ਸਿਰ ’ਤੇ ਸਜੀ ਹੋਵੇ ਜੇ ਦਸਤਾਰ, ਸੋਈ ਜਾਣੀਐ ਸਿੰਘ ਸਰਦਾਰ।
ਪੰਜ ਕਕਾਰ ਜੋ ਸ਼ਰਧਾ ਨਾਲ ਧਾਰੇ, ਗੁਰੂ ਗੋਬਿੰਦ ਸਿੰਘ ਨੂੰ ਸੋ ਪਿਆਰੇ।
ਲੱਖਾਂ ਵਿੱਚੋਂ ਜੋ ਪਹਿਚਾਣਿਆ ਜਾਵੇ, ਸੋਈ ਸਿੰਘ ਨਿਆਰਾ ਜਾਣਿਆ ਜਾਵੇ।
ਨਿੱਤਨੇਮ ਵਿਚ ਜੋ ਸਦਾ ਹੈ ਪੱਕਾ, ਰਹਿਤ-ਬਹਿਤ ਦਾ ਜੋ ਨਹੀਂ ਹੈ ਕੱਚਾ।
ਨਿੰਦਿਆ ਚੁਗਲੀ ਜੋ ਨਹੀਂ ਹੈ ਕਰਦਾ, ਹਾਮੀ ਝੂਠ ਦੀ ਜੋ ਕਦੇ ਨਾ ਭਰਦਾ।
ਸੋਹਣੀ ਪੱਗੜੀ ਜੋ ਸਦਾ ਸਜਾਵੇ, ਇਕ ਅਕਾਲ ਦਾ ਉਹ ਨਾਮ ਧਿਆਵੇ।
ਦੇਗ-ਤੇਗ ਜੋ ਸਦਾ ਚਲਾਉਂਦਾ, ਮੜ੍ਹੀ ਮਸਾਣ ਨਾ ਫੇਰਾ ਪਾਉਂਦਾ।
ਨਸ਼ਾ ਨਾ ਕੋਈ ਕਰਦਾ ਹੋਵੇ, ਅਮਲ ਹੋਵੇ ਸਿਰਫ ਰੋਟੀ ਦਾ।
ਕਿਰਤ-ਵਿਰਤ ਜੋ ਕਰਦਾ ਹੋਵੇ, ਗਰੀਬ ਦਾ ਮੂੰਹ ਜਾਣੇ ਗੋਲਕ ਦਾ।
ਤੇਗ ਗਿਆਨ ਦੀ ਕੱਢ ਜਿਹੜਾ, ਅਗਿਆਨਤਾ ਦਾ ਦੇਵੇ ਫਸਤਾ ਵੱਢ।
ਸੋਈ ਜਾਣੀਐ ਸਿੰਘ ਨਿਆਰਾ, ਵਹਿਮ-ਭਰਮ ਜੋ ਦੇਵੇ ਛੱਡ।
‘ਚੇਤਨ’ ਸਿੰਘ ਸੋਈ ਸੱਚਾ ਜਾਣੀਐ, ਜੋ ਇਨ੍ਹਾਂ ਗੁਣਾਂ ਵਿਚ ਹੋਵੇ ਪ੍ਰਪੱਕ।
ਸੱਚੇ ਧਰਮ ਵਾਲੀ ਗੱਲ ਸੁਣਾਉਣਾ, ਜੋ ਆਪਣਾ ਸਮਝੇ ਹੱਕ।