ਹੱਥੀਂ ਕਿਰਤ ਕਰਨੀ ਤੇ ਵੰਡ ਕੇ ਖਾਓ ਸਾਰੇ,
ਜਗਤ ਨੂੰ ਕਰ ਕੇ ਦੱਸਿਆ ਸ੍ਰੀ ਗੁਰੂ ਰਾਮਦਾਸ।
ਸੇਵਾ ਨਿਮਰਤਾ ਨਾਲ ਆਪ ਸਦਾ ਹੀ ਕਰਨੀ,
ਟੋਕਰਾ ਆਪ ਚੁੱਕ ਦੱਸਿਆ ਸ੍ਰੀ ਗੁਰੂ ਰਾਮਦਾਸ।
ਗੁਰੂ ਦੇ ਹੁਕਮ ਵਿਚ ਸਦਾ ਅਨੰਦ ਰਹਿਣਾ,
ਨਾ ਪ੍ਰਸ਼ਨ ਕਰਨਾ ਦੱਸਿਆ ਸ੍ਰੀ ਗੁਰੂ ਰਾਮਦਾਸ।
ਥੜ੍ਹਾ ਬਣਾਉਣਾ ਗੁਰੂ ਜੀ ਦੀ ਆਗਿਆ ਨਾਲ
ਹੁਕਮ ਮਨ ਡਾਉਣਾਂ ਦੱਸਿਆ ਸ੍ਰੀ ਗੁਰੂ ਰਾਮਦਾਸ।
ਸਿਮਰਨ ਸੇਵਾ ਵੀ ਕਰਨੀ ਨਿਮਰਤਾ ਨਾਲ,
ਹੁਕਮ ਗੁਰਾਂ ਦਾ ਦੱਸਿਆ ਸ੍ਰੀ ਗੁਰੂ ਰਾਮਦਾਸ।
ਮਿਲਦੀਆਂ ਬਖਸ਼ਿਸ਼ਾਂ ਹਰ ਵੇਲੇ ਗੁਰੂ ਕੋਲੋਂ,
ਮਨ ਨੀਵਾਂ ਰੱਖਣਾ ਦੱਸਿਆ ਸ੍ਰੀ ਗੁਰੂ ਰਾਮਦਾਸ।
ਗੁਰੂ ਰਾਮਦਾਸ ਦੇ ਦਰ ’ਤੇ ਮੰਗਣ ਜੋ ਆਇਆ,
ਖਾਲੀ ਕੋਈ ਵੀ ਵੇਖਿਆ ਕਦੀ ਮੁੜਦਾ ਨਹੀਂ।
ਹੋ ਨਿਮਾਣਿਆਂ ਜਿਸ ਨੇ ਵੀ ਅਰਦਾਸ ਕੀਤੀ,
ਦਰ ਦਰ ਉਤੇ ਉਹ ਕਦੀ ਵੇਖਿਆ ਰੁਲਦਾ ਨਹੀਂ।
ਉਸ ਦਾ ਮਨ ਨੀਵਾਂ ਮੱਤ ਸਦਾ ਹੀ ਰਹੇ ਉੱਚੀ,
ਫਿਰ ਉਹ ਕਰ ਕ੍ਰੋਧ ਕਦੀ ਵੀ ਕੁੜਦਾ ਨਹੀਂ।
ਮਿਹਰ ਨਿਰੰਕਾਰ ਦੀ ਹੋਵੇ ਜਿਸ ਵੀ ਜੀਵ ਉੱਤੇ,
ਫੇਰ ਭੰਡਾਰਾ ਉਸ ਦਾ ਸਦਾ ਲਈ ਥੁੜ੍ਹਦਾ ਨਹੀਂ।
ਸ਼ੁਭ ਇੱਛਾਵਾਂ ਸਭੇ ਪੂਰੀਆਂ ਉਦੋਂ ਹੁੰਦੀਆਂ ਨੇ,
ਸ਼ਰਧਾ ਨਾਲ ਮੰਨਿਆ ਸ੍ਰੀ ਗੁਰੂ ਰਾਮਦਾਸ।
ਹੋਰ ਦਰ ਉੱਤੇ ਕਦੀ ਉਹ ਭਟਕਦਾ ਨਹੀਂ,
ਜਿਸ ’ਤੇ ਮਿਹਰ ਕਰਨ ਜਦੋਂ ਸ੍ਰੀ ਗੁਰੂ ਰਾਮਦਾਸ।
ਗੁਰੂ ਰਾਮਦਾਸ ਜੀ ਤੁਹਾਡੀ ਸ਼ਰਨ ਆਇਆਂ,
ਮੇਰਾ ਏਹ ਗੇੜ ਚੁਰਾਸੀ ਦਾ ਦੇਵੋ ਕੱਟ ਦਾਤਾ।
ਫਸੀ ਲੋਭ ਵਿਚ ਏਹ ਜਿੰਦ ਮੇਰੀ ਪਾਤਸ਼ਾਹਾ,
ਲਾਏ ਲਾਲਚ ਦੀ ਛੁਰੀ ਨੇ ਬਹੁਤੇ ਫੱਟ ਦਾਤਾ।
ਹਉਮੈਂ ਦਾ ਮਾਰਿਆ ਫਿਰੇ ਏਹ ਸਰੀਰ ਮੇਰਾ,
ਕ੍ਰੋਧ ਏਹ ਜੀਵਨ ਦੀ ਡੋਰ ਰਿਹਾ ਕੱਟ ਦਾਤਾ।
ਮਿਹਰ ਕਰ ਕੇ ਨਿਮਾਣੇ ਨੂੰ ਬਖਸ਼ੋ ਪਾਤਸ਼ਾਹਾ ਜੀ,
ਵਿਕਾਰਾਂ ਵਿਚ ਫਸੇ ਨੂੰ ਮੋਹ ਰਿਹਾ ਚੱਟ ਦਾਤਾ।
ਮੇਰੇ ਅਵਗੁਣ ਬੜੇ ਗੁਰੂ ਜੀ ਨਹੀਂ ਗੁਣ ਕੋਈ,
ਜੀ ਬਣਾ ਲਓ ਸੇਵਕ ਆਪਣਾ ਸ੍ਰੀ ਗੁਰੂ ਰਾਮਦਾਸ।
ਮੇਰਾ ਜੀਵਨ ਮਰਨ ਦਾ ਗੇੜ ਏਹ ਮੁਕ ਜਾਵੇ,
ਕਿਰਪਾ ਕਰਕੇ ਨਾਮ ਬਖਸ਼ੋ ਸ੍ਰੀ ਗੁਰੂ ਰਾਮਦਾਸ।
ਤਨ ਦੀ ਭੁਖ ਮਿਟਾਉਣ ਦੇ ਲਈ ਹਰ ਵੇਲੇ,
ਸਭ ਨੂੰ ਲੰਗਰ ਛਕਾਇਆ ਸ੍ਰੀ ਗੁਰੂ ਰਾਮਦਾਸ।
ਦੁਖੀ ਸਰੀਰਾਂ ਦੇ ਰੋਗ ਹਟਾਉਣ ਲਈ ਦਾਤੇ,
ਅੰਮ੍ਰਿਤ ਸਰੋਵਰ ਬਣਾਇਆ ਸ੍ਰੀ ਗੁਰੂ ਰਾਮਦਾਸ।
ਜਿੱਥੇ ਤਪਦੇ ਮਨਾਂ ਨੂੰ ਸ਼ਾਂਤੀ ਸਦਾ ਮਿਲੇ,
ਅੰਮ੍ਰਿਤਸਰ ਵਸਾਇਆ ਸ੍ਰੀ ਗੁਰੂ ਰਾਮਦਾਸ।
ਵਿਛੜੀ ਆਤਮਾ ਮਿਲੇ ਪਰਮਾਤਮਾ ਨਾਲ,
ਸਤਿਨਾਮੁ ਜਾਪ ਜਪਾਇਆ ਸ੍ਰੀ ਗੁਰੂ ਰਾਮਦਾਸ।
ਸੇਵਾ ਸਿਮਰਨ ਸਦਾ ਨਿਮਰਤਾ ਨਾਲ ਕਰਨਾ,
ਦੱਸਿਆ ਹੁਕਮ ਮੰਨਣਾ ਸ੍ਰੀ ਗੁਰੂ ਰਾਮਦਾਸ।
ਸੁਰਜੀਤ ਸਿੰਘ ! ਗੁਰ ਦਰ ਤੋਂ ਬਖਸ਼ਸਾਂ ਮਿਲਦੀਆਂ,
ਮੱਤ ਉੱਚੀ ਰੱਖਣੀ ਦੱਸਿਆ ਸ੍ਰੀ ਗੁਰੂ ਰਾਮਦਾਸ।