"ਇਕ ਥਾਂ ਤੇ ਅੰਮ੍ਰਿਤਸਰ ਤਹਿਸੀਲ ਵਿਚ ਕਾਂਗਰਸੀ ਨੂੰ ਹਰਾ ਕੇ ਸਰਦਾਰ ਬਹਾਦਰ ਵਸਾਖਾ ਸਿੰਘ ਕਾਮਯਾਬ ਹੋ ਗਏ। ਪਿਛੋਂ ਚੋਣ ਪਟੀਸ਼ਨ ਵਿੱਚ ਉਨ੍ਹਾਂ ਦੀ ਚੋਣ ਰੱਦ ਹੋ ਗਈ ਤੇ ਜ਼ਿਮਨੀ ਚੋਣ ਹੋਣੀ ਸੀ। ਇਹ ਉਹ ਵੇਲਾ ਸੀ ਜਦੋਂ ਅਸਾਂ (ਅਕਾਲੀਆਂ) ਨੇ ਇਹ ਫ਼ੈਸਲਾ ਕਰ ਦਿੱਤਾ ਕਿ ਟਿਕਟ ਕਾਂਗਰਸ ਦੀ ਹੀ ਚਲੇਗੀ।ਕਾਂਗਰਸ ਪਾਸ ਨਾਵਾਂ ਦੀ ਸਿਫ਼ਾਰਸ਼ ਭੇਜਣੀ ਸੀ। ਅਕਾਲੀ ਪਾਰਟੀ ਨੇ ਈਸ਼ਰ ਸਿੰਘ ਮਝੈਲ ਦਾ ਨਾਮ ਭੇਜਿਆ। ਬਾਬਿਆਂ ਨੇ ਸੰਤਾਂ ਸਿੰਘ ਸੁਲਤਾਨਵਿੰਡ ਦਾ। ਸੰਤਾ ਸਿੰਘ ਗੰਡੀਵਿੰਡ ਦੇ ਨਾਮ ਦੀ ਵੀ ਚਰਚਾ ਹੋਈ। ਡਾਕਟਰ ਸਤਪਾਲ ਇਕੱਲੇ ਹੀ ਪੰਜਾਬ ਕਾਂਗਰਸ ਦੇ ਕਰਤਾ ਧਰਤਾ ਸਨ, ਉਨ੍ਹਾਂ ਨੇ ਟਿਕਟ ਸਰਦਾਰ ਕਿਸ਼ਨ ਸਿੰਘ (ਭਗਤ ਸਿੰਘ ਸ਼ਹੀਦ ਦੇ ਪਿਤਾ) ਨੂੰ ਦੇ ਦਿੱਤੀ। ਮਾਸਟਰ ਤਾਰਾ ਸਿੰਘ ਹੁਣੀਂ ਕਹਿਣ ਲੱਗੇ ਵੇਖ ਲਓ ਆਪਣੀ ਟਿਕਟਾਂ ਦੀ ਬਾਰੀ ਬੰਦ ਕਰਨ ਦਾ ਪਹਿਲਾ ਨਤੀਜਾ। ਮਾਸਟਰ ਤਾਰਾ ਸਿੰਘ ਹੋਰਾਂ ਦੀ ਮਰਜ਼ੀ ਤਾਂ ਇਹ ਸੀ ਕਿ ਪੁਰਾਣੀ ਰਵਾਇਤ ਕਾਇਮ ਰਹੇ, ਜਿਸ ਤਰ੍ਹਾਂ ਅੱਗੇ ਚਲਿਆ ਆਉਂਦਾ ਹੈ, ਕਾਂਗਰਸ ਉਸੇ ਉਮੀਦਵਾਰ ਦੀ ਮਦਦ ਕਰਦੀ ਜਿਸ ਨੂੰ ਅਕਾਲੀ ਪਾਰਟੀ ਚਾਹੁੰਦੀ ਹੈ, ਉਹ ਯੋਗ ਵੀ ਹੈ ਤੇ ਇਲਾਕੇ ਦਾ ਸਹੀ ਪ੍ਰਤੀਨਿਧ ਵੀ ਹੈ। ਸਰਦਾਰ ਕਿਸ਼ਨ ਸਿੰਘ ਹੋਰੀਂ ਇਲਾਕੇ ਦੇ ਵੀ ਨਹੀਂ ਤੇ ਸਿੱਖਾਂ ਦੇ ਪ੍ਰਤੀਨਿਧ ਵੀ ਉਹ ਨਹੀਂ ਹੋ ਸਕਦੇ।ਇਹ ਸੀਟ ਸਿੱਖਾਂ ਲਈ ਰਿਜ਼ਰਵ ਹੈ। ਸਰਦਾਰ ਕਿਸ਼ਨ ਸਿੰਘ ਹੋਰਾਂ ਦੇ ਮੁਕਾਬਲੇ ਤੇ ਉਮੀਦਵਾਰ ਤਾਂ ਕੋਈ ਖੜਾ ਨਾ ਕੀਤਾ, ਪਰ ਨਾਰਾਜ਼ਗੀ ਮਾਸਟਰ ਜੀ ਦੇ ਦਿਲ ਵਿੱਚ ਬੈਠ ਗਈ। ਉਨ੍ਹਾਂ ਦਿਨਾਂ ਵਿਚ ਸ਼ਾਹਕੋਟ ਦੇ ਇਕ ਸਰਦਾਰ ਰਾਜਿੰਦਰ ਸਿੰਘ ਜਿਥੇ ਵੀ ਕੋਈ ਹਲਕਾ ਖਾਲੀ ਹੋਵੇ ਆਪਣੀ ਅਰਜ਼ੀ ਦੇ ਦਿੰਦੇ ਸਨ।ਇਥੇ ਵੀ ਦੇ ਦਿੱਤੀ, ਇਸ ਲਈ ਚੋਣ ਬਿਨਾ ਮੁਕਾਬਲਾ ਨਾ ਹੋ ਸਕੀ। ਇਲਾਕੇ ਵਿੱਚ ਰੋਲਾ ਵੀ ਪੈ ਗਿਆ ਕਿ 'ਸਰਦਾਰ ਕਿਸ਼ਨ ਸਿੰਘ ਸਿੱਖਾਂ ਦੇ ਪ੍ਰਤੀਨਿਧ ਨਹੀਂ ਹਨ, ਭਾਵ ਸਿੱਖ ਨਹੀਂ ਹਨ।ਇਸ ਗੱਲ ਦੇ ਸਬੂਤ ਵਜੋਂ ਕੁਝ ਇਸ਼ਤਿਹਾਰਾਂ ਅੰਦਰ ਆਰੀਆ ਸਮਾਜ ਅਖ਼ਬਾਰਾਂ ਵਿਚੋਂ ਹਵਾਲੇ ਕੱਢ ਕੇ ਦਿੱਤੇ ਗਏ ਜੋ ਉਨ੍ਹਾਂ ਨੇ ਭਗਤ ਸਿੰਘ ਦੀ ਸ਼ਹੀਦੀ ਤੇ ਉਸਨੂੰ ਆਰੀਆ ਸਮਾਜ ਦਾ ਨੌਨਿਹਾਲ ਕਿਹਾ ਸੀ।' ਗੱਲ ਵੱਧ ਗਈ। ਸਰਦਾਰ ਕਿਸ਼ਨ ਸਿੰਘ , ਲਾਲਾ ਕਿਦਾਰ ਨਾਥ ਸਹਿਗਲ , ਤੀਸਰੇ ਸ਼ਾਇਦ ਮਹਿਤਾ ਨੰਦ ਕਿਸ਼ੋਰ ਨਾਲ ਸਨ, ਤਿੰਨੇ ਮੇਰੇ ਮਕਾਨ ਤੇ ਆਏ। ਸਹਿਗਲ ਨੇ ਮੈਨੂੰ (ਮੁਸਾਫ਼ਿਰ) ਨੂੰ ਕਿਹਾ ਸਰਦਾਰ ਕਿਸ਼ਨ ਸਿੰਘ ਨੇ ਅੰਮ੍ਰਿਤ ਛਕਣਾ ਹੈ, ਤੂੰ ਸਾਡੇ ਨਾਲ ਚੱਲ ਤੇ ਹੁਣੇ ਪ੍ਰਬੰਧ ਕਰਨਾ ਹੈ।ਨਾਲ ਹੀ ਆਖ ਦਿੱਤਾ ਕਿ ਅੰਮ੍ਰਿਤ ਤਾਂ ਇਨ੍ਹਾਂ ਅੱਗੇ ਵੀ ਛਕਿਆ ਹੋਇਆ ਹੈ, ਪਰ ਉਹ ਪਿੰਡ ਵਿੱਚ ਛਕਿਆ ਸੀ। ਮੈਂ ਹੱਸ ਕੇ ਕਿਹਾ ਉਹ ਕਾਫੀ ਹੈ। ਸ਼ਹਿਰ ਤੇ ਪਿੰਡ ਦਾ ਇਕੋ ਹੀ ਅੰਮ੍ਰਿਤ ਹੁੰਦਾ ਹੈ। ਮੈਂ ਉਸ ਵੇਲੇ ਸ਼੍ਰੋਮਣੀ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਦਾ ਸਕੱਤ੍ਰ ਤੇ ਜ਼ਰੂਰ ਸਾਂ ਤੇ ਅਕਾਲ ਤਖ਼ਤ ਦੀ ਜੱਥੇਦਾਰੀ ਸ਼ਾਇਦ ਛੱਡ ਦਿੱਤੀ ਸੀ। ਜੱਥੇਦਾਰ ਮੋਹਨ ਸਿੰਘ ਗੁਰੂ ਰਾਮਦਾਸ ਹਸਪਤਾਲ ਵਿੱਚ ਬਿਮਾਰ ਪਿਆ ਸੀ। ਮੈਂ ਉਨ੍ਹਾਂ ਨਾਲ ਉਸ ਪਾਸ ਗਿਆ, ਉਸਨੇ ਵੀ ਇਹੋ ਜਵਾਬ ਦਿੱਤਾ ਕਿ ਦੋਬਾਰਾ ਅੰਮ੍ਰਿਤ ਛਕਣ ਦੀ ਜ਼ਰੂਰਤ ਨਹੀਂ। ਮੇਰੇ ਕਹਿਣ ਤੇ ਉਨ੍ਹਾਂ ਚੋਣ ਜਲਸਾ ਪਹਿਲਾ ਸੁਲਤਾਨਵਿੰਡ ਰਖਿਆ। ਡਾਕਟਰ ਸਤਪਾਲ ਆਪ ਜਲਸੇ ਵਿਚ ਆਏ। ਮੈਂ(ਮੁਸਾਫ਼ਿਰ) ਲੋਕਾਂ ਨੂੰ ਯਕੀਨ ਦੁਆਇਆ। ਸਰਦਾਰ ਕਿਸ਼ਨ ਸਿੰਘ ਵੀ ਸ਼ਾਇਦ ਬੋਲੇ। ਰਸਤਾ ਸਾਫ਼ ਹੋ ਗਿਆ। 'ਸਰਦਾਰ ਕਿਸ਼ਨ ਸਿੰਘ ਕਾਮਯਾਬ ਹੋ ਗਏ', ਪਰ ਮਾਸਟਰ ਤਾਰਾ ਸਿੰਘ ਨੇ ਕਿਹਾ ਡਾਕਟਰ ਸਤਪਾਲ ਵਰਗੇ ਕਾਂਗਰਸੀਆਂ ਨਾਲ ਮੇਰਾ ਚੱਲਣਾ ਮੁਸ਼ਕਿਲ ਹੈ।"

*ਉਪਰੋਕਤ ਲਿਖ਼ਤ ਗਿਆਨੀ ਗੁਰਮੁਖ ਸਿੰਘ ਮੁਸਾਫ਼ਿਰ ਹੁਣਾਂ ਦੀ ਸਵੈ ਜੀਵਨੀ "ਧੂੜ ਧੂੜ ਪੈਂਡਾ" ਵਿਚੋਂ ਲਈ ਗਈ ਹੈ। ਇਸ ਲਿਖਤ ਨੂੰ ਪੜ੍ਹ ਕੇ ਜਿੱਥੇ ਮਾਸਟਰ ਜੀ ਦੀ ਪੰਥ ਪ੍ਰਸਤੀ ਅੱਗੇ ਬੰਦਾ ਬਲਿਹਾਰ ਜਾਂਦਾ ਹੈ ; ਉਥੇ ਇਹ ਵੀ ਸਪੱਸ਼ਟ ਹੋ ਜਾਂਦਾ ਹੈ ਕਿ ਕਾਂਗਰਸ ਦੀ ਟਿਕਟ ਤੇ ਭਾਈ ਕਿਸ਼ਨ ਸਿੰਘ ਬਤੌਰ ਆਰੀਆ ਸਮਾਜੀ ਨਹੀਂ ਸਗੋਂ ਸਿੱਖ ਅਖਵਾਕੇ ਚੋਣ ਲੜਿਆ ਤੇ ਅਕਾਲੀ ਦਲ ਨੇ ਇਸਦੀ ਮਦਦ ਕੀਤੀ।ਇਸਦੇ ਨਾਲ ਹੀ ਇਹ ਵੀ ਸਪੱਸ਼ਟ ਹੋ ਜਾਂਦਾ ਹੈ ਕਿ ਕਾਂਗਰਸ ਅਕਾਲੀ ਦਲ ਵਿੱਚ ਵੱਡੀ ਸੰਨ ਲਾ ਚੁਕੀ ਸੀ।