ਪੁੱਛਿਆ ਸੀ ਭਾਗੋ ਬਾਬੇ ਇੰਝ ਫੁਰਮਾਇਆ।
ਦੁੱਧ ਦੇ ਸਵਾਦ ਵਰਗਾ,
ਰਸ ਲਾਲੋ ਦੀਆਂ ਰੋਟੀਆਂ ’ਚੋਂ ਆਇਆ।

ਕੋਧਰੇ ਦੀ ਰੋਟੀ ’ਤੇ ਆਚਾਰ ਤੈਨੂੰ ਦਿੱਸਦਾ।
ਇਸ ਵਿਚ ਲਾਲੋ ਦਾ ਪਿਆਰ ਮੈਨੂੰ ਦਿੱਸਦਾ।
ਉਹਨੇ ਹੱਕ ਦੀ ਕਮਾਈ ’ਚੋਂ ਖਵਾਇਆ।

ਦੁੱਧ ਦੇ ਸਵਾਦ ਵਰਗਾ,
ਰਸ ਲਾਲੋ ਦੀਆਂ ਰੋਟੀਆਂ ’ਚੋਂ ਆਇਆ।
ਹੱਥੀਂ ਕਰਦਾ ਹੈ ਕਾਰ ਨਾਮ ਜਪੇ ਕਰਤਾਰ ਦਾ।
ਰੁੱਖੀ ਸੁੱਕੀ ਖਾ ਕੇ ਉਹ ਤਾਂ ਸ਼ੁਕਰ ਗੁਜ਼ਾਰ ਦਾ।
ਤਾਹੀਉਂ ਮੇਰੇ ਮਨ ਨੂੰ ਗ਼ਰੀਬ ਉਹ ਭਾਇਆ।

ਦੁੱਧ ਦੇ ਸਵਾਦ ਵਰਗਾ,
ਰਸ ਲਾਲੋ ਦੀਆਂ ਰੋਟੀਆਂ ’ਚੋਂ ਆਇਆ।
ਪੀਂਦੀਆਂ ਜੋ ਖ਼ੂਨ ਤੂੰ ਤਾਂ ਯਾਰ ਉਨ੍ਹਾਂ ਜੋਕਾਂ ਦਾ।
ਤੇਰੇ ਪੂੜਿਆਂ ’ਚੋਂ ਦਿੱਸਦਾ ਹੈ ਖੂਨ ਮੈਨੂੰ
ਲੋਕਾਂ ਦਾ।
ਮਾਰ-ਮਾਰ ਠੱਗੀਆਂ ਤੇ ਯੱਗ ਤੂੰ ਹੈ ਲਾਇਆ।

ਦੁੱਧ ਦੇ ਸਵਾਦ ਵਰਗਾ,
ਰਸ ਲਾਲੋ ਦੀਆਂ ਰੋਟੀਆਂ ’ਚੋਂ ਆਇਆ।
ਸੁਣ ਗੱਲਾਂ ਸੱਚੀਆਂ ਨੂੰ ਭਾਗੋ ਗਿਆ ਝੁੱਕ ਸੀ।
ਕੇਰਦਾ ਉਹ ਨੈਣਾਂ ਵਿੱਚੋਂ ਨੀਰ ਬੁੱਕ-ਬੁੱਕ ਸੀ।
‘ਬੇਲੀ’ ਕਰ ਤੌਬਾ ਉਹਨੇ ਹੱਥ ਕੰਨੀਂ ਲਾਇਆ।
ਦੁੱਧ ਦੇ ਸਵਾਦ ਵਰਗਾ,
ਰਸ ਲਾਲੋ ਦੀਆਂ ਰੋਟੀਆਂ ’ਚੋਂ ਆਇਆ।