ਬਾਬਾ ਬੰਦਾ ਸਿੰਘ ਬਹਾਦਰ ਨੇ ਜਦ ਮੁਗਲੀਆ ਸਲਤਨਤ ਦੇ ਵੱਡੇ ਖੇਤਰ ਪੰਜਾਬ ਵਿਚ, ਇਹਨਾਂ ਦੀਆਂ ਤਲਾਵਾਂ ਢਿੱਲੀਆਂ ਕਰਕੇ, ਖਾਲਸਾਈ ਰਾਜ ਦੀ ਨੀਹ ਰੱਖੀ ਤਾਂ, ਗੁਰੂ ਗੋਬਿੰਦ ਸਿੰਘ ਦੀ ਮਦਦ ਨਾਲ ਰਾਜ ਹਾਸਲ ਕਰਨ ਵਾਲੇ ਬਹਾਦਰ ਸ਼ਾਹ ਦੀਆਂ ਅੱਖਾਂ ਹੀ ਫਿਰ ਗਈਆਂ। ਬਹਾਦਰ ਸ਼ਾਹ ਜਦੋਂ ਪੰਜਾਬ ਆਇਆ ਤਾਂ ਉਸਨੇ ਸਭ ਤੋਂ ਪਹਿਲਾਂ 10 ਦਸੰਬਰ 1710 ਈਸਵੀ ਨੂੰ ਸ਼ਾਹੀ ਫੁਰਮਾਨ ਜਾਰੀ ਕੀਤਾ ਕਿ, ਗੁਰੂ ਨਾਨਕ ਦੇ ਪੈਰੋਕਾਰ ਨੂੰ ਵੇਖਦਿਆਂ ਹੀ ਕਤਲ ਕਰ ਦਿੱਤਾ ਜਾਵੇ।

"ਨਾਨਕ ਪ੍ਰਸਤਾਂ ਰਾ ਹਰ ਜਾ ਬ ਯਾਬੰਦ ਬ ਕਤਲ ਰਸਾਨੰਦ।"

ਇਸੇ ਅਧੀਨ ਹੀ ਮੁਲਤਾਨ ਤੋਂ ਲਾਹੌਰ ਆਏ 40 ਵਣਜਾਰੇ ਸਿੱਖਾਂ ਨੂੰ ਲਾਹੌਰ ਦੀ ਕੋਤਵਾਲੀ ਵਿਚ ਸਰਬਰਾਹ ਖਾਂ ਦੇ ਸਰਪੁਰਦਗੀ ਵਿਚ ਇਸਲਾਮ ਜਾਂ ਮੌਤ ਵਿਚੋਂ ਇਕ ਚੁਣਨ ਲਈ ਕਿਹਾ ਗਿਆ ਤਾਂ ਉਹਨਾਂ ਸਾਰਿਆਂ ਨੇ ਹਸ ਕੇ ਮੌਤ ਨੂੰ ਚੁਣਿਆ। 11 ਅਕਤੂਬਰ 1711 ਨੂੰ ਬਾਦਸ਼ਾਹ ਦੇ ਹੁਕਮ ਨਾਲ ਇਹਨਾਂ ਨੂੰ ਅਲੋਵਾਲ ਪਿੰਡ ਜੋ ਲਾਹੌਰ ਪ੍ਰਗਨੇ ਵਿਚ ਹੀ ਸੀ, ਜ਼ਮੀਨ ਵਿਚ ਗੱਡ ਕੇ ਸ਼ਹੀਦ ਕੀਤਾ ਗਿਆ। ਉਹਨਾਂ ਵਿਚੋਂ ਕੁਝ ਸ਼ਹੀਦਾਂ ਦੇ ਨਾਮ ਇਹ ਹਨ :-
ਭਾਈ ਕੇਸੋ ਸਿੰਘ
ਭਾਈ ਹਰੀ ਸਿੰਘ
ਭਾਈ ਦੇਸਾ ਸਿੰਘ
(ਉਪਰੋਕਤ ਤਿੰਨੇ ਭੱਟ ਕੀਰਤ ਦੇ ਪੋਤੇ ਤੇ ਭੱਟ ਭਿੱਖਾ ਜੀ ਦੇ ਪੜਪੋਤੇ ਸਨ)
ਭਾਈ ਨਰਬਦ ਸਿੰਘ ਪੁਤਰ ਭਾਈ ਕੇਸੋ ਸਿੰਘ
ਭਾਈ ਤਾਰਾ ਸਿੰਘ ਪੁਤਰ ਭਾਈ ਹਰੀ ਸਿੰਘ
ਭਾਈ ਸੇਵਾ ਸਿੰਘ ਪੁਤਰ ਭਾਈ ਹਰੀ ਸਿੰਘ
ਭਾਈ ਦੇਵਾ ਸਿੰਘ ਪੁਤਰ ਭਾਈ ਹਰੀ ਸਿੰਘ (ਭੱਟ ਭਿੱਖਾ ਜੀ ਕਾ ਹੀ ਪਰਿਵਾਰ )
ਭਾਈ ਜੇਠਾ ਸਿੰਘ ਪੁਤਰ ਭਾਈ ਮਾਈ ਦਾਸ
ਭਾਈ ਰੂਪ ਸਿੰਘ ਪੁਤਰ ਭਾਈ ਮਾਈ ਦਾਸ
ਭਾਈ ਜੇਠਾ ਸਿੰਘ ਪੁਤਰ ਭਾਈ ਛਬੀਲ ਸਿੰਘ ਜੀ ਆਦਿ