ਜਦੋਂ ਹਿੰਦ ਦਾ ਆਇਨ(ਸਵਿਧਾਨ) ਤਿਆਰ ਹੋ ਰਿਹਾ ਸੀ ਤਾਂ 25 ਮਈ 1949 ਈਸਵੀ ਨੂੰ ਸਰਦਾਰ ਪਟੇਲ ਨੇ ਪੱਛੜੀਆਂ ਤੇ ਅਨੁਸੂਚਿਤ ਜਾਤੀਆਂ ਨੂੰ ਮਿਲਣ ਵਾਲੀਆਂ ਸਹੂਲਤਾਂ ਬਾਬਤ ਸਪੱਸ਼ਟ ਕਰਦਿਆਂ ਕਿਹਾ, ਕਿ ਇਹ ਸਹੂਲਤਾਂ ਕੇਵਲ ਹਿੰਦੂ ਧਰਮ ਅਧੀਨ ਹੀ ਇਹਨਾਂ ਜ਼ਾਤੀਆਂ ਨੂੰ ਮਿਲਣਗੀਆਂ; ਬਾਕੀ ਕਿਸੇ ਧਰਮ ਵਿੱਚ ਇਸ ਤਰ੍ਹਾਂ ਦੀ ਵੰਡ ਨਹੀਂ। ਅਸਲ ਵਿੱਚ ਉਹ ਅਸਿੱਧੇ ਢੰਗ ਨਾਲ ਦੂਜੇ ਧਰਮਾਂ ਵਿੱਚ ਗਏ ਇਹਨਾਂ ਜਾਤੀਆਂ ਦੇ ਲੋਕਾਂ ਨੂੰ ਮੁੜ ਆਰਥਿਕ ਸਹੂਲਤਾਂ ਜਰੀਏ ਹਿੰਦੂ ਧਰਮ ਵੱਲ ਲਿਆਉਣਾ ਚਾਹੁੰਦਾ ਸੀ। ਇਸ ਗੱਲ ਦਾ ਖਮਿਆਜ਼ਾ ਸਿੱਖਾਂ ਨੂੰ ਭੁਗਤਣਾ ਵੀ ਪਿਆ। ਇਸ ਵਕਤ ਗਿਆਨੀ ਕਰਤਾਰ ਸਿੰਘ ਹੁਣੀਂ ਕੁਝ ਸਹਿਯੋਗੀਆਂ ਨਾਲ ਨਹਿਰੂ ਤੇ ਰਜਿੰਦਰ ਪ੍ਰਸ਼ਾਦ ਨੂੰ ਮਿਲੇ ਪਰ ਉਹਨਾਂ ਦੇ ਕੰਨ ਤੇ ਜੂੰ ਨਾ ਰੀਂਗੀ। ਅਖੀਰ ਅਕਾਲੀ ਦਲ ਨੇ ਅਨੰਦਪੁਰ ਸਾਹਿਬ 'ਕੱਠ ਕਰਕੇ ਇਸ ਪੱਖਪਾਤ ਵਿਰੁਧ ਮੋਰਚਾ ਖੋਲਣ ਦਾ ਐਲਾਨ ਕੀਤਾ। 70 ਦੇ ਕਰੀਬ ਐਮ.ਪੀ ਵੀ ਸਿੱਖਾਂ ਦੀ ਹੱਕੀ ਮੰਗ ਨਾਲ ਸਹਿਮਤ ਹੋਏ। ਮਾਸਟਰ ਤਾਰਾ ਸਿੰਘ ਨੇ ਜੱਥਾ ਲੈ ਕਿ ਪਿੰਡ ਪਿੰਡ ਪ੍ਰਚਾਰ ਕਰਦਿਆਂ ਦਿੱਲੀ ਗ੍ਰਿਫਤਾਰੀ ਦੇਣ ਲਈ ਵਹੀਰ ਟੋਰ ਲਈ। ਉਧਰ ਆਚਾਰੀਆ ਕ੍ਰਿਪਲਾਨੀ ਵੀ ਅਕਾਲੀ ਦਲ ਦੀ ਹਿਮਾਇਤ ਵਿੱਚ ਉਤਰ ਆਏ। ਅਖੀਰ ਗ੍ਰਹਿ ਮੰਤਰੀ ਕਾਟਜੂ ਨੇ ਐਲਾਨ ਕੀਤਾ ਕਿ ਹਿੰਦੂ ਪੱਛੜੀਆਂ ਤੇ ਅਨੁਸੂਚਿਤ ਜਾਤੀਆਂ ਨੂੰ ਮਿਲਣ ਵਾਲੀਆਂ ਸਹੂਲਤਾਂ, ਸਿੱਖਾਂ ਵਿੱਚ ਸ਼ਾਮਿਲ ਇਹਨਾਂ ਜਾਤੀਆਂ ਦੇ ਵਸਨੀਕਾਂ ਨੂੰ ਵੀ ਮਿਲਣ ਗੀਆਂ। ਅਖੀਰ ਅਕਾਲੀ ਦਲ ਨੇ ਇਸ ਜਿੱਤ ਨਾਲ 18 ਨਵੰਬਰ 1953 ਈਸਵੀ ਨੂੰ ਮੋਰਚਾ ਸਮਾਪਿਤ ਕੀਤਾ।