ਸ਼ਾਂਤੀ ਦੇ ਸਾਗਰ ਗੁਰੂ ਅਰਜਨ ਦੇ ਰੂਪ ਅੰਦਰ
ਗੋਇੰਦਵਾਲ ਸਾਹਿਬ ਵਿਚ ਪ੍ਰਗਟ ਆਣ ਹੋਏ।
ਸੋਢੀ ਪਾਤਸ਼ਾਹ ਜੀ ਸੰਸਾਰ ਵਿਚ ਹੋ ਪੈਦਾ,
ਮਨੁੱਖਤਾ ਦੇ ਉੱਤੇ ਦਾਤਾ ਜੀ ਮਿਹਰਬਾਨ ਹੋਏ।
ਰਾਜਾ ਰੰਕ ਬਰਾਬਰ ਜਗ ਉਤੇ ਉਪਦੇਸ਼ ਦੇਂਦੇ,
ਉੱਚਾ ਨੀਵਾਂ ਨਾ ਕੋਈ ਕਦੀ ਇਨਸਾਨ ਹੋਏ।
ਸਾਰਿਆਂ ਇਨਸਾਨਾਂ ਦਾ ਕਰੋ ਸਤਿਕਾਰ ਸਾਰੇ,
ਹਰ ਇਕ ਜੀਵ ਦੇ ਵਿਚ ਉਹੋ ਵਿਦਮਾਨ ਹੋਏ।
ਮਿਲੇ ਸ਼ਾਂਤੀ ਸਭ ਨੂੰ ਅਮਲਾਂ ਚੰਗਿਆਂ ਨਾਲ,
ਹਿੰਦੂ, ਇਸਾਈ ਤੇ ਭਾਵੇਂ ਕੋਈ ਮੁਸਲਮਾਨ ਹੋਏ
ਇੱਕੋ ਰੱਬ ਸਭ ਦਾ ਸਾਂਝਾ ਹੈ ਜੁਗਾਂ ਤੋਂ ਵਹਿਗੁਰੂ
ਭਰਮਾਂ ਵਿਚ ਏ ਮਨੁੱਖਾ ਜੀਵਨ ਵੀਰਾਨ ਹੋਏ।
ਵਹਿਮਾਂ ਭਰਮਾਂ ਵਿੱਚੋਂ ਸਾਰੇ ਜਗਤ ਨੂੰ ਕੱਢ ਦਾਤੇ
ਲਾਇਆ ਲੜ ਹੈ ਨਿਰੰਕਾਰ ਦੇ ਗੁਰੂ ਅਰਜਨ।
ਸਤਿਸੰਗਤ ਅਤੇ ਪੰਗਤ ਵਿਚ ਬਿਠਾ ਸਭ ਨੂੰ,
ਇੱਕੋ ਆਤਮਾ ਏ ਸਮਝਾਇਆ ਗੁਰੂ ਅਰਜਨ
ਸਦਾ ਕਿਰਤ ਕਰ ਧਰਮ ਦੀ ਅਤੇ ਵੰਡ ਖਾਏ,
ਦਿੱਤਾ ਉਸ ਨੂੰ ਸਨਮਾਨ ਦਾਤੇ ਗੁਰੂ ਅਰਜਨ
ਲੋੜਵੰਦ ਗ਼ਰੀਬ ਨੂੰ ਸਦਾ ਦੇਵੇ ਵਸਤ ਜੇਹੜਾ,
ਦਾਨ ਸਫਲ ਉਸਦਾ ਹੈ ਕਿਹਾ ਗੁਰੂ ਅਰਜਨ
ਸੰਗਤਾਂ ਆਈਆਂ ਨੂੰ ਲੰਗਰ ਛਕਾ ਪਾਤਸ਼ਾਹ,
ਕਰੋ ਦਾਨ ਏਦਾਂ ਫੁਰਮਾਇਆ ਗੁਰੂ ਅਰਜਨ
ਸਤਿਨਾਮ ਜਪੇ ਹਰ ਵੇਲੇ ਉਸ ਦੀ ਮੁਕਤ ਹੋਵੇ,
ਇਹ ਵਾਹਿਗੁਰੂ ਨਾਮ ਦਿੱਤਾ ਗੁਰੂ ਅਰਜਨ
ਗੁਰੂ ਹੁਕਮ ਨਾਲ ਤਵੀ ਹੇਠ ਅੱਗ ਬਲਦੀ,
ਆਪ ਚੌਕੜਾ ਲਾ ਕੇ ਤਵੀ 'ਤੇ ਬਿਰਾਜਮਾਨ ਹੋਏ।
ਗਰਮ ਰੇਤ ਪਾਉਂਦੇ ਵੈਰੀ ਸਰੀਰ ਉੱਤੇ,
ਨਾਮ ਵਾਹਿਗੁਰੂ ਸਿਮਰ ਅੰਤਰ ਧਿਆਨ ਹੋਏ।
ਆਪ ਸਰਬ ਕਲਾ ਸਮਰੱਥ ਸਚੇ ਪਾਤਸ਼ਾਹ ਜੀ,
ਨਾਮ ਜਪਣ ਸੰਗਤਾਂ ਦਾ ਲਗਾ ਦੀਵਾਨ ਹੋਏ।
ਜਦੋਂ ਪਤਾ ਲੱਗਾ ਸੀ ਸਾਈਂ ਮੀਆਂ ਮੀਰ ਜੀ ਨੂੰ
ਦੀਦਾਰ ਗੁਰੂ ਜੀ ਦੇ ਲਈ ਹਾਜ਼ਰ ਆਣ ਹੋਏ।
ਕਹਿਰ ਕਹਿਰ ਖੁਦ੍ਰਾ ਤੇ ਆਪ ਕਹਿਰ ਕਹਿੰਦੇ,
ਬਹੁਤ ਕ੍ਰੋਧ ਵਿਚ ਆਏ ਸਾਈਂ ਜੀ ਪਰੇਸ਼ਾਨ ਹੋਏ।
ਸਾਈਂ ਜੀ ਸ਼ਾਂਤ ਰਹਿਣਾ ਕਰੋਧਿਤ ਨਹੀਂ ਹੋਣਾ,
ਉਹੋ ਹੀ ਹੁੰਦਾ ਹੈ ਜੋ ਪਰਮਾਤਮਾ ਨੂੰ ਪ੍ਰਵਾਨ ਹੋਏ।
ਸੇਵਾ ਲੱਗੀ ਹੈ ਸਾਨੂੰ ਜੋ ਅਕਾਲ ਪੁਰਖ ਵੱਲੋਂ,
ਸਾਈਂ ਜੀ ਅਸੀਂ ਉਸ ਨੂੰ ਨਿਭਾਉਣ ਆਏ ਹਾਂ।
ਬ੍ਰਹਮ ਗਿਆਨੀ ਸਦਾ ਨਿਰਦੋਖ ਪੁੱਛਿਆ ਸੀ,
ਇਸ ਪੰਕਤੀ ਦੇ ਭਾਵ ਸਮਝਾਉਣ ਆਏ ਹਾਂ।
ਕਦੀ ਮਾਣ ਹੁੰਦਿਆਂ ਵੀ ਕਰੀਦਾ ਮਾਣ ਨਹੀਂ,
ਸਬਰ ਨਾਲ ਇਹ ਜੁਲਮ ਮਿਟਾਉਣ ਆਏ ਹਾਂ।
ਨਿਰੰਕਾਰ ਦਿੱਤਾ ਉਪਦੇਸ਼ ਸਾਰੇ ਜਗਤ ਲਈ,
ਅਸੀਂ ਉਸ ਦੇ ਅਰਥ ਸਮਝਾਉਣ ਆਏ ਹਾਂ।
ਸਦੀਆਂ ਤੋਂ ਸੁੱਤੀ ਜ਼ਮੀਰ ਹਿੰਦ ਵਾਸੀਆਂ ਦੀ,
ਕੁਰਬਾਨੀ ਦੇ ਕੇ ਸੰਸਾਰ ਜਗਾਉਣ ਆਏ ਹਾਂ।
ਊਚ ਨੀਚ ਤੇ ਜਾਤ ਪਾਤ ਵਿਚ ਵੰਡਿਆ ਨੂੰ,
ਸੁਰਜੀਤ ਸਿੰਘਾ ! ਨਿਰੰਕਾਰ ਦੇ ਲੜ ਲਾਉਣ ਆਏ ਹਾਂ।