ਘੱਲਿਆ ਘਰੋਂ ਵਪਾਰ ਕਰਨ ਲਈ,
ਦਮੜੀਆਂ ਦੋ ਤੋਂ ਚਾਰ ਕਰਨ ਲਈ।
ਭੁੱਖੇ ਸਾਧੂਆਂ ਦੇ ਨਾਲ ਬਣ ਗਈ,
ਢਾਣੀ ਬਾਬੇ ਨਾਨਕ ਦੀ, ਬਾਣੀ ਗੁਰੂ,
ਗੁਰੂ ਹੈ ਬਾਣੀ; ਬਾਣੀ ਬਾਬੇ ਨਾਨਕ ਦੀ।

ਲਾਡ ਨਾਲ ਸਮਝਾ ਕੇ ਬਾਬਲ ਮੋਦੀ ਖਾਨੇ ਤੋਰ ਦਿੱਤਾ
ਉਥੇ ਵੀ ਬਹਿ ਬਾਬੇ ਨਾਨਕ ਤੇਰਾ ਹੀ ਤੇਰਾ ਤੋਲ ਦਿੱਤਾ।
ਵੇਖਣ ਵਾਲੇ ਸਮਝਣ ਅਕਲ ਅੰਞਾਣੀ ਬਾਬੇ ਨਾਨਕ ਦੀ
ਬਾਣੀ ਗੁਰੂ, ਗੁਰੂ ਹੈ ਬਾਣੀ; ਬਾਣੀ ਬਾਬੇ ਨਾਨਕ ਦੀ।

ਨਾਮ ਕਿਰਤ ਤੇ ਵੰਡ ਕੇ ਛਕਣਾ, ਸਭ ਥਾਈਂ ਸਮਝਾ ਦਿੱਤਾ।
ਸੱਜਣ ਠੱਗ ਤੇ ਤੇ ਕੌਢੇ ਤਾਂਈਂ ਸਿੱਧੇ ਰਾਹ ’ਤੇ ਪਾ ਦਿੱਤਾ।
ਧੰਨ ਬਾਲਾ ਮਰਦਾਨਾ ਸੰਗਤ ਮਾਣੀਂ ਬਾਬੇ ਨਾਨਕ ਦੀ
ਬਾਣੀ ਗੁਰੂ, ਗੁਰੂ ਹੈ ਬਾਣੀ; ਬਾਣੀ ਬਾਬੇ ਨਾਨਕ ਦੀ।

ਸਖ਼ਤ ਮੁਸ਼ੱਕਤ ਨੂੰ ਛਿੰਨ ਕਰਕੇ ਮਾਣ ਤੋੜਿਆ ਬਾਬਰ ਦਾ
ਸੱਚ ਦਾ ਹੌਕਾ ਲਾ ਕੇ ਦਿੱਤਾ ਸਭ ਨੂੰ ਹੱਕ ਬਰਾਬਰ ਦਾ
ਕਿਸੇ ਲਈ ਨਾ ਦਿਸਦੀ ਹੈ, ਵੰਡ ਕਾਣੀ ਬਾਬੇ ਨਾਨਕ ਦੀ
ਬਾਣੀ ਗੁਰੂ, ਗੁਰੂ ਹੈ ਬਾਣੀ; ਬਾਣੀ ਬਾਬੇ ਨਾਨਕ ਦੀ।

ਸਭ ਸੰਗਤਾਂ ਦੇ ਚਰਨਾਂ ਦੇ ਵਿਚ ਬਿੱਟੂ ਕਰਦਾ ਅਰਜ਼ ਇਹੋ
ਗੁਰੂ ਮਾਨਿਓ ਗ੍ਰੰਥ ਜੀ ਸੰਗਤੋ, ਸਭ ਦਾ ਬਣਦਾ ਫਰਜ਼ ਇਹੋ
ਤਰ ਜਾਵੇ ਜੋ ਸਮਝੇ ਸੱਚ ਕਹਾਣੀ ਬਾਬੇ ਨਾਨਕ ਦੀ
ਬਾਣੀ ਗੁਰੂ, ਗੁਰੂ ਹੈ ਬਾਣੀ; ਬਾਣੀ ਬਾਬੇ ਨਾਨਕ ਦੀ।