ਮਜ਼ਲੂਮਾਂ ਦੀ ਰੱਖਿਆ, ਖ਼ਾਤਰ ਹੀ ਜੰਮਦੇ ਸੂਰੇ ਨੇ।
ਯਾਦ ਕਰਦੀਆਂ ਕੌਮਾਂ, ਜੋ ਸਿੰਘ ਕਰਨੀ ਦੇ ਪੂਰੇ ਨੇ।
ਪਿਤਾ ਦੀ ਮੌਤ ਦੇ ਪਿੱਛੋਂ, ਪੰਥ ਦੀ ਸੇਵਾ ਆਪ ਸੰਭਾਲੀ ਸੀ।
ਸਿੱਖ ਕੌਮ ਦਾ ਹੀਰਾ, ਬਾਬਾ ਫੂਲਾ ਸਿੰਘ ਅਕਾਲੀ ਸੀ।

ਈਸ਼ਰ ਸਿੰਘ ਦੇ ਘਰ, ਦੇਹਲਾ (ਸ਼ੀਹਾਂ) ’ਚ ਜਨਮ ਧਾਰ ਲਿਆ।
ਅਕਾਲੀ ਨੈਣਾ ਸਿੰਘ ਤੋਂ, ਸਿੱਖ ਸਿੱਖੀ ਸਤਿਕਾਰ ਲਿਆ।
ਅਨੰਦਪੁਰ ਸਾਹਿਬ ਸੀ ਸੇਵਾ ਕੀਤੀ, ਕਰਮਾਂ ਦਾ ਵਾਲੀ ਸੀ।
ਸਿੱਖ ਕੌਮ ਦਾ ਹੀਰਾ, ਬਾਬਾ ਫੂਲਾ ਸਿੰਘ ਅਕਾਲੀ ਸੀ।

ਫੂਲਾ ਸਿੰਘ ਨਾਂ ਸੁਣ ਕੇ ਵੈਰੀ ਕੰਬਦੇ, ਦੂਰੋਂ-ਦੂਰੋਂ ਸੀ।
ਕੁਤਬਦੀਨ ਦੀਆਂ ਫੌਜਾਂ, ਦਿੱਤੀਆਂ ਕੱਢ ਕਸੂਰੋਂ ਸੀ।
ਜੰਗ ਨੌਸ਼ਹਿਰੇ ਵਾਲੀ ਦੀ, ਕਮਾਨ ਆਪ ਸੰਭਾਲੀ ਸੀ।
ਸਿੱਖ ਕੌਮ ਦਾ ਹੀਰਾ, ਬਾਬਾ ਫੂਲਾ ਸਿੰਘ ਅਕਾਲੀ ਸੀ।

ਮੁਲਤਾਨ ਦੇ ਉੱਪਰ, ਸਿੱਖ ਕੌਮ ਦਾ ਚਾੜ੍ਹਿਆ ਝੰਡਾ ਸੀ।
ਬਿਨਾਂ ਤਨਖਾਹ ਤੋਂ ਲੜਿਆ, ਉਹ ਰੱਬ ਦਾ ਬੰਦਾ ਸੀ।
ਸਿੱਖੀ ਦੀ ਸੇਵਾ ਕਰਨੀ, ਇਕ ਤਾਂਘ ਨਿਰਾਲੀ ਸੀ।
ਸਿੱਖ ਕੌਮ ਦਾ ਹੀਰਾ, ਬਾਬਾ ਫੂਲਾ ਸਿੰਘ ਅਕਾਲੀ ਸੀ।

ਜੰਗਾਂ ਜਿੱਤ ਕੇ ਇਹ ਯੋਧਾ, ਜਦ ਵਾਪਸ ਆਉਂਦਾ ਸੀ।
ਮਹਾਰਾਜਾ ਰਣਜੀਤ ਸਿੰਘ ਘੁੱਟ ਸ਼ੇਰ ਨੂੰ, ਸੀਨੇ ਲਾਉਂਦਾ ਸੀ।
ਕਰਨੀ ਦੇ ਪੂਰੇ ਤੋਂ, ਮਹਾਰਾਜੇ ਨੇ ਭੁੱਲ ਬਖਸ਼ਾ ਲਈ ਸੀ।
ਸਿੱਖ ਕੌਮ ਦਾ ਹੀਰਾ, ਬਾਬਾ ਫੂਲਾ ਸਿੰਘ ਅਕਾਲੀ ਸੀ।

ਪੰਥ ਦਾ ਸੱਚਾ ਸੇਵਕ, ਨੌਸ਼ਹਿਰੇ ਸ਼ਹੀਦੀ ਪਾ ਗਿਆ ਸੀ।
ਧਰਮ ਦੀ ਖਾਤਰ ਜੰਮਿਆ, ਆਪਣਾ ਧਰਮ ਨਿਭਾ ਗਿਆ ਸੀ।
ਤਰਸੇਮ ਸਿੰਘਾ ਕੌਮ ਦੀ ਸੇਵਾ, ਜਾਂਦੀ ਕਦੇ ਵੀ ਖਾਲੀ ਨਹੀਂ।
ਸਿੱਖ ਕੌਮ ਦਾ ਹੀਰਾ, ਬਾਬਾ ਫੂਲਾ ਸਿੰਘ ਅਕਾਲੀ ਸੀ।