20 ਅਗਸਤ 1922 ਵਾਲੇ ਦਿਨ ਦੌਲਤਪੁਰ ਤੋਂ ਬਬਰ ਕਰਮ ਸਿੰਘ ਨੇ ‘ਬੱਬਰ ਅਕਾਲੀ ਦੋਆਬਾ ’ ਨਾਂ ਦੀ ਇਕ ਪਤ੍ਰਿਕਾ ਦਾ ਪ੍ਰਕਾਸ਼ਨ ਸ਼ੁਰੂ ਕੀਤਾ।
ਬਬਰ ਕਰਮ ਸਿੰਘ, ਬਬਰ ਅਕਾਲੀ ਲਹਿਰ ਦਾ ਇਕ ਸਿਰਕਢ ਕ੍ਰਾਂਤੀਕਾਰੀ ਸੀ ਜਿਸ ਦਾ ਅੰਮ੍ਰਿਤ ਛੱਕਣ ਤੋਂ ਪਹਿਲਾਂ, ਮੂਲ ਨਾਂ ਨਰੈਣ ਸਿੰਘ ਸੀ । ਬਬਰ ਕਰਮ ਸਿੰਘ, ਦਾ ਜਨਮ ਜ਼ਿਲ੍ਹਾ ਜਲੰਧਰ ਦੇ ਦੌਲਤਪੁਰ ਨਾਂ ਦੇ ਕਸਬੇ ਵਿਚ ਸਰਦਾਰ ਨੱਥਾ ਸਿੰਘ ਅਤੇ ਮਾਈ ਦੁੱਲੀ ਦੇ ਗ੍ਰਹਿ ਵਿਖੇ ਹੋਇਆ ਸੀ । 18 ਵਰ੍ਹਿਆਂ ਦੀ ਉਮਰ ਵਿਚ ਆਪ ਫ਼ੌਜ ਵਿਚ ਭਰਤੀ ਹੋ ਗਏ , ਪਰ ਅੰਗ੍ਰੇਜ਼ਾਂ ਦੇ ਭਾਰਤੀਆਂ ਦੇ ਨਾਲ ਗੰਦੇ ਅਤੇ ਨਸਲ-ਭਰਪੂਰ ਵਤੀਰੇ ਤੋਂ ਖਿਝ ਕੇ ਆਪ ਨੇ ਫ਼ੌਜ ਦੀ ਨੌਕਰੀ ਛਡ ਦਿੱਤੀ । ਸੰਨ 1912 ਈ. ਵਿਚ ਆਪਣੇ ਚਾਚੇ ਸਰਦਾਰ ਵਰਿਆਮ ਸਿੰਘ ਦੇ ਸੱਦੇ ਉਤੇ ਆਪ ਕੈਨੇਡਾ ਚਲੇ ਗਏ। ਕੈਨੇਡਾ ਵਿੱਚ ਆਪ ਗ਼ਦਰ ਪਾਰਟੀ ਦੇ ਆਗੂ ਸਰਦਾਰ ਆਸਾ ਸਿੰਘ ਦੇ ਸੰਪਰਕ ਵਿਚ ਆਏ ਅਤੇ ਗ਼ਦਰ ਪਾਰਟੀ ਦੀਆਂ ਗਤੀਵਿਧੀਆਂ ਵਿੱਚ ਹਿਸਾ ਲੈਣਾ ਸ਼ੁਰੂ ਕਰ ਦਿੱਤਾ।
ਵਤਨ-ਪ੍ਰਸਤੀ ਦੇ ਜਜ਼ਬੇ ਵਿਚ ਲਬਰੇਜ਼ ਆਪ ਦੋ ਸਾਲ ਬਾਅਦ ਹੀ ਭਾਰਤ ਵਾਪਸ ਪਰਤ ਆਏ ਅਤੇ ਅਕਾਲੀ ਲਹਿਰ ਦੇ ਪ੍ਰਭਾਵ ਹੇਠ ਸ੍ਰੀ ਨਨਕਾਣਾ ਸਾਹਿਬ ਵਿੱਖੇ ਅੰਮ੍ਰਿਤ ਛਕ ਕੇ ਨਰੈਣ ਸਿੰਘ ਤੋਂ ਕਰਮ ਸਿੰਘ ਨਾਂ ਅਪਣਾ ਲਿਆ । ਹੁਣ ਆਪ ਨੇ ਖੁੱਲ ਕੇ ਅੰਗ੍ਰੇਜ਼ ਸਰਕਾਰ ਦੇ ਵਿਰੁੱਧ ਆਪਣੀਆਂ ਗਤੀਵਿਧੀਆਂ ਨੂੰ ਅੰਜਾਮ ਦੇਣਾ ਸ਼ੁਰੂ ਕਰ ਦਿੱਤਾ ਅਤੇ ਜਗ੍ਹਾ ਜਗ੍ਹਾ’ ਤੇ ਜਾ ਕੇ ਆਪਣੀਆਂ ਧੂੰਆਂ ਧਾਰ ਤਕਰੀਰਾਂ ਦੇ ਨਾਲ ਲੋਕਾਂ ਨੂੰ ਜਗਾਉਣ ਸ਼ੁਰੂ ਕਰ ਦਿੱਤਾ ਅਤੇ ਆਪਣੇ ਕੁਝ ਚੋਣਵੇਂ ਸਾਥੀਆਂ ਦਾ ਇਕ ‘ਚਕਰਵਰਤੀ ਜੱਥਾ’ ਵੀ ਬਣਾਇਆ ।
20 ਅਗਸਤ 1922 ਵਾਲੇ ਦਿਨ ਦੌਲਤਪੁਰ ਤੋਂ ਹੀ ‘ ਬਬਰ ਅਕਾਲੀ ਦੋਆਬਾ ’ ਨਾਂ ਦੀ ਇਕ ਪਤ੍ਰਿਕਾ ਦਾ ਪ੍ਰਕਾਸ਼ਨ ਸ਼ੁਰੂ ਕੀਤਾ ਗਿਆ।ਇਸ ਪਤ੍ਰਿਕਾ ਵਿਚ ਕ੍ਰਿਾਂਤੀਕਾਰੀ ਵਿਚਾਰਾਂ ਵਾਲੀ ਸਾਮਗ੍ਰੀ ਦਾ ਹੀ ਪ੍ਰਕਾਸ਼ਨ ਕੀਤਾ ਜਾਂਦਾ ਸੀ। ਇਸਦੇ ਪਹਿਲੇ ਸੰਪਾਦਕ ਵੀ ਖ਼ੁਦ ਕਰਮ ਸਿੰਘ ਆਪ ਬਣੇ । ਬਾਅਦ ਵਿੱਚ ਇਸ ਪਰਚੇ ਦੇ ਸੰਪਾਦਨ ਦੀ ਜ਼ਿੰਮੇਵਾਰੀ ਸਰਦਾਰ ਕਿਸ਼ਨ ਸਿੰਘ ਗੜਗਜ ਹੁਣਾਂ ਨੇ ਆਪਣੇ ਹੱਥਾਂ ਵਿਚ ਲੈ ਲਈ।
ਕ੍ਰਿਾਂਤੀਕਾਰੀ ਕਾਰਵਾਈਆਂ ਵਿਚ ਹਿੱਸਾ ਲੈਣ ਕਾਰਨ ਬਰਤਾਨਵੀ ਸਰਕਾਰ ਨੇ ਬਬਰ ਕਰਮ ਸਿੰਘ ਦੇ ਸਿਰ ਉਤੇ 3000 ਰੁਪਏ ਦੇ ਇਨਾਮ ਦਾ ਐਲਾਨ ਕਰ ਦਿੱਤਾ ।ਆਪ ਇਨ੍ਹਾਂ ਹਾਲਾਤਾਂ ਵਿਚ ਰੂਪੋਸ਼ ਹੋ ਗਏ । ਪਰ ਰੂਪੋਸ਼ੀ ਦੇ ਦੌਰਾਨ ਵੀ ਗੋਰੀ ਸਰਕਾਰ ਦੇ ਵਿਰੁੱਧ ਆਪ ਨੇ ਆਪਣੀਆਂ ਕਾਰਵਾਈਆਂ ਜਾਰੀ ਰੱਖੀਆਂ । ਬਾਅਦ ਵਿੱਚ ਇਨਾਮ ਦੇ ਲਾਲਚ ਵਿੱਚ ਅਨੂਪ ਸਿੰਘ ਨਾਂ ਦੇ ਇਕ ਪੁਲਿਸ ਮੁਖ਼ਬਰ ਨੇ ਆਪ ਦੇ ਚਾਚੇ ਬੋਗ ਸਿੰਘ ਨਾਲ ਮਿਲ ਕੇ ਸਰਦਾਰ ਕਰਮ ਸਿੰਘ ਬਬਰ, ਸਰਦਾਰ ਬਿਸ਼ਨ ਸਿੰਘ ਮਾਂਗਟ, ਸਰਦਾਰ ਊਦੇ ਸਿੰਘ ਰਾਮਗੜ੍ਹ, ਸਰਦਾਰ ਮਹਿੰਦਰ ਸਿੰਘ ਪੰਡੋਰੀ, ਸਰਦਾਰ ਗੰਗਾ ਸਿੰਘ ਨਾਂ ਦੇ ਇਨ੍ਹਾਂ ਬਬਰਾਂ ਨੂੰ ਇਕ ਪੁਲਿਸ ਮੁਕਾਬਲੇ ਵਿਚ ਪਹਿਲੀ ਸਤੰਬਰ 1923 ਨੂੰ ਸ਼ਹੀਦ ਕਰਵਾ ਦਿੱਤਾ।
