ਹੋਲਾ ਖੇਡਦਾ ਅਨੰਦਪੁਰ ਖਾਲਸਾ ਜਾਂ,
ਜਾਪੇ ਗੁਰੂ ਦਸ਼ਮੇਸ਼ ਜੀ ਨਾਲ ਖੇਡੇ।
ਚੋਟਾਂ ਲੱਗਦੀਆਂ ਜਦੋਂ ਨਗਾਰਿਆਂ ’ਤੇ,
ਜਜ਼ਬਾ ਸਿੰਘਾਂ ਦਾ ਬੇਮਿਸਾਲ ਖੇਡੇ।
ਮਹੱਲਾ ਨਿਕਲੇ ਜਾਂ ਖਾਲਸੇ ਪਾਉਣ ਚਾਲੇ,
ਚਾਰੇ ਪਾਸਿਓਂ ਰੰਗ ਗੁਲਾਲ ਖੇਡੇ।
ਹਾਥੀ ਝੂਮ ਹਮਾਰੀਆਂ ਸਣੇ ਤੁਰਦੇ,
ਵੇਖੋ ਘੋੜ-ਅਸਵਾਰਾਂ ਦੀ ਤਾਲ ਖੇਡੇ।
ਅੰਬਰ ਗੂੰਜ ਜੈਕਾਰਿਆਂ ਨਾਲ ਉੱਠੇ,
ਹੋਲਾ ਬਜ਼ੁਰਗ ਜਵਾਨ ਤੇ ਬਾਲ ਖੇਡੇ।
ਜੌਹਰ ਖਾਲਸਾ ਗਤਕੇ ਦੇ ਦੱਸਦਾ ਜਾਂ,
ਹਰ ਕੋਈ ਸੂਰਮਾ ਵਾਰ ਸੰਭਾਲ ਖੇਡੇ।
ਜਿਵੇਂ ਜੰਗ ਭੰਗਾਣੀ ਦੇ ਰਣ ਅੰਦਰ,
ਸਿੰਘ ਵੈਰੀਆਂ ਨਾਲ ਕਮਾਲ ਖੇਡੇ।
ਨੇਜਾਬਾਜ਼ੀ ਤੇ ਕਿਤੇ ਘੋੜ-ਦੌੜ ਹੁੰਦੀ,
ਕਿਤੇ ਅਖਾੜੇ ’ਚ ਤੇਗ ਤੇ ਢਾਲ ਖੇਡੇ।
ਸਿੰਘ ਯੋਧਾ ਚਮਕੌਰ ਦੀ ਗੜ੍ਹੀ ਦੇ ਵਿਚ,
ਕੱਲ੍ਹਾ ਕੱਲ੍ਹਾ ਜਿਉਂ ਲੱਖਾਂ ਦੇ ਨਾਲ ਖੇਡੇ।
‘ਰਾਜੋਕਿਆਂ ਵਾਲਿਆ’ ਚੜ੍ਹਦੀਆਂ ਕਲਾਂ ਦਿੱਸਣ,
ਸਿੰਘ ਤੋੜ ਗ਼ੁਲਾਮੀ ਦੇ ਜਾਲ ਖੇਡੇ।