ਗੁਰੂ ਗੋਬਿੰਦ ਸਿੰਘ ਮਹਾਰਾਜ ਜੀ ਨੇ, ਕਰਨੀ ਕੇਸਾਂ ਦੀ ਸਹੀ ਸੰਭਾਲ ਦੱਸੀ।
ਵੈਸਾਖੀ ਦੇ ਦਿਨ ਅਨੰਦਪੁਰ ਅੰਦਰ, ਚੱਲੀ ਆਉਂਦੀ ਸ਼ੁਰੂ ਤੋਂ ਚਾਲ ਦੱਸੀ।
ਬਰਮਾ ਬਿਸ਼ਨ ਮਹੇਸ਼ ਸਭ ਕੇਸ ਧਾਰੀ, ਸ਼ਾਨ ਮਨੁੱਖ ਦੀ ਕੇਸਾਂ ਦੇ ਨਾਲ ਦੱਸੀ।
ਕੇਸ ਬਖਸ਼ੇ ਹੋਏ ਨਿੰਰਕਾਰ ਦੇ ਨੇ, ਹਰ ਇਕ ਗੱਲ ਤੁਸਾਂ ਦੇ ਮਸਾਲ ਦੱਸੀ।
ਕੇਸ ਜਨਮ ਤੋਂ ਜੀਵ ਦੇ ਨਾਲ ਹੁੰਦੇ, ਗ੍ਰੰਥਾਂ ਸ਼ਾਸਤਰਾਂ ਦੀ ਕਰ ਕੇ ਭਾਲ ਦੱਸੀ।
ਕੇਸਾਂ ਨਾਲ ਸਰੀਰ ਹੈ ਸ਼ਕਤਸ਼ਾਲੀ, ਕਰਨੀ ਕੇਸਾਂ ਦੀ ਦਸਮੇਸ਼ ਸੰਭਾਲ ਦੱਸੀ। ਕੇਸ ਕਟਾ ਬੇ-ਇੱਜ਼ਤ ਹੋਏ ਕੋਈ ਨਾ, ਕੁਰਾਨ ਅੰਦਰ ਮੁਹੰਮਦ ਫੁਰਮਾਂਵਦੇ ਨੇ।
ਹੁੰਦੇ ਉਨ੍ਹਾਂ ਦੇ ਕਦੀ ਨਹੀ ਹੱਜ ਪੂਰੇ, ਸਰੀਰ ਦੇ ਰੋਮ ਜੋ ਕਤਲ ਕਰਵਾਉਂਦੇ ਨੇ।
ਹੁੰਦਾ ਜ਼ੁਲਮ ਮਜ਼ਲੂਮ 'ਤੇ ਰੋਕਣੇ ਲਈ, ਇਕ ਹੱਥ ਕਿਰਪਾਨ ਦੂਜੇ ਫੜਨੀ ਢਾਲ ਦੱਸੀ।
ਦਾਤਾਰ ਨੇ ਮਨੁੱਖ ਨੂੰ ਜੋ ਰੂਪ ਦਿੱਤਾ, ਕਰਨੀ ਕੇਸਾਂ ਦੀ ਦਸਮੇਸ਼ ਸੰਭਾਲ ਦੱਸੀ। ਸਾਰੇ ਜਗਤ ਨੂੰ ਕੀਤਾ ਉਪਦੇਸ਼ ਇੱਕੋ, ਬਿਨਾ ਪ੍ਰੇਮ ਦੇ ਪ੍ਰਭੂ ਰਜਾਏ ਕੋਈ ਨਾ।
ਕਰਨੀ ਪ੍ਰਭੂ ਦੀ ਕਰਕੇ ਸਤਿ ਜਾਣੇ, ਬਿਨਾ ਸਤਿ ਤੋਂ ਮੁਕਤੀ ਪਾਏ ਕੋਈ ਨਾ।
ਭਰਮਾਂ ਵਿੱਚੋਂ ਦਸਮੇਸ਼ ਜੀ ਕੱਢ ਦਿੱਤਾ, ਹੁਣ ਦਾਹੜੀ ਮੁੱਛਾਂ ਮੁੰਨਾਏ ਕੋਈ ਨਾ
ਪੰਥ ਸਾਜਿਆ ਗੁਰੂ ਨੇ ਕੇਸਧਾਰੀ, ਦਾੜੀ ਮੁੱਛ ਬਿਨ ਮਰਦ ਸੁਹਾਇ ਕੋਈ ਨਾ।
ਕਲਗੀ ਵਾਲੇ ਦਾਤਾਰ ਸ਼ਹਿਨਸ਼ਾਹ ਨੇ, ਕਹੀ ਰਹਿਤ ਜੋ ਕਰ ਕੇ ਉਹ ਨਾਲ ਦੱਸੀ।
ਮਨੁੱਖਾ ਜਨਮ ਨੂੰ ਸਫਲ ਬਣਾਉਣ ਦੇ ਲਈ, ਕਰਨੀ ਕੇਸਾਂ ਦੀ ਦਸਮੇਸ਼ ਸੰਭਾਲ ਦੱਸੀ। ਨਿਰੰਕਾਰ ਨੇ ਅਮੁੱਲੀ ਦਾਤ ਬਖਸ਼ੀ, ਮਹਾਂਪੁਰਖ ਸਭ ਏਹਨੂੰ ਸਤਿਕਾਰਦੇ ਰਹੇ।
ਰਿਸ਼ੀ ਮੁਨੀ ਸਭ ਹੋਏ ਹਨ ਕੇਸ ਧਾਰੀ, ਨਿਰੰਕਾਰ ਨੂੰ ਜੋ ਸਦਾ ਚਿਤਾਰਦੇ ਰਹੇ।
ਈਸਾ ਮਸੀਹ ਦੇ ਸਿਰ ’ਤੇ ਸੀ ਕੇਸ ਸੋਹਣੇ, ਦਾਹੜਾ ਲੰਮਾ ਰੰਗਤ ਚੇਹਰੇ ਦੀ ਲਾਲ ਦੱਸੀ।
ਵੇਖ ਨਿਰੰਕਾਰ ਜਿਸ ਰੂਪ ਨੂੰ ਖੁਸ਼ ਹੋਵੇ, ਕਰਨੀ ਕੇਸਾਂ ਦੀ ਦਸਮੇਸ਼ ਸੰਭਾਲ ਦੱਸੀ।
ਕੇਸਗੜ੍ਹ ਦੇ ਭਰੇ ਦੀਵਾਨ ਅੰਦਰ, ਸਤਾਰ੍ਹਾਂ ਸੋ ਛਪਿੰਜਾ ਬਿਕ੍ਰਮੀ ਦੇ ਸ਼ਾਨ ਦੱਸੀ।
‘ਸੁਰਜੀਤ ਸਿੰਘ’ ਨਿਰੰਕਾਰ ਦਾ ਹੈ ਏਹ ਰੂਪ ਬੰਦਾ, ਕਰਨੀ ਕੇਸਾਂ ਦੀ ਦਸਮੇਸ਼ ਸੰਭਾਲ ਦੱਸੀ। |
