24 ਦਸੰਬਰ 1934 ਈਸਵੀ ਨੂੰ ਅਕਾਲ ਤਖ਼ਤ ਸਾਹਿਬ ਦੇ ਜੱਥੇਦਾਰ ਸੰਤ ਬਾਬਾ ਵਿਸਾਖਾ ਸਿੰਘ ਦਦੇਹਰ ਹੁਣਾ ਦੀ ਗੈਰ ਮੌਜੂਦਗੀ ਵਿਚ ; ਉਹਨਾਂ ਤੋਂ ਬਿਨਾਂ ਪੁਛਿਆਂ ਸ੍ਰਦਾਰ ਮੰਗਲ ਸਿੰਘ ਐਮ.ਐਲ.ਏ ਦੀ ਸਿਫ਼ਾਰਸ਼ ਤੇ ਪੰਜਾਬ ਸਰਕਾਰ ਦੇ ਚੀਫ਼ ਰਿਫਾਰਮਰ ਕਮਿਸ਼ਨਰ , ਖ਼ਾਨ ਬਹਾਦਰ ਨਵਾਬ ਮੁਜ਼ੱਫ਼ਰ ਖ਼ਾਂ ਨੂੰ ਅਕਾਲ ਤਖ਼ਤ ਵੱਲੋਂ ਸਿਰੋਪਾ ਦਿੱਤਾ ਗਿਆ ਤੇ ਨਾਲੇ ਉਸਦੀ ਉਪਮਾ ਕੀਤੀ ਗਈ ।ਇਸ ਖ਼ਾਂ ਸਾਹਬ ਨੇ ਗੁਰਦੁਆਰਾ ਕਾਨੂੰਨ ਬਣਾਉਣ ਵਿੱਚ ਅਹਿਮ ਯੋਗਦਾਨ ਪਾਇਆ ਸੀ। ਜਦ ਇਹ ਸਰਕਾਰੀ ਅਫ਼ਸਰ ਦੇ ਅਕਾਲ ਤਖ਼ਤ ਵੱਲੋਂ ਸਨਮਾਨ ਦੀ ਖ਼ਬਰ ਬਾਬਾ ਵਿਸਾਖਾ ਸਿੰਘ ਹੁਣਾਂ ਨੇ ਅਖ਼ਬਾਰ ਵਿਚ ਪੜ੍ਹੀ ਤਾਂ ਉਹਨਾਂ ਨੇ ਇਸ ਕਾਰਵਾਈ ਨੂੰ ਗ਼ਲਤ ਮੰਨਦਿਆਂ ਤੇ ਇਸ ਖਿਲਾਫ਼ ਆਪਣਾ ਰੋਸ ਜ਼ਾਹਰ ਕਰਦਿਆਂ, ਝੱਟ ਆਪਣਾ ਅਸਤੀਫ਼ਾ ਕਮੇਟੀ ਨੂੰ ਭੇਜ ਦਿੱਤਾ ; ਜਿਸਦੀ ਇਬਾਰਤ ਪੜ੍ਹਨ ਵਾਲੀ ਹੈ :-

" ਦਾਸ ਨੇ, 24 ਦਸੰਬਰ ਨੂੰ ਅਕਾਲ ਤਖ਼ਤ ਦੀ ਹਜ਼ੂਰੀ ਵਿਚ ਹੋਈ ਕਾਰਵਾਈ ਦਾ ਜ਼ਿਕਰ ਪੜਿਆ ਹੈ , ਜਿਸ ਵਿੱਚ ਇਕ ਸਰਕਾਰੀ ਅਫ਼ਸਰ ਦੀ ਉਪਮਾ ਕੀਤੀ ਗਈ ਹੈ ਅਤੇ ਉਸ ਨੂੰ ਅਕਾਲ ਤਖ਼ਤ ਸਾਹਿਬ ਜੀ ਵੱਲੋਂ ਸਿਰੋਪਾ ਦਿੱਤਾ ਗਿਆ । ਸਰਕਾਰੀ ਅਫ਼ਸਰ ਨੇ ਜੋ ਖੁੱਲ੍ਹੇ ਦੀਵਾਨ ਵਿਚ ਜਵਾਬ ਦਿੱਤਾ ਹੈ , ਉਹ ਵੀ ਪੜਿਆ ਹੈ ।ਆਸ ਹੈ ਕਿ ਆਪ ਨੇ ਵੀ ਉਹ ਅੱਖਰ ਪੜੇ ਹੋਣਗੇ , ਕਿਉਂਕਿ ਦਾਸ ਨੂੰ ਤਾਂ ਉਹ ਦੁਹਰਾਉਂਦਿਆਂ ਭੀ ਲੱਜਿਆ ਆਉਂਦੀ ਹੈ।ਦਾਸ ਦੇ ਵਿਚਾਰ ਵਿਚ ਏਸ ਕਾਰਵਾਈ ਰਾਹੀਂ ਅਕਾਲੀ ਲਹਿਰ ਦੀਆਂ ਸ਼ਾਨਦਾਰ ਕੁਰਬਾਨੀਆਂ ਉੱਤੇ ਪਾਣੀ ਫੇਰਿਆ ਗਿਆ ਹੈ ਅਤੇ ਸਿੱਖ ਇਤਿਹਾਸ ਉੱਤੇ ਇਕ ਕਾਲਾ ਧੱਬਾ ਲਾਇਆ ਗਿਆ ਹੈ।ਇਹ ਕਾਰਵਾਈ ਦਾਸ ਨੂੰ ਖ਼ਬਰ ਕੀਤੇ ਬਗ਼ੈਰ ਹੀ ਕੀਤੀ ਗਈ ਹੈ। ਦਾਸ ਦੀ ਜ਼ਮੀਰ ਏਸ ਨੂੰ ਸਹਾਰ ਨਹੀਂ ਸਕਦੀ , ਕਿਉਂਕਿ ਏਸ ਦੁਆਰਾ ਸ੍ਰੀ ਗੁਰੂ ਹਰਗੋਬਿੰਦ ਸਾਹਿਬ ਦੇ ਸਥਾਪਨ ਕੀਤੇ ਹੋਏ ਪਵਿੱਤਰ ਅਸਥਾਨ ਸ੍ਰੀ ਅਕਾਲ ਤਖ਼ਤ ਸਾਹਿਬ ਜੀ ਅਤੇ ਗੁਰੂ ਪੰਥ ਦੀ ਬੇਅਦਬੀ ਕੀਤੀ ਗਈ ਹੈ। ਏਸ ਲਈ ਬੇਨਤੀ ਹੈ ਕਿ ਜਾਂ ਤਾਂ ਏਸ ਕਾਰਵਾਈ ਦਾ ਜ਼ਿੰਮੇਵਾਰ ਸੱਜਣ ਸ੍ਰੀ ਅਕਾਲ ਤਖ਼ਤ ਸਾਹਿਬ ਦੇ ਹਜ਼ੂਰ ਖੁੱਲੇ ਦੀਵਾਨ ਵਿਚ ਮੁਆਫ਼ੀ ਮੰਗ ਕੇ ਇਸ ਭੁੱਲ ਦੀ ਤਲਾਫ਼ੀ ਕਰੇ ਅਤੇ ਅੱਗੇ ਨੂੰ ਐਸੀ ਭੁੱਲ ਨਾ ਹੋਣ ਦਾ ਭਰੋਸਾ ਦਿਵਾਇਆ ਜਾਵੇ, ਨਹੀਂ ਤਾਂ ਦਾਸ ਦਾ ਅਸਤੀਫਾ ਪ੍ਰਵਾਨ ਕਰਕੇ , ਦਾਸ ਨੂੰ ਇਸ ਜ਼ਿੰਮੇਵਾਰੀ ਤੋਂ ਸੁਰਖਰੂ ਕੀਤਾ ਜਾਵੇ।"

ਇਕ ਬੰਨੇ ਬਾਬਾ ਵਿਸਾਖਾ ਸਿੰਘ ਵਰਗੇ ਸਿੱਖ ਕਿਰਦਾਰ ਦੀ ਰਹਿਨੁਮਾਈ ਕਰਨ ਵਾਲੇ ਤੇ ਦੂਜੇ ਬੰਨੇ ਅੱਜ ਦੇ ਇਹ ਅਖੌਤੀ ਜੱਥੇਦਾਰ ਪੰਥ ਦੋਖੀਆਂ ਨਾਲ ਖੜ੍ਹਨ ਵਾਲੇ ਸਿੱਖਾਂ ਪੱਲੇ ਕਿਰਦਾਰ ਤੋਂ ਬਿਨਾਂ ਕੱਖ ਨਹੀਂ ਤੇ ਸੱਚੀ ਗੱਲ ਇਹੋ ਆ , ਅੱਜ ਇਹ ਹੀ ਖ਼ਤਰੇ ਵਿਚ ਹੈ। ਸਿੱਖ ਨ ਭਾਵੁਕ ਹੈ ਨ ਤਰਕਸ਼ੀਲ ,ਉਹ ਤੇ ਬਿਬੇਕੀ ਹੈ , ਪੰਥ ਦਾ ਜਿੰਨਾ ਨੁਕਸਾਨ ਤਰਕ ਕਰ ਰਿਹਾ ,ਉਤਨਾ ਹੀ ਭਾਵੁਕਤਾ ਵੀ ਕਰ ਰਹੀ ਹੈ । ਪਾਤਸ਼ਾਹ ਸਾਨੂੰ ਬਿਬੇਕਤਾ ਬਖਸ਼ੇ , ਸ਼ਬਦ ਦਾ ਓਟ ਆਸਰਾ ਮਿਲੇ!