11 ਅਕਤੂਬਰ 1945 ਵਾਲੇ ਦਿਨ, ਸ਼੍ਰੋਮਣੀ ਕਮੇਟੀ ਵੱਲੋਂ ਬਣਾਈ ਚਾਰ ਮੈਂਬਰੀ ਧਾਰਮਿਕ ਸਲਾਹਕਾਰ ਕਮੇਟੀ ਦੀ ਰਿਪੋਰਟ ਵਿਚ, ਤਸਦੀਕ ਕੀਤਾ ਗਿਆ ਕਿ ਕਰਤਾਰਪੁਰੀ ਬੀੜ ਵਿਚ "ਰਾਗਮਾਲਾ' ਮੌਜੂਦ ਹੈ।

ਸ੍ਰੀ ਗੁਰੂ ਗ੍ਰੰਥ ਸਾਹਿਬ ਜੀ ਦੀ ਬਹੁ-ਚਰਚਿਤ ਆਦਿ-ਬੀੜ ‘ ਕਰਤਾਰਪੁਰੀ ਬੀੜ’ ਦੇ ਨਾਂ ਵਜੋਂ ਪ੍ਰਸਿੱਧ ਹੈ। ਇਸ ਪਾਵਨ ਬੀੜ ਸਾਹਿਬ ਬਾਰੇ ਆਮ ਰਾਏ ਹੈ ਕਿ ਇਸੇ ਪਾਵਨ ਬੀੜ ਸਾਹਿਬ ਨੂੰ ਗੁਰੂ ਅਰਜਨ ਦੇਵ ਜੀ ਨੇ ਭਾਈ ਗੁਰਦਾਸ ਜੀ ਤੋਂ ਲਿਖਵਾ ਕੇ ਸੰਮਤ 1661 ਬਿ. ਮੁਤਾਬਿਕ 1604 ਈ. ਵਿਚ ਸੰਪੂਰਣ ਕੀਤਾ ਸੀ।

ਇਸ ਦੀ ਪ੍ਰਮਾਣਿਕਤਾ ਬਾਰੇ ਵਾਦ-ਵਿਵਾਦ ਸਰਦਾਰ ਜੀ.ਬੀ. ਸਿੰਘ ਦੀ ਪੁਸਤਕ ‘ ਪ੍ਰਾਚੀਨ ਬੀੜਾਂ ’ ਦੇ ਛਪਣ ਤੋਂ ਬਾਅਦ ਹੀ ਸ਼ੁਰੂ ਹੋਇਆ ਸੀ। ਭਾਵੇਂ ‘ ਰਾਗਮਾਲਾ ’ ਬਾਰੇ ਵਿਵਾਦ ਪਹਿਲਾਂ ਹੀ ਸ਼ੁਰੂ ਹੋ ਚੁੱਕਾ ਸੀ। ਸੋ ‘ ਰਾਗਮਾਲਾ’ ਸੰਬੰਧੀ ਚਲੇ ਇਸ ਵਾਦ-ਵਿਵਾਦ ਨੂੰ ਠਲ੍ਹ ਪਾਉਣ ਦੇ ਲਈ ਸ਼੍ਰੋਮਣੀ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਵੱਲੋਂ ਇਕ ਚਾਰ ਮੈਂਬਰੀ ਧਾਰਮਿਕ ਸਲਾਹਕਾਰ ਕਮੇਟੀ ਬਣਾਈ ਗਈ। ਇਸ ਚਾਰ ਮੈਂਬਰੀ ਕਮੇਟੀ ਨੇ ਕਰਤਾਰਪੁਰੀ ਬੀੜ ਦੀ ਪ੍ਰਮਾਣਿਕਤਾ ਨਿਸ਼ਚਿਤ ਕਰਨ ਦੇ ਲਈ ਰਿਪੋਰਟ ਤਿਆਰ ਕਰਣੀ ਸੀ। ਇਸ ਕਮੇਟੀ ਵਿਚ ਭਾਈ ਜੋਧ ਸਿੰਘ, ਪ੍ਰੋ. ਤੇਜਾ ਸਿੰਘ, ਪ੍ਰਿੰਸੀਪਲ ਗੰਗਾ ਸਿੰਘ ਆਦਿ ਸ਼ਾਮਲ ਸਨ।

11 ਅਕਤੂਬਰ 1945 ਵਾਲੇ ਦਿਨ ਇਸ ਕਮੇਟੀ ਦੀ ਰਿਪੋਰਟ ਵਿਚ ਇਹ ਤਸਦੀਕ ਕੀਤੀ ਗਈ ਕਿ ਕਰਤਾਰਪੁਰੀ ਬੀੜ ਸਾਹਿਬ ਵਿਚ ‘ ਰਾਗਮਾਲਾ’ ਮੌਜੂਦ ਹੈ। ਇਸ ਤੋਂ ਬਾਦ ਅਗਸਤ 1946 ਈ. ਵਿਚ ਕਮੇਟੀ ਦੇ ਮੈਬਰ ਭਾਈ ਜੋਧ ਸਿੰਘ ਜੀ ਇਸ ਬੀੜ ਸਾਹਿਬ ਦੇ ਦੁਬਾਰਾ ਦਰਸ਼ਨ ਕਰਣ ਦੇ ਲਈ ਗਏ ਅਤੇ ਆਪਣੇ ਨਾਲ ‘ ਖ਼ਾਲਸਾ ਸਮਾਚਾਰ’ ਦੇ ਸੰਪਾਦਕ ਗਿਆਨੀ ਮਹਾਂ ਸਿੰਘ ਨੂੰ ਵੀ ਲੈ ਗਏ। ਇਨ੍ਹਾਂ ਨੇ ਬੜੇ ਵਿਸਤਾਰ ਦੇ ਨਾਲ ਇਸ ਪਾਵਨ ਬੀੜ ਸਾਹਿਬ ਤੋਂ ਨੋਟਸ ਬਣਾਏ ਅਤੇ ਉਤਾਰੇ ਕੀਤੇ। ਇਹ ਉਤਾਰੇ ਟ੍ਰੇਸਿੰਗ ਦੇ ਰੂਪ ਲਏ ਗਏ। ਸੰਨ 1968 ਈ.ਵਿਚ ਪੰਜਾਬੀ ਯੂਨੀਵਰਸਿਟੀ ਵਲੋਂ ਇਕ ਪੁਸਤਕ ਛਾਪੀ ਗਈ ਜਿਸਦਾ ਨਾਂ 'ਕਰਤਾਰਪੁਰੀ ਬੀੜ ਦੇ ਦਰਸ਼ਨ’ ਰੱਖਿਆ ਗਿਆ। ਇਸ ਵਿੱਚ ਇਸ ਗੱਲ ਨੂੰ ਸਾਬਿਤ ਕਰਨ ਦੇ ਤੱਥ ਦਿੱਤੇ ਗਏ ਹਨ ਕਿ ਪੰਚਮ ਪਾਤਸ਼ਾਹ ਗੁਰੂ ਅਰਜਨ ਦੇਵ ਜੀ ਵੱਲੋਂ ਤਿਆਰ ਕਰਵਾਈ ਗਈ ਇਹੋ ਬੀੜ ਹੀ ਅਸਲ ਹੈ ਅਤੇ ਇਸ ਵਿੱਚ ਰਾਗਮਾਲਾ ਮੌਜੂਦ ਹੈ।