ਹਾਰਨਾ ਨਹੀਂ ਹਾਲਾਤ ਬੁਰੇ ’ਚ ਜੂਝਣਾ ਜ਼ਰੂਰੀ ਏ।
ਹਿੰਮਤ ਕਰਕੇ ਪੈ ਜਾਂਦੀ ਹਰ ਕੰਮ ’ਚ ਪੂਰੀ ਏ।
ਆਈ ਮੁਸੀਬਤ ਦਾ ਮੁਕਾਬਲਾ ਡਟ ਕੇ ਕਰਦੇ ਨੇ।
ਆਤਮ ਹੱਤਿਆ ਨਹੀਂ, ਪੰਜਾਬੀ ਜੂਝ ਕੇ ਮਰਦੇ ਨੇ।

ਤੀਰ, ਤਲਵਾਰਾਂ, ਤੋਪਾਂ ਤੋਂ ਤੁਸੀਂ ਕਦੇ ਨਾ ਹਾਰੇ ਸੀ।
ਰੰਬੀ, ਚਰਖੜੀ, ਆਰਿਆਂ ਦੇ ਵੀ ਦੁੱਖ ਸਹਾਰੇ ਸੀ।
ਰਣ-ਭੂਮੀ ’ਚ ਸੂਰਮੇ ਲਾੜੀ ਮੌਤ ਨੂੰ ਵਰ੍ਹਦੇ ਨੇ।
ਆਤਮ ਹੱਤਿਆ ਨਹੀਂ, ਪੰਜਾਬੀ ਜੂਝ ਕੇ ਮਰਦੇ ਨੇ।

ਨਿੱਤ ਮੁਹਿੰਮ ਪੰਜਾਬੀਆਂ ਨੂੰ ਕਹਾਵਤ ਬਣ ਗਈ ਸੀ।
ਅਣਖ ਤੁਸਾਂ ਦੀ ਜ਼ਾਲਮਾਂ ਲਈ ਸ਼ਾਮਤ ਬਣ ਗਈ ਸੀ।
ਪੈਰ ਅਗਾਂਹ ਵਧਾ ਕੇ ਫਿਰ ਨਾ ਪਿੱਛੇ ਧਰਦੇ ਨੇ।
ਆਤਮ ਹੱਤਿਆ ਨਹੀਂ, ਪੰਜਾਬੀ ਜੂਝ ਕੇ ਮਰਦੇ ਨੇ।

ਨੱਕ ਨੂੰ ਰੱਖਣ ਲਈ ਐਵੇਂ ਨਾ, ਖਰਚ ਵਧਾਓ ਜੀ।
ਚੁੱਕ ਕੇ ਕਰਜ਼ੇ ਵਿਆਹਵਾਂ ’ਤੇ ਨਾ ਧਨ ਲੁਟਾਓ ਜੀ।
ਬਾਹਰ ਚਾਦਰੋਂ ਪੈਰ ਮੂਲ ਨਾ ਸਿਆਣੇ ਧਰਦੇ ਨੇ।
ਆਤਮ ਹੱਤਿਆ ਨਹੀਂ, ਪੰਜਾਬੀ ਜੂਝ ਕੇ ਮਰਦੇ ਨੇ।

ਫਿਰ ਵੀ ਚੜ੍ਹ ਗਿਆ ਜੇ ਸਿਰ ਦੇ ਉੱਤੇ ਕਰਜ਼ਾ ਭਾਰੀਏ।
ਰੱਖੋਂ ਹੌਂਸਲਾ ਤੁਸੀਂ ਇਵੇਂ ਕਿਉਂ ਹਿੰਮਤ ਹਾਰੀ ਏ।
ਕਰ ਕਮਾਈਆਂ ਲਾਹੁੰਦੇ ਜੇਕਰ ਕਰਜ਼ੇ ਚੜ੍ਹਦੇ ਨੇ।
ਆਤਮ ਹੱਤਿਆ ਨਹੀਂ, ਪੰਜਾਬੀ ਜੂਝ ਕੇ ਮਰਦੇ ਨੇ।

ਆਤਮ ਹੱਤਿਆ ਕਰਨੀ ਨਹੀਂ ਹੈ ਹੱਲ ਸਮੱਸਿਆ ਦਾ।
ਬੇ-ਰੁਜ਼ਗਾਰੀ ਜਰਨੀ ਨਹੀਂ ਹੈ ਹੱਲ ਸਮੱਸਿਆ ਦਾ।
‘ਬੇਲੀ’ ਗਰੀਬੀ ਦੂਰ ਕਰਨ ਲਈ ਮਿਹਨਤ ਕਰਦੇ ਨੇ।
ਆਤਮ ਹੱਤਿਆ ਨਹੀਂ, ਪੰਜਾਬੀ ਜੂਝ ਕੇ ਮਰਦੇ ਨੇ।