵਸਤਰ ਉਹਨੂੰ ਪਹਿਨਾਉਣ ਲੱਗੇ।
ਦੁਖੀ ਰਹੇ ਨਾ ਕੋਈ ਜਹਾਨ ਅੰਦਰ, ਦਰਦ ਸਭ ਦਾ ਦਾਤਾਰ ਵੰਡਾਉਣ ਲੱਗੇ,
ਕਿਰਤ ਕਰੋ ਤੇ ਵੰਡ ਕੇ ਖਾਓ ਸਾਰੇ, ਸ਼ਹਿਨਸ਼ਾਹ ਸਭ ਨੂੰ ਏਹ ਫੁਰਮਾਉਣ ਲੱਗੇ। ਸੇਵਾ ਕਰਨੀ ਪ੍ਰਭੂ-ਪਿਆਰਿਆਂ ਦੀ, ਸੇਵਾਦਾਰਾਂ ਦਾ ਪੰਥ ਬਣਾਉਣ ਲੱਗੇ,
ਆਪ ਜਗਤ ਦੇ ਸਿਰਜਣਹਾਰ ਦਾਤਾ, ਭੁਲੀ ਲੋਕਾਈ ਰਾਹੇ ਪਾਉਣ ਲਗੇ।
ਲੰਗਰ ਤਿਆਰ ਕਰ ਕੇ ਗੁਰੂ ਨਾਨਕ, ਸਤਿ ਕਰਤਾਰ ਕਹਿ ਵਰਤਾਅ ਦਿੱਤਾ,
ਊਚ-ਨੀਚ ਦੇ ਭਰਮ ਮਿਟਾ ਸਾਰੇ, ਇੱਕੋ ਪੰਗਤ ਵਿਚ ਬਿਠਾ ਕੇ ਛਕਾ ਦਿੱਤਾ। ਵਿਤਕਰਾ ਰਹੇ ਨਾ ਕੋਈ ਸੰਸਾਰ ਅੰਦਰ, ਸੰਤਾਨ ਇਕ ਪਰਮਾਤਮਾ ਦੀ ਦਰਸਾਅ ਦਿੱਤਾ,
ਦੂਈ-ਦਵੈਤ ਨੂੰ ਖ਼ਤਮ ਕਰ ਦਾਤੇ, ਸਾਂਝੀਵਾਲਤਾ ਦਾ ਉਪਦੇਸ਼ ਦ੍ਰਿੜ੍ਹਾ ਦਿੱਤਾ।
ਪੇਟ ਭਰ ਭੋਜਨ ਛਕਾ ਸਭ ਸੰਤਾਂ ਨੂੰ, ਹਰ ਲੋੜਵੰਦ ਨੂੰ ਵਸਤਰ ਪਹਿਨਾ ਦਿੱਤਾ,
ਕਰ ਕੇ ਲੋੜ ਪੂਰੀ ਹਰ ਇੱਕ ਦੀ, ਕਮਾਈ ਸਫ਼ਲ ਕਰੋ ਏਦਾਂ ਦਾਤਾਰ ਸਮਝਾ ਦਿੱਤਾ। ਜਿੱਥੇ ਭੁੱਖਿਆਂ ਨੂੰ ਸਦਾ ਅੰਨ ਮਿਲਦਾ, ਐਸਾ ਹੱਟ ਚਲਾਇਆ ਸੱਚੇ ਪਾਤਸ਼ਾਹ ਨੇ,
ਸੇਵਾ ਕਰਦਿਆਂ ਸਿਮਰਨ ਨਾਲ ਕਰਨਾ, ਵਾਹਿਗੁਰੂ ਨਾਮ ਜਪਣਾ ਸਿਖਾਇਆ ਪਾਤਸ਼ਾਹ ਨੇ।
ਲੰਗਰ ਗੁਰੂ ਕਾ ਹੱਟ ਦਾ ਨਾਮ ਰੱਖਿਆ, ਸਭ ਨੂੰ ਇਕ ਪੰਗਤ ’ਚ ਬਿਠਾਇਆ ਪਾਤਸ਼ਾਹ ਨੇ,
ਏਥੇ ਕਿਸੇ ਨਾਲ ਕੋਈ ਵਿਤਕਰਾ ਨਹੀਂ, ਰਾਜੇ ਰੰਕ ਇਕੱਠੇ ਇਕ ਥਾਂ ਕੀਤੇ ਪਾਤਸ਼ਾਹ ਨੇ। ਨੇਕ ਕਮਾਈ ਕਰ ਆਪ ਹੱਥਾਂ ਨਾਲ ਸੇਵਾ, ਹਰ ਇਕ ਨੂੰ ਉਪਦੇਸ਼ ਦਿੱਤਾ ਪਾਤਸ਼ਾਹ ਨੇ,
‘ਸੁਰਜੀਤ’ ਸਿੰਘਾ! ਸਾਰੇ ਜਗਤ ’ਚ ਲੰਗਰ ਚੱਲਦੇ ਨੇ, ਵੀਹਾਂ ਰੁਪੱਈਆਂ ਦਾ ਛੱਟਾ ਦਿੱਤਾ ਪਾਤਸ਼ਾਹ ਨੇ। |
