ਸਾਲ 1992 ਦੀਆਂ ਚੋਣਾਂ ਦੇ ਬਾਈਕਾਟ ਦਾ ਐਲਾਨ ਜਦੋਂ ਪੰਥਕ ਕਮੇਟੀ ਦੇ ਡਾ. ਸੋਹਣ ਸਿੰਘ ਨੇ ਕੀਤਾ ਤਾਂ ਬਾਬਾ ਗੁਰਬਚਨ ਸਿੰਘ ਮਾਨੋਚਾਹਲ ਨੇ ਉਦੋਂ ਤੋਂ ਹੀ ਚੋਣਾਂ 'ਚ ਹਿੱਸਾ ਲੈਣ ਦਾ ਮਨ ਬਣਾ ਲਿਆ ਸੀ। ਬਾਬਾ ਮਾਨੋਚਾਹਲ ਨੇ ਚੋਣਾਂ 'ਚ ਹਿੱਸਾ ਲੈਣ ਦਾ ਜਦੋਂ ਦ੍ਰਿੜ ਇਰਾਦਾ ਕਰ ਲਿਆ ਤਾਂ ਇਸ ਤੋਂ ਚਿੜ ਕੇ ਪੰਥਕ ਕਮੇਟੀ ਦੇ ਸੋਹਣ ਸਿੰਘ ਨੇ ਬਾਬਾ ਮਾਨੋਚਾਹਲ ਤੇ ਸਰਕਾਰੀ ਹੋਣ ਦਾ ਇਲਜ਼ਾਮ ਲਗਾ ਦਿੱਤਾ। ਜਵਾਬ 'ਚ ਬਾਬਾ ਮਾਨੋਚਾਹਲ ਨੇ ਸਿਰਫ ਇੰਨਾ ਹੀ ਕਿਹਾ ਕਿ ਸਮਾਂ ਆਉਣ ਤੇ ਪਤਾ ਲੱਗ ਜਾਵੇਗਾ ਕਿ ਸਰਕਾਰੀ ਕੌਣ ਹੈ ਤੇ ਕੌਣ ਨਹੀਂ। ਚੋਣਾਂ ਦੇ ਬਾਈਕਾਟ ਤੇ ਉਹ ਸਿਖਾਂ ਨੂੰ ਸੁਚੇਤ ਕਰਦੇ ਰਹੇ ਕਿ ਇਹ ਤਾਂ ਆਪਣਾ ਛਿੱਤਰ ਲਾਹ ਕੇ ਵੈਰੀ ਹੱਥ ਫੜਾਉਣ ਵਾਲੀ ਗੱਲ ਹੈ ਕਿ ਆਹ ਸਾਡੇ ਮਾਰ, ਸਿੱਖੋ ਐਡੀ ਵੱਡੀ ਗਲਤੀ ਨਾਂ ਕਿਤੇ ਕਰ ਬੈਠਿਓ। ਜਦੋਂ ਚੋਣ ਲੜਣ ਜਾਂ ਨਾਂ ਲੜਨ ਦੇ ਮਸਲੇ ਤੇ ਆਨੰਦਪੁਰ ਸਾਹਿਬ ਤੇ ਅੰਮ੍ਰਿਤਸਰ ਵਿਖੇ ਮੀਟਿੰਗਾਂ ਹੋ ਰਹੀਆਂ ਸਨ ਤਾਂ ਬਾਬਾ ਮਾਨੋਚਾਹਲ ਨੇ ਭਾਈ ਮਨਜੀਤ ਸਿੰਘ ਤੇ ਹਰਮਿੰਦਰ ਸਿੰਘ ਗਿੱਲ ਨੂੰ ਵੱਡੀ ਤਾੜਨਾ ਕਰਕੇ ਮੀਟਿੰਗ ਲਈ ਭੇਜਿਆ "ਕਿ ਧਿਆਨ ਰੱਖਿਓ ਕਿ ਬਾਕੀ ਸਾਰਾ ਪੰਥ ਇਕ ਪਾਸੇ ਹੋ ਜਾਵੇ ਤੇ ਬਾਈਕਾਟ ਦਾ ਐਲਾਨ ਕਰ ਦੇਵੇ ਪਰ ਤੁਸੀਂ ਮੀਟਿੰਗ 'ਚ ਚੋਣ ਲੜਣ ਦੇ ਫੈਸਲੇ ਤੇ ਅੜੇ ਰਹਿਣਾ ਹੈ ਤੇ ਇਹੀ ਐਲਾਨ ਕਰਕੇ ਉੱਠ ਕੇ ਆਉਣਾ ਹੈ ਕਿ ਸਿੱਖ ਚੋਣਾਂ ਲੜਣਗੇ। ਪਰ ਬਦਕਿਸਮਤੀ ਕੌਮ ਦੀ ਕਿ ਭਾਈ ਮਨਜੀਤ ਸਿੰਘ ਬਾਕੀ ਦੀਆਂ ਪੰਥਕ ਜਥੇਬੰਦੀਆਂ ਦੇ ਦਬਾਅ ਅੱਗੇ ਟਿਕ ਨਾ ਸਕੇ ਤੇ ਬਾਈਕਾਟ ਦੇ ਫੈਸਲੇ ਤੇ ਮੋਹਰ ਲਗਾ ਆਏ। ਮੀਟਿੰਗ ਤੋਂ ਬਾਅਦ ਜਦੋਂ ਭਾਈ ਮਨਜੀਤ ਸਿੰਘ ਨੇ ਬ੍ਰਹਮਪੁਰਾ ਪਿੰਡ ਪਹੁੰਚ ਕੇ ਜਦੋਂ ਆਪਣੀ ਨਾਕਾਮੀ ਦੀ ਖਬਰ ਬਾਬਾ ਜੀ ਨੂੰ ਦੱਸੀ ਤਾਂ ਪਹਿਲਾਂ ਤਾਂ ਬਾਬਾ ਜੀ ਆਹ ਭਰ ਕੇ ਰਹਿ ਗਏ ਤੇ ਫਿਰ ਭਾਈ ਮਨਜੀਤ ਨੂੰ ਖੂਬ ਝਾੜ ਪਾਈ "ਜੇ ਤੂੰ ਗਿਆਨੀ ਕਰਤਾਰ ਸਿੰਘ ਭਿੰਡਰਾਂਵਾਲਿਆਂ ਦਾ ਲੜਕਾ ਤੇ ਸ਼ਹੀਦ ਭਾਈ ਅਮਰੀਕ ਸਿੰਘ ਦਾ ਭਰਾ ਨਾਂ ਹੁੰਦਾ ਤਾਂ ਮੈਂ ਤੇਰੀ ਛਾਤੀ 'ਚ ਬ੍ਰਸਟ ਲੰਘਾ ਦਿੰਦਾ, ਤੈਨੂੰ ਨੀ ਪਤਾ ਕਿ ਤੂੰ ਕੌਮ ਦਾ ਕਿੰਨਾ ਵੱਡਾ ਨੁਕਸਾਨ ਕਰ ਆਇਆ ਹੈਂ। ਜਦੋਂ ਕੋਈ ਖੁਦਕੁਸ਼ੀ ਕਰਨ ਤੇ ਹੀ ਉਤਾਰੂ ਹੋ ਜਾਵੇ ਫਿਰ ਉਸਨੂੰ ਕਿਵੇਂ ਰੋਕਿਆ ਜਾ ਸਕਦਾ ਹੈ ਇਹੀ ਹਾਲ ਇਹਨਾਂ ਜਥੇਬੰਦੀਆਂ ਦਾ ਸੀ ਸ. ਸਿਮਰਨਜੀਤ ਸਿੰਘ ਮਾਨ ਵੀ ਜਦੋਂ ਚੋਣ ਲੜਣ ਦੇ ਫੈਸਲੇ ਤੇ ਬਜਿੱਦ ਸਨ ਤਾਂ ਉਨ੍ਹਾਂ ਦੇ ਦੋ ਉਮੀਦਵਾਰ ਸ. ਸਤਨਾਮ ਸਿੰਘ ਤੇ ਸ. ਬਲਦੇਵ ਸਿੰਘ ਲਾਂਗ ਕਤਲ ਕਰ ਦਿੱਤੇ ਤੇ ਸ. ਮਾਨ ਨੂੰ ਵੀ ਜਬਰਦਸਤੀ ਮਨਾ ਲਿਆ ਕਹਿੰਦੇ ਜਦੋਂ ਭਾਈ ਮਨਜੀਤ ਸਿੰਘ ਚੋਣ ਬਾਈਕਾਟ ਦਾ ਐਲਾਨ ਕਰ ਆਏ ਤਾਂ ਇਸ ਪਿਛੋਂ ਬਾਬਾ ਜੀ ਨੇ ਵੀ ਚੋਣ ਲੜਣ ਦੀਆਂ ਕੋਸ਼ਿਸ਼ਾਂ ਛੱਡ ਦਿਤੀਆਂ ਤੇ ਦੁਖੀ ਮਨ ਨਾਲ ਇਹ ਸੱਚੀ ਭਵਿਖਵਾਣੀ ਵੀ ਕਰ ਦਿੱਤੀ ਕਿ ਇਸ ਬਾਈਕਾਟ ਨੇ ਸੰਘਰਸ਼ ਨੂੰ ਸਾਲਾਂ ਪਿਛੇ ਲਿਜਾ ਸੁੱਟ ਦੇਣੈ ਜਿਹੜੇ ਅੱਜ ਸਾਨੂੰ ਕਹਿੰਦੇ ਨੇ ਕਿ ਸਾਡੇ ਘਰ ਚਰਨ ਪਾਉ ਇਹਨਾਂ ਨੇ ਮੰਗਣ ਤੇ ਵੀ ਰੋਟੀ ਨਹੀਂ ਦੇਣੀ ਤੇ ਨਾਂ ਹੀ ਖੜਕਾਉਣ ਤੇ ਬੂਹਾ ਖੋਲਣਾ ਹੈ। ਸਿੱਖਾਂ ਨੇ ਚੋਣਾਂ ਦਾ ਸਫਲਤਾ ਪੂਰਵਕ ਬਾਈਕਾਟ ਕਰ ਲਿਆ ਤੇ ਸਾਰੇ ਸੰਘਰਸ਼ ਤੇ ਇਕ ਬਾਈਕਾਟ ਨਾਲ ਪਾਣੀ ਫੇਰ ਲਿਆ। 10 ਫੀਸਦੀ ਵੋਟ ਨਾਲ ਬੇਅੰਤ ਦੀ ਸਰਕਾਰ ਬਣੀ ਤੇ ਕੇ। ਪੀ। ਐਸ ਗਿੱਲ ਡੀਜੀਪੀ ਤੇ ਉਸ ਤੋਂ ਬਾਅਦ ਸ਼ੁਰੂ ਹੋ ਗਿਆ ਝੂਠੇ ਪੁਲਿਸ ਮੁਕਾਬਲਿਆਂ ਦਾ ਦੌਰ ਜਿਹੜਾ ਲਹਿਰ ਨੂੰ ਖਤਮ ਕਰ ਕੇ ਹੀ ਰੁਕਿਆ। ਬਾਬਾ ਜੀ ਦੇ ਪਰਿਵਾਰ ਤੇ ਹਮਲਾ ਹੋਇਆ ਤੇ ਸਾਰਾ ਪਰਿਵਾਰ ਜਾਲਮਾਂ ਖਤਮ ਕਰ ਦਿੱਤਾ ਤਾਂ ਸਾਥੀਆਂ ਨੇ ਕਿਹਾ ਕਿ ਆਪਾਂ ਮੋੜਵਾਂ ਹਮਲਾ ਕਰੀਏ ਤਾਂ ਬਾਬਾ ਜੀ ਨੇ ਉੱਤਰ ਦਿੱਤਾ ਕਿ ਜੇ ਇਹ ਸਿਖ ਗਲਤੀ ਕਰ ਰਹੇ ਹਨ ਤਾਂ ਮੈਂ ਵੀ ਉਹੀ ਗਲਤੀ ਕਰਾਂ, ਸਰਕਾਰ ਤਾਂ ਅੱਗੇ ਹੀ ਇਹੋ ਚਾਹੁੰਦੀ ਹੈ। ਦਿਨ ਭਰ ਦੇ ਭੁੱਖੇ ਤੇ ਥੱਕੇ ਟੁੱਟੇ ਬਾਬਾ ਮਾਨੋਚਾਹਲ ਨੇ ਜਦੋਂ ਭਿਆਨਕ ਕਾਲੀ ਰਾਤ ਨੂੰ ਇਕ ਘਰ ਦਾ ਬੂਹਾ ਖੜਕਾਇਆ ਤੇ ਖਾਣ ਲਈ ਦੋ ਰੋਟੀਆਂ ਮੰਗੀਆਂ ਤਾਂ ਅੰਦਰੋਂ ਆਵਾਜ਼ ਆਈ ਕਿ ਬਾਬਾ ਜੀ ਮਾਫ਼ ਕਰਿਉ ਹੁਣ ਸਖਤੀ ਬੜੀ ਹੋ ਗਈ ਹੈ ਆਪਣੇ ਬਾਲ-ਬੱਚੇ ਰੱਬ ਆਸਰੇ ਛੱਡ ਬੰਦੂਕ ਹਿੱਕ ਨਾਲ ਲਾ ਕੇ ਤੁਰਿਆ ਅਲਬੇਲਾ ਸ਼ਾਇਰ ਬਾਬਾ ਮਾਨੋਚਾਹਲ ਆਪਣੇ ਸੁਭਚਿੰਤਕਾਂ ਦੇ ਬਦਲੇ ਚਿਹਰੇ ਤੇ ਕੋਰੇ ਜਵਾਬ ਪਤਾ ਨਹੀ ਕਿਹੜੇ ਜਿਗਰੇ ਨਾਲ ਸਹਾਰ ਗਿਆ ਹੋਣੈ। ਸ਼ਾਇਦ ਬਾਬਾ ਫਰੀਦ ਜੀ ਦਾ ਇਹ ਸ਼ਬਦ ਉਸਦੇ ਰੋਮ-ਰੋਮ 'ਚ ਵੱਸ ਗਿਆ ਹੋਣੈ। "ਫਰੀਦਾ ਸਾਹਿਬ ਦੀ ਕਰ ਚਾਕਰੀ
ਦਿਲ ਦੀ ਲਾਹਿ ਭਰਾਂਦਿ
ਦਰਵੇਸ਼ਾਂ ਨੋ ਲੋੜੀਐ ਰੁਖਾਂ ਦੀ ਜੀਰਾਂਦਿ" ਲੱਖ ਵਾਰ ਸਿਜਦਾ ਇਹੋ ਜਿਹੇ ਦੂਰ ਦ੍ਰਿਸ਼ਟੀ ਵਾਲੇ ਜਰਨੈਲ ਨੂੰ ਜਿਹੜਾ ਕੌਮ ਨੂੰ ਸੁਚੇਤ ਕਰਦਾ ਰਿਹਾ ਤੇ ਆਪਣਾ ਪਰਿਵਾਰ ਗੁਆ ਗਿਆ। | 
_urskt898.png)
