17 ਅਕਤੂਬਰ 1935 ਵਾਲੇ ਦਿਨ ਫਲਾਇੰਗ ਸਿੱਖ ਸਰਦਾਰ ਮਿਲਖਾ ਸਿੰਘ ਦਾ ਜਨਮ ਗੋਵਿੰਦਪੁਰਾ ਮੁਜ਼ੱਫਰਗੜ੍ਹ ਪਾਕਿਸਤਾਨ ਵਿਖੇ ਹੋਇਆ।

ਫਲਾਇੰਗ ਸਿੱਖ ਵਜੋਂ ਜਾਣੇ ਜਾਂਦੇ ਸਰਦਾਰ ਮਿਲਖਾ ਸਿੰਘ ਦਾ ਜਨਮ 17 ਅਕਤੂਬਰ 1935 ਵਾਲੇ ਦਿਨ ਗੋਵਿੰਦਪੁਰਾ ਮੁਜ਼ੱਫਰਗੜ੍ਹ ਪਾਕਿਸਤਾਨ ਵਿਖੇ ਹੋਇਆ। ਪਾਕਿਸਤਾਨ ਦੇ ਰਿਕਾਰਡ ਵਿੱਚ ਆਪ ਜੀ ਦੀ ਜਨਮ ਤਿਥੀ, 20 ਨਵੰਬਰ 1929 ਲਿਖੀ ਹੈ ਅਤੇ ਜਨਮ ਸਥਾਨ ਗੋਵਿੰਦਪੁਰਾ ਲਿਖਿਆ ਹੈ,ਜਿੱਥੇ ਆਪ ਦਾ ਜਨਮ, ਸਿੱਖ ਰਾਠੌਰ ਰਾਜਪੂਤ ਪਰਿਵਾਰ ਵਿਚ ਹੋਇਆ ਲਿਖਿਆ ਹੈ।

ਆਪ ਨੂੰ ਉਡਣਾ ਸਿੱਖ ਭਾਵ ਫਲਾਇੰਗ ਸਿੱਖ ਦੇ ਨਾਮ ਦੇ ਨਾਲ ਵੀ ਜਾਣਿਆ ਜਾਂਦਾ ਹੈ। ਭਾਰਤੀ ਦੌੜਾਕ ਦੀ ਹੈਸੀਅਤ ਵਜੋਂ ਆਪ ਨੇ ਸਾਲ 1960 ਦੇ ਦੋਰਾਨ, ਸਮਰ ਓਲੰਪਿਕ ਵਿੱਚ ਰੋਮ ਵਿਖੇ ਭਾਰਤ ਦੀ ਨੁਮਾਇੰਦਗੀ ਕੀਤੀ ਅਤੇ ਸਾਲ 1964 ਦੇ ਦੋਰਾਨ ਸਮਰ ਓਲੰਪਿਕ ਵਿੱਚ ਟੋਕੀਓ ਵਿਖੇ ਭਾਰਤ ਦੀ ਨੁਮਾਇੰਦਗੀ ਕੀਤੀ। 2010 ਕਾਮਨਵੈਲਥ ਖੇਡਾਂ ਵਿੱਚ ਆਪ ਭਾਰਤ ਦੇ ਅਜਿਹੇ ਇੱਕੋ ਇਕ ਅਥਲੀਟ ਸਨ ਜਿਹਨਾਂ ਨੇ ਭਾਰਤ ਨੂੰ ਅਥਲੈਟਿਕ ਵਿਚ ਨਿੱਜੀ ਤੌਰ 'ਤੇ ਸੋਨੇ ਦਾ ਤਗਮਾ ਦਿਵਾਇਆ। ਸਰਦਾਰ ਮਿਲਖਾ ਸਿੰਘ ਨੂੰ ਖੇਡਾਂ ਵਿਚ ਉਹਨਾਂ ਦੀ ਪ੍ਰਾਪਤੀਆਂ ਕਰ ਕੇ ਭਾਰਤ ਸਰਕਾਰ ਵੱਲੋਂ, "ਪਦਮ ਸ੍ਰੀ" ਦੇ ਸਨਮਾਨ ਦੇ ਨਾਲ ਨਿਵਾਜ਼ਿਆ ਗਿਆ।

ਸਰਦਾਰ ਮਿਲਖਾ ਸਿੰਘ ਦੇ 15 ਭੈਣ ਭਰਾ ਸਨ, ਜਿਹਨਾਂ ਵਿੱਚੋ 8 ਦਾ, ਭਾਰਤ ਪਾਕਿ ਵੰਡ ਤੋਂ ਪਹਿਲਾ ਹੀ ਦੇਹਾਂਤ ਹੋ ਚੁੱਕਾ ਸੀ। ਸਾਲ 1947 ਵਿੱਚ ਭਾਰਤ ਨੂੰ ਟੁਕੜਿਆਂ ਵਿੱਚ ਵੰਡ ਦਿੱਤਾ ਗਿਆ ਅਤੇ ਵੰਡ ਦੇ ਦੌਰਾਨ ਹੋਈ ਕਤਲੋ ਗਾਰਦ ਵਿੱਚ ਸਰਦਾਰ ਮਿਲਖਾ ਸਿੰਘ ਨੇ ਆਪਣੇ ਮਾਤਾ ਪਿਤਾ, ਇੱਕ ਭਰਾ ਅਤੇ ਦੋ ਭੈਣਾਂ ਨੂੰ ਆਪਣੀਆਂ ਅੱਖਾਂ ਦੇ ਸਾਹਮਣੇ ਮਰਦਿਆਂ ਦੇਖਿਆ ਸੀ।

ਸਰਦਾਰ ਮਿਲਖਾ 1955 ਵਿਚ ਸੀਲੋਨ ਵਿਖੇ ਬੀਬੀ ਨਿਰਮਲ ਕੌਰ ਨੂੰ ਇੱਕ ਖੇਡ ਮੇਲੇ ਦੇ ਦੌਰਾਨ ਮਿਲੇ ਜੋ ਕੇ ਭਾਰਤ ਵਲੋਂ ਔਰਤਾਂ ਦੀ ਵਾਲੀਵਾਲ ਟੀਮ ਦੀ ਕਪਤਾਨ ਸੀ। 1962 ਵਿਚ ਆਪ ਨੇ ਬੀਬੀ ਨਿਰਮਲ ਕੌਰ ਦੇ ਨਾਲ ਅਨੰਦ ਕਾਰਜ ਕਰਵਾ ਲਿਆ। ਉਹਨਾਂ ਦੇ ਤਿੰਨ ਬੇਟੀਆਂ ਤੇ ਇੱਕ ਬੇਟਾ ਹੈ। ਸਾਲ 1999 ਵਿਚ ਆਪ ਨੇ ਟਾਈਗਰ ਹਿੱਲ ਦੀ ਲੜਾਈ ਵਿਚ ਸ਼ਹੀਦ ਹੋਏ ਹਵਾਲਦਾਰ ਬਿਕਰਮ ਸਿੰਘ ਦੇ 7 ਵਰ੍ਹਿਆਂ ਦੇ ਬੇਟੇ ਨੂੰ ਗੋਦ ਲੈ ਕੇ ਸਿੱਖੀ ਦੀ ਮਹਾਨ ਪਰੰਪਰਾ ਨੂੰ ਨਿਭਾਇਆ।

18 ਜੂਨ, 2021 ਵਾਲੇ ਦਿਨ ਚੰਡੀਗੜ੍ਹ ਦੇ ਪੀ ਜੀ ਆਈ ਹਸਪਤਾਲ ਵਿਚ ਕਰੋਨਾ ਦੀ ਨਾਮੁਰਾਦ ਬਿਮਾਰੀ ਦੇ ਨਾਲ ਆਪ ਦਾ ਦੇਹਾਂਤ ਹੋ ਗਿਆ।