ਕਿਹਾ ਤੇਗ਼ ਲਿਸ਼ਕਾਇ ਗੁਰਬਖਸ਼ ਸਿੰਘ ਨੇ,
ਹੋ ਜੌ ਮਰਨ ਦੇ ਲਈ ਤਿਆਰ ਸਿੰਘੋ।
ਅੱਜ ਸਿੰਘ ਅਖਵਾਉਣਾ ਸਫਲ ਕਰਨਾ,
ਦਿਉ ਧਰਮ ਉੱਤੋਂ ਸੀਸ ਵਾਰ, ਸਿੰਘੋ।
ਹੋਇਆ ਕੀ, ਜੇ ਅਸੀਂ ਹਾਂ ਬਹੁਤ ਥੋੜ੍ਹੇ,
ਵੈਰੀ ਚੜ੍ਹ ਆਏ ਕਈ ਹਜ਼ਾਰ, ਸਿੰਘੋ।
ਲੱਖਾਂ ਨਾਲ ਚਮਕੌਰ ਵਿਚ ਲੜਨ ਵਾਲੇ,
ਅਸੀਂ ਓਹਾ ਅਜੀਤ, ਜੁਝਾਰ, ਸਿੰਘੋ।
ਸਾਡੇ ਸਾਮ੍ਹਣੇ ਅੜੇ ਮਜ਼ਾਲ ਕਿਸ ਦੀ?
ਝੱਲੇ ਕਾਲ ਵੀ ਨਾ ਸਾਡੇ ਵਾਰ, ਸਿੰਘੋ।
ਬਿਜਲੀ ਬੱਦਲੀਂ ਜਾ ਲੁਕੇ ਸ਼ਰਮ ਖਾ ਕੇ,
ਸਾਡੀ ਚਮਕਦੀ ਵੇਖ ਤਲਵਾਰ, ਸਿੰਘੋ।
ਲਾਹੋ ਚਾਅ ਅੱਜ ਜੰਗ ਦੇ ਦੁਸ਼ਮਣਾਂ ਦੇ,
ਵੈਰੀ ਮਾਰੋ ਲਲਕਾਰ ਲਲਕਾਰ, ਸਿੰਘੋ।
‘ਸੀਤਲ’ ਗਾਉਣਗੇ ਕੌਮੀ ਪਰਵਾਨਿਆਂ ਦੀ,
ਜੁੱਗਾਂ ਤੀਕ ਪਿੱਛੋਂ ਢਾਡੀ ਵਾਰ, ਸਿੰਘੋ।
‘ਸੀਤਲ’ ਗਾਉਣਗੇ ਕੌਮੀ ਪਰਵਾਨਿਆਂ ਦੀ,
ਜੁੱਗਾਂ ਤੀਕ ਪਿਛੋਂ ਢਾਡੀ ਵਾਰ, ਸਿੰਘੋ।