ਸ਼੍ਰੋਮਣੀ ਕਮੇਟੀ ਦੀ ਕਾਇਮੀ ਤੋਂ ਬਾਅਦ, ਗੁਰਦੁਆਰਾ ਸੁਧਾਰ ਲਹਿਰ ਨੂੰ ਪ੍ਰਪੱਕਤਾ ਦੇਣ ਲਈ ਜੁਝਾਰੂਆਂ ਦਾ ਇਕ ਦਲ ਬਣਾਉਣ ਦੀ ਗੱਲ ਟੁਰੀ ਜੋ ਤਨੋ ਮਨੋ ਪੰਥ ਨੂੰ ਸਮਰਪਿਤ ਹੋਣ। ਇਸ ਕਾਰਜ ਲਈ ਇਕ ਅਪੀਲ ਮਾਸਟਰ ਮੋਤਾ ਸਿੰਘ ਹੁਣਾ ਨੇ 'ਪੰਚ' ਅਖ਼ਬਾਰ ਵਿਚ ਵੀ ਛਪਵਾਈ ਸੀ;-
ਗੁਰਦੁਆਰਾ ਸੇਵਕ ਦਲ
ਪੰਜ ਸਿੰਘਾਂ ਦੀ ਲੋੜ

"175 ਮੈਂਬਰ ਬਣਨ ਤੋਂ ਬਾਅਦ ਮਾਸਟਰ ਮੋਤਾ ਸਿੰਘ ਨੇ ਇਹ ਤਜਵੀਜ਼ ਕੀਤੀ ਹੈ ਕਿ ਕਮੇਟੀ ਦੇ ਨਾਲ ਇਕ ਗੁਰਦੁਆਰਾ ਸੇਵਕ ਦਲ ਬਣਾਇਆ ਜਾਏ, ਜਿਹੜਾ ਮਹੰਤਾਂ ਤੋਂ ਇੰਤਜਾਮ ਲਵੇ।ਇਹ ਕੁਲ 500 ਸਿੰਘ ਹੋਣ।ਇਨ੍ਹਾਂ ਵਿਚੋਂ 100 ਤਿਆਰ ਬਰ ਤਿਆਰ ਤਨਖ਼ਾਹਦਾਰ ਹੋਣ ਅਤੇ 400 ਰੀਜ਼ਰਵ ਹੋਣ, ਬਗ਼ੈਰ ਤਨਖ਼ਾਹ ਤੋਂ। ਜਿੱਥੇ ਹਾਲਤ ਵਿਗੜਦੀ ਹੋਈ ਦਿਸਦੀ ਹੋਵੇ, ਉਸ ਗੁਰਦੁਆਰੇ ਲਈ ਅਕਾਲ ਤਖ਼ਤ ਸਾਹਿਬ 'ਤੇ ਸੱਦ ਕੇ ਜੱਥਾ ਟੋਰ ਦਿੱਤਾ। ਇਹ ਡਿਊਟੀ ਇਕ ਕਮੇਟੀ ਲਵੇ, ਜੋ 175 ਵਿਚੋਂ 25 ਮੈਂਬਰ ਚੁਣ ਕੇ ਬਣੇ ।ਇਸ ਦਲ ਦੇ ਐਕਸ਼ਨ ਦੀ ਜ਼ਿੰਮੇਵਾਰੀ ਅਸੀਂ ਲੈਂਦੇ ਹਾਂ।"

ਪੰਜਾ ਸਾਹਿਬ ਗੁਰੂ ਘਰ ਦੀ ਸੇਵਾ ਸੰਭਾਲ, ਸੰਭਾਲਣ ਵਕਤ ਸੁਧਾਰਕਾਂ ਨੂੰ ਜੋ ਮੁਸ਼ਕਲਾਂ ਆਈਆਂ , ਉਸਤੋਂ ਸਿੱਖਿਆ ਲੈਂਦਿਆਂ ਇਕ ਪੱਕੇ ਜੱਥੇ ਦੀ ਜ਼ਰੂਰਤ ਸਮਝੀ ਗਈ, ਜਿਸ ਵਿਚ ਬੰਦੇ ਵੀ ਹੋਣ ਤੇ ਔਰਤਾਂ ਵੀ। 26 ਨਵੰਬਰ 1920 ਨੂੰ ਪੰਜਾ ਸਾਹਿਬ ਦੇ ਗੁਰਦੁਆਰੇ ਨੂੰ ਪੰਥਕ ਹੱਥਾਂ ਵਿਚ ਲੈ ਆਉਣ ਬਾਅਦ , ਭਾਰੀ ਦੀਵਾਨ ਸਜਿਆ ਸੀ । ਜਿਸ ਵਿੱਚ ਕਰਤਾਰ ਸਿੰਘ ਝੱਬਰ ਨੇ 'ਅਕਾਲੀ ਫ਼ੌਜ' ਬਣਾਉਣ ਲਈ ਸਮਰਪਿਤ ਜੁਝਾਰੂਆਂ ਨੂੰ ਨਾਮ ਦੇਣ ਲਈ ਕਿਹਾ। ਇਸੇ ਵਕਤ 50 ਸੇਵਕਾਂ ਨੇ ਨਾਮ ਦਿੱਤੇ ਤੇ ਗਿਆਨੀ ਸ਼ੇਰ ਸਿੰਘ ਹੁਣਾ ਨੇ ਇਸ ਦਲ ਲਈ ਫੰਡ ਇਕੱਠਾ ਕਰਨ ਲਈ ਅਪੀਲ ਕੀਤੀ ਤਾਂ 1000 ਰੁਪਿਆ ਨਕਦ ਤੇ 4000 ਰੁਪਿਆ ਇਕਰਾਰ ਹੋਇਆ।

ਇਹ ਜੱਥਾ ਤਿਆਰ ਕਰਨ ਲਈ 14 ਦਸੰਬਰ 1920 ਨੂੰ ਅਕਾਲ ਬੁੰਗੇ (ਤਖ਼ਤ) ਤੇ ਪੰਥਕ ਇਕੱਠ ਹੋਇਆ ।ਇਸ ਵਿਚ ਝੱਬਰ ਨੇ ਤਜਵੀਜ਼ ਦਿੱਤੀ ਕਿ "ਸਮਾਂ ਸਾਨੂੰ ਮਜਬੂਰ ਕਰ ਰਿਹਾ ਹੈ ਕਿ ਗੁਰਦੁਆਰਿਆਂ ਦਾ ਸੁਧਾਰ ਝੱਟ ਪਟ ਕੀਤਾ ਜਾਵੇ ਅਤੇ ਇਸ ਲਈ ਹਰ ਇਕ ਦੀ ਕੁਰਬਾਨੀ ਦੀ ਲੋੜ ਹੈ। ਸੋ ਇਸ ਤਰ੍ਹਾਂ ਕੀਤਾ ਜਾਵੇ ਕਿ ਅਕਾਲੀ ਦਲ ਕਾਇਮ ਕੀਤਾ ਜਾਵੇ।ਇਸਦੇ ਸੇਵਕ ਘੱਟੋ ਘੱਟ ਇਕ ਮਹੀਨਾ ਸਾਲ ਵਿਚ ਪੰਥ ਨੂੰ ਅਰਪਣ ਕਰਨ। ਕੇਂਦਰ ਅੰਮ੍ਰਿਤਸਰ ਹੋਵੇ, ਜਿਥੇ ਹਰ ਵੇਲੇ 100 ਸਿੰਘ ਹਾਜ਼ਰ ਰਹੇ ਅਤੇ ਜਿੱਥੇ ਜਿਤਨੇ ਸਿੰਘਾਂ ਦੀ ਲੋੜ ਪਵੇ ਭੇਜੇ ਜਾਣ।ਇਲਾਕਿਆਂ ਵਿਚ ਇਸ ਦੀਆਂ ਸ਼ਾਖਾਂ ਤਿਆਰ ਕੀਤੀਆਂ ਜਾਣ।" ਇਸ ਇਕੱਠ ਨੇ ਸਰਬ ਸੰਮਤੀ ਨਾਲ ਮਤਾ ਪਾਸ ਕੀਤਾ ਕਿ 23 ਜਨਵਰੀ ਨੂੰ ਸੰਗਤਾਂ ਹੁੰਮ ਹੁਮਾ ਕੇ ਅਕਾਲ ਬੁੰਗੇ (ਤਖ਼ਤ) ਪਹੁੰਚਣ। ਇਸ ਲਈ ਤੇਜਾ ਸਿੰਘ ਭੁੱਚਰ ਹੁਣਾ ਦੇ ਨਾਮ ਥੱਲੇ ਅਖ਼ਬਾਰਾਂ ਵਿਚ ਅਪੀਲ ਵੀ ਕੀਤੀ ਗਈ;-

"ਜਥੇ, ਸਭਾਵਾਂ ਤੇ ਦੀਵਾਨਾਂ ਦੇ ਸੇਵਕਾਂ ਅਤੇ ਜਥੇਦਾਰਾਂ ਅੱਗੇ ਜ਼ਰੂਰੀ ਅਰਜ਼ ਹੈ ਕਿ ਉਹ ਦਰਸ਼ਨ ਦੇਣ।ਇਕ ਦਿਨ ਪਹਿਲੋਂ ਆਵਣ ਤੇ ਹੁਣ ਤਨ ਮਨ ਧਨ ਦੀ ਕੁਰਬਾਨੀ ਕਰ ਕੇ ਜਨਮ ਸਫਲਾ ਕਰਨ।"