ਜਾਗ ਖਾਲਸਾ ਜਾਗ ਬਈ, ਜਾਗਣ ਦਾ ਵੇਲਾ
ਗੁਰੂ ਗ੍ਰੰਥ-ਪੰਥ ਦਿਆ ਵਾਰਸਾ,
ਸਮੇਂ ਦੀ ਇਹ ਅਵਾਜ਼ ਬਈ, ਜਾਗਣ ਦਾ ਵੇਲਾ ਸਾਡੇ ਗੁਰੂ ਗ੍ਰੰਥ ਸਾਹਿਬ ਜੀ, ਗੁਰੂਆਂ ਦਾ ਉਪਦੇਸ਼ ਹੈ ਸਾਡਾ
ਬਾਣੀ ਬਾਣਾ ਰਹਿਤ ਹੈ ਸਾਡੀ, ਜੱਗ ਤੋਂ ਨਿਆਰਾ ਵੇਸ ਹੈ ਸਾਡਾ
ਪੁੱਤ ਪੁੱਤਰੀਆਂ ਗੁਰੂ ਗੋਬਿੰਦ ਸਿੰਘ ਦੇ, ਅਨੰਦਪੁਰੀ ਸੰਦੇਸ਼ ਹੈ ਸਾਡਾ
ਧਰਮ ਦੀ ਮਾਤਾ ਸਾਹਿਬ ਕੌਰ ਮਾਂ, ਗੁਰੂ ਨੇ ਲਿਖਿਆ ਲੇਖ ਹੈ ਸਾਡਾ
ਪਰ ਏਥੇ ਕੁਝ ਭੇਖੀ ਟੋਲੇ, ਲੱਗੇ ਉਜਾੜਨ ਬਾਗ ਬਈ, ਜਾਗਣ ਦਾ ਵੇਲਾ
ਜਾਗ ਖਾਲਸਾ ਜਾਗ ਬਈ, ਜਾਗਣ ਦਾ ਵੇਲਾ . . . ਕਿੱਥੇ ਲਿਖਿਆ ਸਿੱਖ ਗੁਰੂ ਦਾ, ਪੂਜੇ ਜਾ ਕੇ ਕਬਰਾਂ ਮੜ੍ਹੀਆਂ
ਜੰਤਰ ਮੰਤਰ ਤੰਤਰ ਮੰਨੇ, ਮੰਨਤਾਂ ਮੰਨੇਂ ਫੋਕਟ ਘੜੀਆਂ
ਥਿੱਤਾਂ ਵਾਰਾਂ ਦੀਆਂ ਕਰੇ ਵੀਚਾਰਾਂ, ਧਾਗੇ ਤਵੀਤ ਤੇ ਝੂਠੀਆਂ ਲੜੀਆਂ
ਪਾਂਧੇ ਪੱਤਰੀਆਂ ਸਣੇ ਜੋਤਸ਼ੀ, ਕਰਮ-ਕਾਂਡ ਸਭ ਅਕਲ ਨੂੰ ਕੜੀਆਂ
ਗੁਰੂ ਸਾਹਿਬਾਂ ਨੇ ਖੰਡਨ ਕੀਤੇ, ਝੂਠੇ ਰਸਮ ਰਿਵਾਜ ਬਈ, ਜਾਗਣ ਦਾ ਵੇਲਾ
ਜਾਗ ਖਾਲਸਾ ਜਾਗ ਬਈ, ਜਾਗਣ ਦਾ ਵੇਲਾ . . . ਕਬਰਾਂ ’ਤੇ ਦੁੱਧ ਖੀਰ ਚੜ੍ਹਾਉਨੈਂ, ਕਿਤੇ ਸ਼ਰਾਬ ਚੜ੍ਹਾਈ ਜਾਨੈਂ
ਮੜ੍ਹੀਆਂ ਉੱਤੇ ਮੇਲੇ ਲਾਉਨੈਂ, ਪੀ-ਪੀ ਭੰਗੜੇ ਪਾਈ ਜਾਨੈਂ
ਬਾਪੂ ਮਰ ਗਿਆ ਖੁਸ਼ਕੀ ਦੇ ਨਾਲ, ਮਰੇ ਦੇ ਮੂੰਹ ਘਿਓ ਲਾਈ ਜਾਨੈਂ
ਜਿਉਂਦੇ ਪਿਤਰ ਨਾ ਮੰਨੇ ਭਾਈ, ਹੁਣ ਕਿਉਂ ਸਰਾਧ ਖੁਆਈ ਜਾਨੈਂ
ਰਹਿਤ ਮਰਯਾਦਾ ਵੇਖ ਲੈ ਪੜ੍ਹਕੇ, ਇਹ ਸਭ ਬਿਪਰਨਵਾਦ ਬਈ, ਜਾਗਣ ਦਾ ਵੇਲਾ
ਜਾਗ ਖਾਲਸਾ ਜਾਗ ਬਈ, ਜਾਗਣ ਦਾ ਵੇਲਾ . . . ਕੰਨ ’ਚ ਦਿੰਦਾ ਨਾਮ ਦਾਨ ਕੋਈ, ਨਿਤਨੇਮ ਤੋਂ ਤੋੜਿਆ ਸਿੱਖ ਨੂੰ
ਗਲਤ ਵਿਆਖਿਆ ਕਰ ਬਾਣੀ ਦੀ, ਗੁਰੂ ਗ੍ਰੰਥ ਤੋਂ ਮੋੜਿਆ ਸਿੱਖ ਨੂੰ
ਸਿੱਖ ਸਿੱਖੀ ਦੀ ਨਿੰਦਿਆ ਕਰ ਰਿਹਾ, ਐਸੇ ਵਹਿਣੀਂ ਰੋੜ੍ਹਿਆ ਸਿੱਖ ਨੂੰ
ਗੁਰੂ ਗ੍ਰੰਥ ਤੋਂ ਬੇਮੁੱਖ ਕਰ ਕੇ, ਆਪਣੇ ਗੋਡੀਂ ਜੋੜਿਆ ਸਿੱਖ ਨੂੰ
ਬਗਲੇ ਭਗਤ ਸਮਾਧੀਆਂ ਲਾ ਕੇ, ਗਾਉਣ ਡੱਡਾਂ ਦੇ ਰਾਗ ਬਈ, ਜਾਗਣ ਦਾ ਵੇਲਾ
ਜਾਗ ਖਾਲਸਾ ਜਾਗ ਬਈ, ਜਾਗਣ ਦਾ ਵੇਲਾ . . . ਥਾਂ-ਥਾਂ ਢੋਲ ਢਮੱਕੇ ਵੱਜਦੇ, ਗੁਰੂ ਬਣੇ ਦੇਹਧਾਰੀ ਬੈਠੇ
ਸਿੱਖ ਨੂੰ ਸਿੱਖੀ ਤੋਂ ਤੋੜਨ ਦੇ ਲਈ, ਆਪਣੇ ਖੰਭ ਖਿਲਾਰੀ ਬੈਠੇ
ਲੁੱਟਣ ਦੇ ਲਈ ਸਭ ਠੱਗ ਟੋਲੇ, ਆਪਣਾ ਆਪ ਸ਼ਿੰਗਾਰੀ ਬੈਠੇ
ਸਮਝ ਭੋਲਿਆ ਕਸਮ ਗੁਰੂ ਦੀ, ਲਾ ਕੇ ਜਾਲ਼ ਸ਼ਿਕਾਰੀ ਬੈਠੇ
ਮਿਰਚ ਮਸਾਲਾ ਚੋਰੀ ਦਾ ਤੜਕਾ, ਠੱਗਾਂ ਰਿੱਧਾ ਸਾਗ ਬਈ, ਜਾਗਣ ਦਾ ਵੇਲਾ
ਜਾਗ ਖਾਲਸਾ ਜਾਗ ਬਈ, ਜਾਗਣ ਦਾ ਵੇਲਾ . . . ਮੇਰੀ ਗੱਲ ਦਾ ਉੱਤਰ ਕੋਈ ਦੇਵੇ, ਜੇ ਕੋਈ ਹੋਵੇ ਭਰਮ ਮਾਰਿਆ
ਕਿਸ ਦੁਨੀਆ ਦਾ ਭਰਮਣ ਕੀਤਾ, ਕਿਸਨੇ ਮਹਿੰਗਾ ਮੁੱਲ ਤਾਰਿਆ
ਕਿਸ ਨੇ ਕਿਲ੍ਹੇ ਤੇ ਤਖ਼ਤ ਸਿਰਜ ਕੇ, ਜਬਰ ਜ਼ੁਲਮ ਨੂੰ ਹੈ ਲਲਕਾਰਿਆ
ਕਿਸ ਨੇ ਹੈ ਸਰਬੰਸ ਵਾਰ ਕੇ, ਪੁੱਤਰਾਂ ਤੋਂ ਵੱਧ ਪੰਥ ਪਿਆਰਿਆ
ਕੌਣ ਸੂਲਾਂ ਦੀਆਂ ਸੇਜਾਂ ਸੁੱਤਾ, ਗਾ ਪ੍ਰੀਤਮ ਦੇ ਰਾਗ ਬਈ, ਜਾਗਣ ਦਾ ਵੇਲਾ
ਜਾਗ ਖਾਲਸਾ ਜਾਗ ਬਈ, ਜਾਗਣ ਦਾ ਵੇਲਾ . . . ਸਹੁੰ ਸਾਨੂੰ ਉਨ੍ਹਾਂ ਮਾਵਾਂ ਦੀ, ਹਾਰ ਪੁੱਤਾਂ ਦੇ ਜਿਨ ਗਲ਼ ਪਾਏ
ਪੀਸਣੇ ਪੀਸੇ ਦੁਖੜੇ ਝੱਲੇ, ਪਰ ਨਾ ਸਿੱਖੀ ਸਿਦਕ ਡੁਲਾਏ
ਰੰਬੀਆਂ, ਆਰਿਆਂ, ਚਰਖੜੀਆਂ ’ਤੇ, ਪੰਥ ਦੇ ਜਿਨ੍ਹਾਂ ਝੰਡੇ ਝੁਲਾਏ
ਬੰਦ ਬੰਦ ਕੱਟੇ, ਖੋਪਰ ਲੱਥੇ, ਪਰ ਹੱਸ ਗੀਤ ਧਰਮ ਦੇ ਗਾਏ
ਓ ਸਿਰ ਜਾਵੇ ਤਾਂ ਜਾਵੇ, ਪਰ ਨਾ ਸਿਦਕ ਨੂੰ ਲੱਗੇ ਦਾਗ਼ ਬਈ, ਜਾਗਣ ਦਾ ਵੇਲਾ
ਜਾਗ ਖਾਲਸਾ ਜਾਗ ਬਈ, ਜਾਗਣ ਦਾ ਵੇਲਾ . . . ਜੇ ਤੇਰੀ ਜ਼ਮੀਰ ਜਾਗਦੀ, ਭੁੱਲਿਆ ਸਿੱਖਾ ਭੁੱਲ ਬਖਸ਼ਾ ਲੈ
ਗੁਰੂ ਗੋਬਿੰਦ ਸਿੰਘ ਦਿਆ ਸ਼ੇਰ ਦੂਲਿਆ, ਖਾਲਸੇ ਵਾਲਾ ਰੂਪ ਸਜਾ ਲੈ
ਬਾਣੀ ਬਾਣੇ ਦਾ ਧਾਰਨੀ ਹੋ ਜਾ, ਨਿਤਨੇਮ ਦਾ ਨੇਮ ਬਣਾ ਲੈ
ਸ਼ਬਦ ਗੁਰੂ ਤੋਂ ਗਿਆਨ ਖੜਗ ਲੈ, ਕਰਮ ਕਾਂਡ ਸਭ ਅੱਗੇ ਲਾ ਲੈ
ਗੋਗੋਆਣੀ ਕਹੇ ਗੁਰਮਤਿ ਧਾਰ ਲੈ, ਜਾਗਣਗੇ ਸੁੱਤੇ ਭਾਗ ਬਈ, ਜਾਗਣ ਦਾ ਵੇਲਾ
ਜਾਗ ਖਾਲਸਾ ਜਾਗ ਬਈ, ਜਾਗਣ ਦਾ ਵੇਲਾ . . . |
