ਗੁਰਮਤਿ ਆਸ਼ੇ ਵਿਚ ਸੇਵਾ ਨੂੰ ਮਨੁੱਖੀ ਜੀਵਨ ਦਾ ਉੱਚ ਆਦਰਸ਼ ਮੰਨਿਆ ਗਿਆ ਹੈ। ਇਸ ਉੱਚ ਆਦਰਸ਼ ਨੂੰ ਵਿਵਹਾਰਕ ਜੀਵਨ ਵਿਚ ਅਪਣਾਉਂਦਿਆਂ ਲੋੜਵੰਦਾਂ ਦੀ ਸੇਵਾ ਤੇ ਪਰਉਪਕਾਰ ਲਈ ਅੱਗੇ ਆਉਣਾ ਹਰੇਕ ਗੁਰਸਿੱਖ ਦਾ ਪਰਮ ਉਦੇਸ਼ ਹੈ। ਪੰਥ ਪ੍ਰਵਾਨਿਤ ਸਿੱਖ ਰਹਿਤ ਮਰਯਾਦਾ ਅਨੁਸਾਰ, ਸੇਵਾ ਕੇਵਲ ਪੱਖੇ, ਲੰਗਰ ਆਦਿ ’ਤੇ ਨਹੀਂ ਮੁੱਕ ਜਾਂਦੀ, ਸਿੱਖ ਦੀ ਸਾਰੀ ਜ਼ਿੰਦਗੀ ਪਰਉਪਕਾਰ ਵਾਲੀ ਹੈ। ਗੁਰੂ ਸਾਹਿਬਾਨ ਨੇ ਆਪ ਲੋੜਵੰਦਾਂ, ਨਿਆਸਰਿਆਂ, ਦੁਖਿਆਰਿਆਂ ਦੀ ਸੇਵਾ ਕਰਕੇ ਗੁਰਸਿੱਖਾਂ ਲਈ ਮਿਸਾਲ ਕਾਇਮ ਕੀਤੀ ਹੈ। ਸ੍ਰੀ ਗੁਰੂ ਨਾਨਕ ਦੇਵ ਜੀ ਅਨੁਸਾਰ ਉਹੋ ਮਨੁੱਖ ਪਰਮਾਤਮਾ ਦੇ ਦਰ ’ਤੇ ਪਰਵਾਨ ਹੁੰਦੇ ਹਨ ਜੋ ਇਸ ਜਗਤ ਵਿਚ ਵਿਚਰਦਿਆਂ ਸੇਵਾ ਦੀ ਘਾਲ ਕਮਾਈ ਕਰਦੇ ਹਨ:

ਵਿਚਿ ਦੁਨੀਆ ਸੇਵ ਕਮਾਈਐ॥ ਤਾ ਦਰਗਹ ਬੈਸਣੁ ਪਾਈਐ॥ (ਪੰਨਾ 26)

ਸੇਵਾ ਦਾ ਘੇਰਾ ਬਹੁਤ ਵਿਸ਼ਾਲ ਹੈ, ਜਿਵੇਂ ਗਰੀਬਾਂ ਬੇਰੁਜ਼ਗਾਰਾਂ ਲਈ ਰੁਜ਼ਗਾਰ ਦੇ ਸਾਧਨ ਮੁਹੱਈਆ ਕਰਾਉਣੇ, ਲੋੜਵੰਦ ਬੱਚਿਆਂ ਲਈ ਪੜਾਈ ਦੇ ਸਾਧਨ ਪੈਦਾ ਕਰਨੇ, ਅੰਗਹੀਣਾਂ, ਨਿਆਸਰਿਆਂ ਦੀ ਸਾਂਭ-ਸੰਭਾਲ ਕਰਨੀ ਆਦਿ। ਅਜਿਹੀ ਹੀ ਪ੍ਰਕਿਰਤੀ ਦੇ ਕਾਰਜ ਕਰ ਰਹੀਆਂ ਸੰਸਥਾਵਾਂ ਪਿੰਗਲਵਾੜਾ, ਸੈਂਟਰਲ ਖਾਲਸਾ ਯਤੀਮਖਾਨਾ ਸ੍ਰੀ ਅੰਮ੍ਰਿਤਸਰ ਆਦਿ ਮਨੁੱਖਤਾ ਦੀਆਂ ਸ਼ੁਭ ਅਸੀਸਾਂ ਦੀਆਂ ਭਾਗੀਦਾਰ ਹਨ।

ਹਥਲੇ ਲੇਖ ਵਿਚ ਅਸੀਂ ਅਜਿਹੀ ਹੀ ਇਕ ਸੰਸਥਾ ਬੀਬੀ ਭਾਨੀ ਕੰਨਿਆ ਨੇਤਰਹੀਣ ਵਿਿਦਆਲਾ ਬਾਰੇ ਗੱਲ ਕਰਾਂਗੇ। ਤਾਜੇ ਪਾਣੀਆਂ ਨਾਲੋਂ ਨਿਰਮਲ ਅਤੇ ਮਖਮਲ ਨਾਲੋਂ ਕੋਮਲ ਹਿਰਦਾ ਰੱਖਣ ਵਾਲੀਆਂ ਧੀਆਂ, ਧੀ, ਭੈਣ, ਪਤਨੀ, ਮਾਂ ਆਦਿ ਕਈ ਰਿਸ਼ਤਿਆਂ ਦੇ ਰੂਪ ਵਿਚ ਪਰਵਾਰ ਅਤੇ ਸਮਾਜ ਨੂੰ ਰਿਸ਼ਤਿਆਂ ਦੇ ਮੋਹ ਦੀਆਂ ਤੰਦਾਂ ਰਾਹੀਂ ਪਰੋ ਕੇ ਰੱਖਦੀਆਂ ਹਨ। ਇਹ ਆਪਣੇ ਹਰ ਰਿਸ਼ਤੇ ਦੇ ਫ਼ਰਜ਼ ਪਾਲਦੀਆਂ ਆਦਰਸ਼ਕ ਪਰਵਾਰ ਅਤੇ ਆਦਰਸ਼ਕ ਸਮਾਜ ਦੀ ਸਿਰਜਣਾ ਕਰਦੀਆਂ ਹਨ। ਪਰ ਜੇਕਰ ਅਕਾਲ ਪੁਰਖ ਦੇ ਭਾਣੇ ਵਿਚ ਜਮਾਂਦਰੂ ਜਾਂ ਬਾਅਦ ਵਿਚ ਕਿਸੇ ਬਿਮਾਰੀ ਜਾਂ ਹਾਦਸੇ ਕਾਰਨ ਕਿਸੇ ਬੇਟੀ ਦੀਆਂ ਅੱਖਾਂ ਦੀ ਜੋਤ ਸਦਾ ਲਈ ਚਲੀ ਜਾਵੇ ਤਾਂ ਉਨ੍ਹਾਂ ਦੇ ਮਾਪਿਆਂ ਉੱਪਰ ਜੋ ਬੀਤਦੀ ਹੈ ਉਸ ਨੂੰ ਉਹ ਖੁਦ ਹੀ ਜਾਣ ਸਕਦੇ ਹਨ। ਅੱਖਾਂ ਦੀ ਜੋਤ ਤੋਂ ਬਿਨਾ ਜਹਾਨ ਸੁੰਨਾ ਹੋ ਜਾਂਦਾ ਹੈ। ਸਮਾਜ ਦੀਆਂ ਅਜਿਹੀਆਂ ਨੇਤਰਹੀਣ ਬੱਚੀਆਂ ਨੂੰ ਪਰਵਾਰਾਂ ਵਰਗਾ ਮਾਹੌਲ ਦੇ ਕੇ ਉਨ੍ਹਾਂ ਦੀ ਪਰਵਰਿਸ਼ ਕਰ ਰਹੀ ਹੈ ਇਹ ਸੰਸਥਾ ਬੀਬੀ ਭਾਨੀ ਕੰਨਿਆ ਨੇਤਰਹੀਣ ਵਿਦਿਆਲਾ। ਜੋਕਿ
ਗੁਰਦੁਆਰਾ ਛੇਹਰਟਾ ਸਾਹਿਬ, (ਸ੍ਰੀ ਅੰਮ੍ਰਿਤਸਰ) ਤੋਂ ਗੁਰਦੁਆਰਾ ਸੰਨ੍ਹ ਸਾਹਿਬ ਨੂੰ ਜਾਣ ਵਾਲੀ ਸੜਕ ’ਤੇ ਮਹਿਜ਼ ਚੰਦ ਕੁ ਗਜ਼ ਦੀ ਦੂਰੀ ’ਤੇ ਸਥਿਤ ਹੈ।

ਸਥਾਪਨਾ:- ਭਾਰਤ ਨੇਤਰਹੀਣ ਸੇਵਕ ਸਮਾਜ ਰਜਿ: ਲੁਧਿਆਣਾ ਦੀ ਸ੍ਰੀ ਅੰਮ੍ਰਿਤਸਰ ਬ੍ਰਾਂਚ ਦੇ ਮੈਂਬਰ ਸਾਹਿਬਾਨ ਦੀ ਦੀਰਘ ਸੋਚ ਅਤੇ ਸ਼ਲਾਘਾਯੋਗ ਉੱਦਮ ਸਦਕਾ ਨੇਤਰਹੀਣ ਲੜਕੀਆਂ ਦੀ ਭਲਾਈ ਲਈ ਇਕ ਸੰਸਥਾ ਬਣਾਉਣ ਦਾ ਫੈਸਲਾ ਲਿਆ ਗਿਆ। ਇਸ ਮਹਾਨ ਪਰਉਪਕਾਰੀ ਕਾਰਜ ਦੀ ਅਰੰਭਤਾ 26 ਮਾਰਚ, 1986 ਈ. ਨੂੰ ਪੰਥਕ ਸ਼ਖ਼ਸੀਅਤ ਬਾਬਾ ਖੜਕ ਸਿੰਘ ਜੀ ਕਾਰ ਸੇਵਾ ਵਾਲਿਆਂ ਦੀ ਹਾਜ਼ਰੀ ਵਿਚ ਉਨ੍ਹਾਂ ਦੇ ਹੁਕਮ ਅਨੁਸਾਰ ਬਾਬਾ ਦਰਸ਼ਨ ਸਿੰਘ ਜੀ ਨੇ ਟੱਕ ਲੱਗਾ ਕੇ ਕੀਤੀ। ਇਸ ਉਪਰੰਤ 27 ਮਾਰਚ, 1987 ਈ. ਨੂੰ ਉਕਤ ਸ੍ਰੀ ਅੰਮ੍ਰਿਤਸਰ ਬ੍ਰਾਂਚ ਦੇ ਸਾਰੇ ਸੀਨੀਅਰ ਮੈਂਬਰ ਸਾਹਿਬਾਨ ਦੀ ਹਾਜ਼ਰੀ ਵਿਚ ਉਸ ਸਮੇਂ ਦੇ ਗੁਰਦੁਆਰਾ ਛੇਹਰਟਾ ਸਾਹਿਬ ਦੀ ਲੋਕਲ ਕਮੇਟੀ ਦੇ ਪ੍ਰਧਾਨ ਸ. ਗੁਰਦਿਆਲ ਸਿੰਘ ਜੀ ਨੇ ਇਮਾਰਤ ਦੀ ਉਸਾਰੀ ਦਾ ਕਾਰਜ ਅਰੰਭ ਕੀਤਾ। ਲੋੜੀਂਦੀ ਇਮਾਰਤ ਤਿਆਰ ਹੋ ਜਾਣ ’ਤੇ 26 ਮਾਰਚ, 1990 ਈ. ਨੂੰ ਸੰਕਲਪ ਅਧੀਨ ਸੰਸਥਾ ਦੀ ਸ਼ੁਰੂਆਤ ਕੀਤੀ ਗਈ। ਅਰੰਭ ਵਿਚ ਸੰਸਥਾ ਦਾ ਮਨੋਰਥ ਇਨ੍ਹਾਂ ਨੇਤਰਹੀਣ ਬੱਚੀਆਂ ਨੂੰ ਕਿਰਤ ਦੀ ਸਿਖਲਾਈ ਦੇ ਕੇ ਸ੍ਵੈ-ਨਿਰਭਰ ਬਣਾਉਣਾ ਸੀ। ਇਸ ਲਈ ਸੰਸਥਾ ਦਾ ਨਾਮ ਬੀਬੀ ਭਾਨੀ ਇਸਤਰੀ ਨੇਤਰਹੀਣ ਕਿਰਤ ਅਤੇ ਸਿਖਲਾਈ ਕੇਂਦਰ ਰੱਖਿਆ ਗਿਆ ਸੀ ਪਰ ਹੁਣ ਕੁਝ ਸਮੇਂ ਤੋਂ ਇਹ ਨਾਮ ਬਦਲ ਕੇ ਬੀਬੀ ਭਾਨੀ ਕੰਨਿਆ ਨੇਤਰਹੀਣ ਵਿਦਿਆਲਾ ਰੱਖਿਆ ਗਿਆ ਹੈ।

ਬੀਬੀ ਭਾਨੀ ਜੀ ਸਿੱਖ ਜਗਤ ਦੀ ਬਹੁਤ ਹੀ ਸਤਿਕਾਰਯੋਗ ਹਸਤੀ ਹਨ ਜਿਨ੍ਹਾਂ ਨੂੰ ਗੁਰੂ ਪੁੱਤਰੀ, ਗੁਰੂ ਪਤਨੀ, ਗੁਰੂ ਮਾਤਾ, ਗੁਰੂ ਦਾਦੀ, ਗੁਰੂ ਪੜਦਾਦੀ ਅਤੇ ਗੁਰੂ ਨਕੜਦਾਦੀ ਹੋਣ ਦਾ ਮਾਣ ਹਾਸਲ ਹੈ। ਸੇਵਾ, ਸਿਮਰਨ, ਨਿਮਰਤਾ, ਮਿਲਣ ਸਾਰ ਅਤੇ ਨਿੱਘੇ ਸੁਭਾਅ ਦੇ ਮਾਲਕ ਬੀਬੀ ਭਾਨੀ ਜੀ ਨੇ ਆਪਣੇ ਜੀਵਨ ਕਾਲ ਵਿਚ ਬਿਖੜੇ ਸਮੇਂ ਵੀ ਵੇਖੇ ਪਰ ਉਹ ਹਮੇਸ਼ਾਂ ਪਰਮੇਸ਼ਰ ਦੇ ਭਾਣੇ ਅਤੇ ਸ਼ੁਕਰਾਨੇ ਵਿਚ ਰਹੇ। ਬੀਬੀ ਜੀ ਦੇ ਅਜਿਹੇ ਹੀ ਉੱਚੇ ਆਦਰਸ਼ਾਂ ਨੂੰ ਨਮਸਕਾਰ ਕਰਦਿਆਂ ਇਨ੍ਹਾਂ ਨੇਤਰਹੀਣ ਬੱਚੀਆਂ ਨੂੰ ਬੀਬੀ ਭਾਨੀ ਜੀ ਦੇ ਜੀਵਨ ਤੋਂ ਪੇ੍ਰਰਨਾ ਲੈ ਕੇ ਅਕਾਲ ਪੁਰਖ ਦੇ ਭਾਣੇ ਵਿਚ ਧੀਰਜ ਅਤੇ ਸਾਹਸ ਨਾਲ ਜ਼ਿੰਦਗੀ ਦਾ ਸਾਹਮਣਾ ਕਰਨ ਲਈ ਨਿਰੰਤਰ ਪੇ੍ਰਨਾ ਦੇਣ ਖਾਤਰ ਪ੍ਰਬੰਧਕਾਂ ਵੱਲੋਂ ਇਸ ਸੰਸਥਾ ਦਾ ਨਾਮ ਬੀਬੀ ਭਾਨੀ ਜੀ ਦੇ ਨਾਮ ਉੱਪਰ ਰੱਖਣ ਦਾ ਲਿਆ ਗਿਆ ਫੈਸਲਾ ਸਲਾਹੁਣ ਯੋਗ ਹੈ।

ਇਸ ਇਮਾਰਤ ਦੀ ਉਸਾਰੀ ਵਿਚ ਬੀਬੀ ਪ੍ਰੀਤ ਕੌਰ ਜੀ ਅਤੇ ਸ. ਪੇ੍ਮ ਸਿੰਘ ਜੀ ਦਾ ਵਿਸ਼ੇਸ਼ ਯੋਗਦਾਨ ਰਿਹਾ ਹੈ। ਇਸ ਤੋਂ ਇਲਾਵਾ ਸਮੇਂ ਸਮੇਂ ਸਿਰ ਇਸ ਸ਼ੁਭ ਕਾਰਜ ਵਿਚ ਸਹਿਯੋਗ ਦੇਣ ਵਾਲੇ ਸੂਬੇਦਾਰ ਮੇਜਰ ਗੁਰਚਰਨ ਸਿੰਘ, ਸ. ਰਾਜਨਬੀਰ ਸਿੰਘ, ਸ੍ਰੀ ਕਪਿਲ ਜੀ, ਸ. ਕੁਲਜੀਤ ਸਿੰਘ ਜੀ ਯੂ. ਐਸ. ਏ., ਭਾਈ ਬਲਦੇਵ ਸਿੰਘ ਜੀ, ਸ੍ਰੀ ਅਕਸ਼ੇ ਕੁਮਾਰ ਜੀ ਆਦਿ ਦਾਨੀ ਸੱਜਣਾਂ ਦੇ ਨਾਮ ਵੀ ਵਿਸ਼ੇਸ਼ ਵਰਣਨ ਯੋਗ ਹਨ।

ਇਕ ਗੱਲ ਇੱਥੇ ਵਿਸ਼ੇਸ਼ ਵਰਣਨਯੋਗ ਹੈ ਅਤੇ ਸਾਡੇ ਸਾਰਿਆਂ ਲਈ ਬਹੁਤ ਹੀ ਪ੍ਰੇਰਨਾ-ਸਰੋਤ ਅਤੇ ਮਾਣ ਕਰਨ ਵਾਲੀ ਹੈ ਕਿ ਇਸ ਸੰਸਥਾ ਦੇ ਸਾਰੇ ਕਰਤੇ ਧਰਤੇ ਪਤਵੰਤੇ ਸੱਜਣ ਆਪ ਵੀ ਨੇਤਰਹੀਣ ਹਨ। ਜਿਨ੍ਹਾਂ ਵਿਚ ਪੰਥ ਦੇ ਸਤਿਕਾਰਯੋਗ ਭਾਈ ਗੁਰਮੇਜ ਸਿੰਘ ਜੀ ਸਾਬਕਾ ਹਜ਼ੂਰੀ ਰਾਗੀ ਸ੍ਰੀ ਦਰਬਾਰ ਸਾਹਿਬ, ਮਾਸਟਰ ਮਹਿੰਗਾ ਸਿੰਘ ਜੀ, ਭਾਈ ਦਰਸ਼ਨ ਸਿੰਘ, ਮਾਸਟਰ ਰਤਨ ਚੰਦ ਕੇਸਰ, ਪ੍ਰਿੰਸੀਪਲ ਗੁਰਜੰਟ ਸਿੰਘ ਐਮ. ਏ. ਨੈਸ਼ਨਲ ਅਵਾਰਡੀ, ਮਾਸਟਰ ਭੋਲਾ ਨਾਥ, ਮਾਸਟਰ ਮਨਜੀਤ ਸਿੰਘ, ਸ. ਸੇਵਾ ਸਿੰਘ, ਭਾਈ ਕਰਨੈਲ ਸਿੰਘ ਰਾਗੀ, ਭਾਈ ਅਮਰੀਕ ਸਿੰਘ ਰਾਗੀ, ਸ੍ਰੀ ਰਾਜਪਾਲ ਮਹਿੰਦਰੂ, ਭਾਈ ਜੋਗਿੰਦਰ ਸਿੰਘ ਜੀ ਸਾਬਕਾ ਹਜ਼ੂਰੀ ਰਾਗੀ ਸ੍ਰੀ ਦਰਬਾਰ ਸਾਹਿਬ, ਮਾਸਟਰ ਸਕੱਤਰ ਸਿੰਘ, ਭਾਈ ਲਸ਼ਕਰ ਸਿੰਘ ਰਾਗੀ ਆਦਿ ਨਾਮ ਵਰਣਨਯੋਗ ਹਨ। ਜਿੱਥੇ ਅੱਜ ਨਿੱਜ-ਪ੍ਰਸਤੀ ਅਤੇ ਪਦਾਰਥਵਾਦੀ ਯੁੱਗ ਵਿਚ ਕਿਸੇ ਨੂੰ ਆਪਣੇ ਪਰਵਾਰ ਤੋਂ ਫੁਰਸਤ ਨਹੀਂ, ਉੱਥੇ ਉੱਕਤ ਸੱਜਣ ਆਪ ਨੇਤਰਹੀਣ ਹੋਣ ਦੇ ਬਾਵਜੂਦ ਆਪਣੇ ਪਰਵਾਰਾਂ ਦੀ ਪਰਵਰਿਸ਼ ਦੇ ਨਾਲ ਨੇਤਰਹੀਣ ਬੱਚੀਆਂ ਦੀ ਇਸ ਸੰਸਥਾ ਨੂੰ ਆਪਣੇ ਘਰ-ਪਰਵਾਰ ਨਾਲੋਂ ਵੱਧ ਅਹਿਮੀਅਤ ਦੇ ਕੇ ਇਸ ਮਾਨਵਵਾਦੀ ਸੇਵਾ ਨੂੰ ਨਿਭਾਉਂਦੇ ਰਹੇ ਹਨ ਅਤੇ ਨਿਭਾ ਰਹੇ ਹਨ। ਇਹ ਬੇਹੱਦ ਸ਼ਲਾਘਾਯੋਗ ਉੱਦਮ ਹੈ। ਇਹ ਸਭ ਗੁਰੂ ਪਾਤਸ਼ਾਹ ਦੀ ਇਨ੍ਹਾਂ ਉੱਪਰ ਵਿਸ਼ੇਸ਼ ਬਖ਼ਸ਼ਿਸ਼ ਦਾ ਸਦਕਾ ਹੀ ਹੈ। ਮੌਜੂਦਾ ਸਮੇਂ ਪ੍ਰਧਾਨ ਸ. ਮਨਜੀਤ ਸਿੰਘ ਜੀ ਪ੍ਰਿੰਸੀਪਲ ਸੂਰਮਾ ਸਿੰਘ ਆਸ਼ਰਮ ਸ੍ਰੀ ਅੰਮ੍ਰਿਤਸਰ, ਕੇਂਦਰੀ ਪ੍ਰਧਾਨ ਸ. ਦਵਿੰਦਰ ਸਿੰਘ ਸੰਗੋਵਾਲ। ਜਨਰਲ ਸਕੱਤਰ ਸ੍ਰੀ ਧਰਮ ਪਾਲ ਜੀ ਪ੍ਰੋ. ਸਰੂਪ ਰਾਣੀ ਕਾਲਜ ਸ੍ਰੀ ਅੰਮ੍ਰਿਤਸਰ, ਕੇਂਦਰੀ ਜਨਰਲ ਸਕੱਤਰ ਸ੍ਰੀ ਘਣਸ਼ਾਮ ਜੀ ਅਤੇ ਮੁੱਖ ਪ੍ਰਬੰਧਕ ਮਾਸਟਰ ਸਕੱਤਰ ਸਿੰਘ ਜੀ ਇਸ ਸੇਵਾ ਨੂੰ 21 ਮੈਂਬਰੀ ਕਾਰਜਕਾਰੀ ਕਮੇਟੀ (7 ਮੈਂਬਰ ਮੰਤਰੀ ਮੰਡਲ ਅਤੇ 14 ਹੋਰ ਮੈਂਬਰ) ਦੇ ਸਹਿਯੋਗ ਸਦਕਾ ਬੜੀ ਸੁਹਿਰਦਤਾ ਨਾਲ ਨਿਭਾ ਰਹੇ ਹਨ। ਇਨ੍ਹਾਂ ਮੈਂਬਰ ਸਾਹਿਬਾਨ ਵਿਚ ਮਾਸਟਰ ਬਲਵਿੰਦਰ ਸਿੰਘ ਪੱਟੀ, ਉਸਤਾਦ ਰੂਹਤਾਸ਼ ਬਾਲੀ, ਪ੍ਰੋ. ਰਜੇਸ਼ ਸ਼ਰਮਾ, ਭਾਈ ਲਛਮਣ ਸਿੰਘ, ਰਾਗੀ ਸੁਖਵੰਤ ਸਿੰਘ ਆਦਿ ਨਾਮ ਵਿਸ਼ੇਸ਼ ਵਰਣਨ ਯੋਗ ਹਨ।

ਸੀਮਿਤ ਸਾਧਨਾਂ ਦੇ ਬਾਵਜੂਦ ਇਨ੍ਹਾਂ ਸੱਜਣਾਂ ਦੇ ਉੱਦਮ ਅਤੇ ਦਾਨੀ ਸਜਣਾਂ ਦੇ ਸਹਿਯੋਗ ਸਦਕਾ ਅੱਜ ਲੱਗਭਗ 22 ਮਰਲੇ ਜਗ੍ਹਾ ਦੇ ਅੰਦਰ 22 ਕਮਰਿਆਂ ਵਾਲੀ ਦੋ ਮੰਜ਼ਿਲਾਂ ਇਮਾਰਤ ਵਿਚ ਇਹ ਨੇਤਰਹੀਣ ਵਿਿਦਆਲਾ ਚੱਲ ਰਿਹਾ ਹੈ। ਇਸ ਸਮੇਂ 18 ਨੇਤਰਹੀਣ ਬੱਚੀਆਂ ਇਸ ਵਿਿਦਆਲੇ ਵਿਚ ਪਰਵਰਿਸ਼ ਅਤੇ ਵਿੱਦਿਆ ਹਾਸਲ ਕਰ ਰਹੀਆਂ ਹਨ। 2017 ਵਿਚ ਇਸ ਵਿਦਿਆਲੇ ਦੀਆਂ 6 ਬੱਚੀਆਂ ਦੀ ਬਤੌਰ ਸੰਗੀਤ ਅਧਿਆਪਕ ਵੱਖ-ਵੱਖ ਸਕੂਲਾਂ ਵਿਚ ਸਰਕਾਰੀ ਨੌਕਰੀ ਵਜੋਂ ਨਿਯੁਕਤੀ ਹੋਈ ਹੈ। ਬੱਚੀਆਂ ਨੂੰ ਬੇ੍ਰਲ ਪ੍ਰਣਾਲੀ ਰਾਹੀਂ ਬਾਰਵੀਂ (+2) ਤਕ ਪੜ੍ਹਾਈ ਕਰਵਾਈ ਜਾਂਦੀ ਹੈ। ਹੋਣਹਾਰ ਬੱਚੀਆਂ ਲਈ ਯੂਨੀਵਰਸਿਟੀ ਪੱਧਰ ਤਕ ਪੜ੍ਹਾਈ ਦਾ ਪ੍ਰਬੰਧ ਸੰਸਥਾ ਦੁਆਰਾ ਕੀਤਾ ਜਾਂਦਾ ਹੈ। ਇਸ ਦੇ ਨਾਲ ਕੰਪਿਊਟਰ, ਸੰਗੀਤ ਗਾਇਨ ਤੇ ਸੰਗੀਤ ਵਾਦਨ ਦੀ ਵੀ ਡਿਗਰੀ ਪੱਧਰ ਦੀ ਸਿਖਲਾਈ ਦਿੱਤੀ ਜਾਂਦੀ ਹੈ। ਪੜ੍ਹਾਈ, ਸਿਖਲਾਈ, ਲੰਗਰ ਅਤੇ ਹੋਸਟਲ ਦਾ ਸਾਰਾ ਖਰਚ ਸੰਸਥਾ ਦੁਆਰਾ ਕੀਤਾ ਜਾਂਦਾ ਹੈ। ਬੱਚੀਆਂ ਦੀ ਸੇਵਾ-ਸੰਭਾਲ ਲਈ ਇਸਤਰੀ ਅਮਲਾ ਰੱਖਿਆ ਗਿਆ ਹੈ, ਜਿਸ ਵਿਚ ਇਕ ਸੁਪਿਰਿਟੈਂਡੈਂਟ, ਇਕ ਹੋਸਟਲ ਵਾਰਡਨ, ਲਾਂਗਰੀ ਬੀਬੀਆਂ ਆਦਿ ਸ਼ਾਮਲ ਹਨ। ਸੰਸਥਾ ਦੁਆਰਾ ਹੋਸਟਲ ਵਿਚ ਬੱਚੀਆਂ ਨੂੰ ਹਰ ਪ੍ਰਕਾਰ ਦੀ ਸਹੂਲਤ ਮੁਹੱਈਆ ਕਰਵਾਉਣ ਦਾ ਪੂਰਾ ਯਤਨ ਕੀਤਾ ਜਾਂਦਾ ਹੈ। ਬਿਜਲੀ ਦੀ ਸਹੂਲਤ ਲਈ ਇਕ ਵੱਡਾ ਜਨਰੇਟਰ, ਸਰਦੀਆਂ ਵਿਚ ਗਰਮ ਪਾਣੀ ਲਈ ਗੀਜ਼ਰ ਆਦਿ ਦਾ ਪ੍ਰਬੰਧ ਕੀਤਾ ਗਿਆ ਹੈ। ਇਸ ਵਿਦਿਆਲੇ ਦੀ ਇਕ ਵਿਸ਼ੇਸ਼ ਖਾਸੀਅਤ ਇਹ ਹੈ ਕਿ ਇੱਥੇ ਨੇਤਰਹੀਣ ਬੱਚੀਆਂ ਦੀ ਪੜ੍ਹਾਈ-ਲਿਖਾਈ ਦੇ ਨਾਲ ਨਾਲ ਉਨ੍ਹਾਂ ਦੀ ਪਰਵਰਿਸ਼ ਕਰ ਕੇ ਇਸ ਤਰ੍ਹਾਂ ਦੀ ਘਾੜਤ ਘੜੀ ਜਾਂਦੀ ਹੈ ਕਿ ਉਹ ਜ਼ਿੰਦਗੀ ਵਿਚ ਘਰੇਲੂ ਕੰਮਕਾਰ ਵਿਚ ਵੀ ਕਿਸੇ ਦੀਆਂ ਮੁਹਥਾਜ਼ ਨਾ ਰਹਿ ਕੇ ਭਵਿੱਖ ਵਿਚ ਆਪ ਆਪਣਾ ਪਰਵਾਰ ਸਾਂਭਣ ਦੇ ਸਮਰਥ ਹੋ ਸਕਣ। ਇਸ ਮੰਤਵ ਲਈ ਬੱਚੀਆਂ ਨੂੰ ਆਪਣੇ ਕਮਰੇ ਦੀ ਸਾਫ-ਸਫਾਈ ਕਰਨ ਅਤੇ ਰਸੋਈ ਦਾ ਕੰਮ ਕਰਨ ਦੀ ਵਿਸ਼ੇਸ਼ ਰੂਪ ਵਿਚ ਟਰੇਨਿੰਗ ਦਿੱਤੀ ਜਾਂਦੀ ਹੈ।

ਹੁਣ ਤਕ 150 ਦੇ ਕਰੀਬ ਨੇਤਰਹੀਣ ਲੜਕੀਆਂ ਇਸ ਵਿਦਿਆਲੇ ਵਿੱਚੋਂ ਸਿੱਖਿਆ ਪ੍ਰਾਪਤ ਕਰ ਕੇ ਜਾ ਚੁੱਕੀਆਂ ਹਨ, ਜਿਨ੍ਹਾਂ ਵਿੱਚੋਂ ਕਈ ਲੜਕੀਆਂ ਨੌਕਰੀਆਂ ਕਰ ਰਹੀਆਂ ਹਨ ਅਤੇ ਅਨੰਦ ਕਾਰਜ ਕਰਵਾ ਕੇ ਗ੍ਰਹਿਸਥ ਜੀਵਨ ਬਿਤਾ ਰਹੀਆਂ ਹਨ।

ਇਸ ਸਸੰ ਥਾ ਦੇ ਬੇਨਤੀ ਕਰਨ ’ਤੇ ਸ਼ਮ੍ਰੋ ਣੀ ਗੁਰਦੁਆਰਾ ਪ੍ਰਬਧੰ ਕ ਕਮੇਟੀ, ਸ੍ਰੀ ਅੰਮਿਤ੍ਰ ਸਰ ਨੇ ਪੜਤਾਲ ਕਰਨ ਉਪਰਤੰ ਇਸ ਵਿਦਿਆਲੇ ਨੂੰ ਹਰ ਮਹੀਨੇ 25000/-ਰੁਪਏ ਦੀ ਮਾਇਕ ਸਹਾਇਤਾ ਦੇਣੀ ਸ਼ੁਰੂ ਕੀਤੀ ਹੈ, ਜਿਸ ਲਈ ਇਹ ਸੰਸਥਾ ਪ੍ਰੋ. ਕਿਰਪਾਲ ਸਿੰਘ ਬਡੂੰਗਰ, ਪ੍ਰਧਾਨ ਸ਼ੋ੍ਰਮਣੀ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਅਤੇ ਡਾ. ਰੂਪ ਸਿੰਘ, ਸਕੱਤਰ ਸ਼ੋ੍ਰਮਣੀ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਦਾ ਧੰਨਵਾਦ ਕਰਦੀ ਹੈ। ਹੋਰ ਵੀ ਸਮਾਜ ਭਲਾਈ ਸੰਸਥਾਵਾਂ ਵੱਲੋਂ ਅਜਿਹੇ ਸ਼ਲਾਘਾਯੋਗ ਕਾਰਜ ਕੀਤੇ ਜਾਣੇ ਚਾਹੀਦੇ ਹਨ। ਸੰਸਥਾ ਦੇ ਪ੍ਰਬੰਧਕਾਂ ਦੀ ਸਮੂਹ ਸੰਗਤ ਨੂੰ ਬੇਨਤੀ ਹੈ ਕਿ ਜਿੱਥੇ ਕਿਤੇ ਵੀ ਕਿਸੇ ਨੇਤਰਹੀਣ ਬੱਚੀ ਦੀ ਦਸ ਪਵੇ, ਉਹ ਉਸ ਬੱਚੀ ਦੇ ਭਵਿੱਖ ਨੂੰ ਸਵਾਰਨ ਲਈ ਇਸ ਸੰਸਥਾ ਵਿਚ ਦਾਖ਼ਲ ਕਰਵਾਉਣ।

ਪਰਮਾਤਮਾ ਅੱਗੇ ਸਾਡੀ ਅਰਦਾਸ ਹੈ ਕਿ ਉਹ ਇਸ ਸੰਸਥਾ ਦੀਆਂ ਸਮੂਹ ਬੱਚੀਆਂ, ਅਧਿਆਪਕਾਂ ਅਤੇ ਪ੍ਰਬੰਧਕਾਂ ਦੇ ਸਿਰ ਉੱਪਰ ਆਪਣਾ ਮਿਹਰ ਭਰਿਆ ਹੱਥ ਰੱਖਣ ਅਤੇ ਤੰਦਰੁਸਤੀਆਂ ਬਖ਼ਸ਼ ਕੇ ਪ੍ਰਬੰਧਕਾਂ ਪਾਸੋਂ ਆਪ ਇਹ ਸੇਵਾ ਲੈਂਦੇ ਰਹਿਣ।