ਲੈ ਕੇ ਮਜ਼੍ਹਬ ਦੀ ਆੜ ਸੀ ਜ਼ੁਲਮ ਕੀਤਾ,
ਝੂਠੇ ਫਤਵੇ ਲਾ ਧਰਮ ਦੀ ਹਾਨੀ ਕੀਤੀ।
ਲੱਖਾਂ ਤਿਲਕ ਉਸ ਮੱਥੇ ਤੋਂ ਪੂੰਝ ਦਿੱਤੇ,
ਅਉਖੀ ਹਿੰਦੂਆਂ ਦੀ ਜ਼ਿੰਦਗਾਨੀ ਕੀਤੀ।
ਫੜ ਫੜ ਬੇਦੋਸ਼ੇ ਕਈ ਉਹ ਜਾਏ ਮਾਰੀ,
ਮੰਦਰ ਢਾਹ ਢਾਹ ਬੜੀ ਵੈਰਾਨੀ ਕੀਤੀ।
ਜਨਤਾ ਨਾਲ ਏ ਇਨਸਾਫ ਨਹੀਂ ਕੀਤਾ,
ਤਖ਼ਤ ਬੈਠ ਔਰੰਗਜ਼ੇਬ ਬੇਈਮਾਨੀ ਕੀਤੀ।
ਸੁਣ ਕੇ ਪੁਕਾਰ ਕਸ਼ਮੀਰ ਦੇ ਪੰਡਤਾਂ ਦੀ,
ਹਿੰਦ ਵਾਸੀਆਂ ਉੱਤੇ ਮੇਹਰਬਾਨੀ ਕੀਤੀ।
ਗੁਰੂ ਤੇਗ ਬਹਾਦਰ ਮਹਾਰਾਜ ਜੀ ਨੇ,
ਤਿਲਕ ਜੰਝੂ ਦੇ ਲਈ ਕੁਰਬਾਨੀ ਕੀਤੀ।
ਕਿਹਾ ਪੰਡਤਾਂ ‘ਧਰਮ ਨੂੰ ਹੈ ਬੜਾ ਖ਼ਤਰਾ',
ਮੁਗ਼ਲ ਸੈਨਾ ਬੜਾ ਅੱਤਿਆਚਾਰ ਕਰਦੀ।
ਮੰਦਰਾਂ ਵਿਚ ਟੱਲ ਨਹੀਂ ਵਜਾਉਣ ਦੇਂਦੇ,
ਪਾਠ ਪੂਜਾ ਤੋਂ ਵੀ ਬੜਾ ਲਚਾਰ ਕਰਦੀ।
ਰਾਹ ਜਾਂਦਿਆਂ ਦੇ ਜਨੇਊ ਲਾਹੀ ਜਾਵੇ,
ਕਤਲ ਖਲ੍ਹਾਰ ਕੇ ਵਿਚ ਬਜ਼ਾਰ ਕਰਦੀ।
ਔਰੰਗਜ਼ੇਬ ਦੀ ਦਾਤਾ ਸਰਕਾਰ ਜ਼ਾਲਮ,
ਜੋ ਨਾ ਸ਼ਰ੍ਹਾ ਮੰਨੇ ਉਹਨੂੰ ਪਾਰ ਕਰਦੀ।
ਪਾਤਸ਼ਾਹ ਜੀ! ਐਵੇਂ ਮਾਰ ਕੇ ਬੇਦੋਸ਼ਿਆਂ ਨੂੰ,
ਜ਼ਾਲਮਾਂ ਨੇ ਸਾਨੂੰ ਬੜੀ ਪ੍ਰੇਸ਼ਾਨੀ ਕੀਤੀ।
ਦੁਖੀ ਪੰਡਤਾਂ ਦੇ ਦੁਖਾਂ ਨੂੰ ਨਾ ਸਹਾਰ ਸਕੇ,
ਤਿਲਕ ਜੰਝੂ ਦੇ ਲਈ ਕੁਰਬਾਨੀ ਕੀਤੀ।
ਨੌਵੇਂ ਪਾਤਸ਼ਾਹ ਜੀ ਕਰਨ ਵਿਚਾਰ ਕਿੱਦਾਂ,
ਜ਼ਾਲਮ ਕੋਲੋਂ ਮਜ਼ਲੂਮ ਬਚਾਇਆ ਜਾਵੇ।
ਖ਼ਤਰਾ ਬਣਿਆ ਏ ਜੋ ਹਿੰਦੂ ਧਰਮ ਉੱਤੇ,
ਸਦਾ ਵਾਸਤੇ ਕਿਸ ਤਰ੍ਹਾਂ ਹਟਾਇਆ ਜਾਵੇ।
ਜਿਹੜਾ ਸਦੀਆਂ ਤੋਂ ਠੰਡਾ ਸੀਤ ਹੋਇਆ,
ਖ਼ੂਨ ਕਿਸ ਤਰ੍ਹਾਂ ਫੇਰ ਗਰਮਾਇਆ ਜਾਵੇ।
ਜੋ ਸੱਚ ਧਰਮ ਦੇ ਰਾਹ ਨੂੰ ਸਨ ਛੱਡ ਬੈਠੇ,
ਸਚਾ ਉਪਦੇਸ਼ ਕਿਵੇਂ ਏ ਦ੍ਰਿੜਾਇਆ ਜਾਵੇ।
ਪੱਤਾ ਪੱਤਾ ਕੀਤੇ ਪਾੜ ਕੇ ਵੇਦ ਜਾਲਮਾਂ ਨੇ,
ਮੰਦਰਾਂ ’ਤੇ ਪਾਬੰਦੀ ਲਾ ਕੇ ਪਰੇਸ਼ਾਨੀ ਕੀਤੀ।
ਸਤਿਗੁਰੂ ਉਪਕਾਰੀ ਦੁਖ ਨਾ ਜਰ ਸਕੇ,
ਤਿਲਕ ਜੰਝੂ ਦੇ ਲਈ ਕੁਰਬਾਨੀ ਕੀਤੀ।
ਪੁੱਛਿਆ ਬਾਲ ਗੋਬਿੰਦ ਤਾਂ ਗੁਰੂ ਜੀ ਬੋਲੇ,
ਔਰੰਗਜ਼ੇਬ ਨੇ ਬੜਾ ਸਤਾਇਆ ਹੋਇਆ।
ਤਲਵਾਰ ਨਾਲ ਇਕ ਇਸਲਾਮ ਕਰਨਾ,
ਹਿੰਦੂ ਜਾਤੀ ਨੂੰ ਉਸ ਡਰਾਇਆ ਹੋਇਆ।
ਮਹਾਂਪੁਰਸ਼ ਹੀ ਕੋਈ ਧਰਮ ਬਚਾ ਸਕਦਾ,
ਇਹ ਖੇਲ ਕਰਤਾਰ ਰਚਾਇਆ ਹੋਇਆ।
ਖਾਤਰ ਧਰਮ ਦੀ ਸ਼ਹਾਦਤ ਆਪ ਦੇਵੇ,
ਸਮਾਂ ਜਗ ਉੱਤੇ ਐਸਾ ਆਇਆ ਹੋਇਆ।
ਗੋਬਿੰਦ ਰਾਏ ਕਿਹਾ ਪਿਤਾ ਜੀ ਜਗ ਉੱਤੇ,
ਦਰ ਆਇਆਂ ਦੀ ਤੁਸੀਂ ਮੇਜ਼ਬਾਨੀ ਕੀਤੀ।
ਕਰੋ ਉਪਕਾਰ ਐਸਾ ਕਰੇ ਯਾਦ ਦੁਨੀਆ,
ਤਿਲਕ ਜੰਝੂ ਦੇ ਲਈ ਕੁਰਬਾਨੀ ਕੀਤੀ।
ਆਏ ਸ਼ਰਨ ਜੋ ਗੁਰੂ ਨਾਨਕ ਪਾਤਸ਼ਾਹ ਦੀ,
ਸੀਨੇ ਉਨ੍ਹਾਂ ਨੂੰ ਲਾ ਕੇ ਸੀ ਪਿਆਰ ਕੀਤਾ।
ਤਿਲਕ ਜੰਝੂ ਨਾਲ ਨਹੀਂ ਏ ਸਰੋਕਾਰ ਭਾਵੇਂ,
ਪਰਉਪਕਾਰੀ ਦਾਤਾ ਜੀ ਨੇ ਉਪਕਾਰ ਕੀਤਾ।
ਧਰਮ ਬਚਾਉਣ ਦੇ ਬਦਲੇ ਸ਼ਹੀਦੀ ਦੇਣਾ,
ਸਤਿਗੁਰੂ ਤੇਗ ਬਹਾਦਰ ਨੇ ਪ੍ਰਚਾਰ ਕੀਤਾ।
ਧਰਤੀ ਡੋਲੀ ਅਤੇ ਅਸਮਾਨ ਕੰਬਿਆ ਸੀ,
ਜਦੋਂ ਗੁਰਾਂ ਨੂੰ ਜਾਲਮਾਂ ਨੇ ਗ੍ਰਿਫ਼ਤਾਰ ਕੀਤਾ।
ਜ਼ੁਲਮ ਖਤਮ ਕੀਤਾ ਵਾਰ ਕੇ ਸੀਸ ਆਪਣਾ,
ਤੁਸੀਂ ਮਜ਼ਲੂਮਾਂ ਉੱਤੇ ਮਿਹਰਬਾਨੀ ਕੀਤੀ।
ਸੁਰਜੀਤ ਸਿੰਘਾ ! ਚਾਂਦਨੀ ਚੌਕ ਵਿਚ ਸਤਿਗੁਰੂ ਜੀ,
ਤਿਲਕ ਜੰਝੂ ਵਾਸਤੇ ਵੱਡੀ ਕੁਰਬਾਨੀ ਕੀਤੀ।