ਡੱਟਣਾ ਜ਼ੁਲਮ ਖ਼ਿਲਾਫ ਤੇ ਅਣਖ ਨਾਲ ਜਿਊਣਾ ਦੱਸਦੀ ਏ,
ਸਹਿਜ ’ਚ ਰਹਿ ਕੇ ਜਿਹੜੀ ਸਾਨੂੰ ਨਿਊਣਾ ਦੱਸਦੀ ਏ,
ਢਾਰਸ ਬਣ ਕੇ ਵਿਚਰੇ ਜਿਹੜੀ ਖੂਬ ਦੁਖਾਲੇ ਦੀ,
ਭੁੱਲਣੀ ਨਈਂ ਕੁਰਬਾਨੀ ਸਤਿਗੁਰ ਬਾਜ਼ਾਂ ਵਾਲੇ ਦੀ। ਨ੍ਹੇਰਿਆਂ ਦੇ ਸੰਗ ਲੜਨਾ ਜਿਹੜੀ ਜਾਚ ਸਿਖਾਉਂਦੀ ਏ,
ਚੜ੍ਹਦੀ ਕਲਾ ਦੇ ਹਰਦਮ ਜਿਹੜੀ ਸੋਹਲੇ ਗਾਉਂਦੀ ਏ
ਰਹਿਣੀ ਹਰ ਪਲ ਜਗਦੀ ਜਗ ’ਤੇ ਜੋਤ ਉਜਾਲੇ ਦੀ।
ਭੁੱਲਣੀ ਨਈਂ ਕੁਰਬਾਨੀ ਸਤਿਗੁਰ ਬਾਜ਼ਾਂ ਵਾਲੇ ਦੀ। ਪੰਥ ਸਜਾ ਕੇ ਸਤਿਗੁਰ ਗਾਡੀ ਰਾਹ ਦਰਸਾਇਆ ਏ,
ਦੱਬੀ ਕੁਚਲੀ ਜਨਤਾ ਨੂੰ ਉਸ ਗ਼ਲ ਨਾਲ ਲਾਇਆ ਏ,
ਰੱਖਿਆ ਕਰਨੀ ਦੱਸਿਆ ਸਤਿਗੁਰ ਭੋਲੇ ਭਾਲੇ ਦੀ।
ਭੁੱਲਣੀ ਨਈਂ ਕੁਰਬਾਨੀ ਸਤਿਗੁਰ ਬਾਜ਼ਾਂ ਵਾਲੇ ਦੀ। ਵਾਰ ਦਿੱਤਾ ਪਰਵਾਰ ਤੇ ਡੁੱਬਦੀ ਹਿੰਦ ਬਚਾ ਲਈ ਸੀ,
ਜ਼ੁਲਮ ਹਨ੍ਹੇਰ ਮਿਟਾਵਣ ਲਈ ਤਲਵਾਰ ਉਠਾ ਲਈ ਸੀ,
ਹੋਸ਼ ਉਡਾ ’ਤੀ ਸਤਿਗੁਰ ਨੇ ਪੁੱਠੀ ਮੱਤ ਵਾਲੇ ਦੀ।
ਭੁੱਲਣੀ ਨਈਂ ਕੁਰਬਾਨੀ ਸਤਿਗੁਰ ਬਾਜ਼ਾਂ ਵਾਲੇ ਦੀ। ਰਹਿਤ ਪਿਆਰੀ ਦੱਸਿਆ ਸਤਿਗੁਰ ਸਿੱਖ ਨੂੰ ਦੱਸਿਆ ਨਈਂ,
ਜਿਸਦੇ ਹੋਣ ਅਸੂਲ ਨਾ ਉਸ ਦਾ ਕੁਝ ਵੀ ਬਚਿਆ ਨਈਂ,
ਅੰਦਰੋਂ ਜੁੜਨਾ ਦੱਸਿਆ ਕੋਈ ਨਾ ਲੋੜ ਵਖਾਲੇ ਦੀ।
ਭੁੱਲਣੀ ਨਈਂ ਕੁਰਬਾਨੀ ਸਤਿਗੁਰ ਬਾਜ਼ਾਂ ਵਾਲੇ ਦੀ। ਆਓ! ਉਸਦੀ ਸੋਚ ਨਾਲ ਆਪਾ ਸਾਂਝਾਂ ਪਾ ਲਈਏ,
ਤਨ ਮਨ ਵਾਰ ਕੇ ਆਪਾਂ ਜੇ ਦਿਲ ਤੋਂ ਅਪਣਾਅ ਲਈਏ,
ਸੁਧਰੂ ਜੂਨ ‘ਗੰਭੀਰਾ’ ਤੇਰੇ ਆਲੇ-ਦੁਆਲੇ ਦੀ।
ਭੁੱਲਣੀ ਨਈਂ ਕੁਰਬਾਨੀ ਸਤਿਗੁਰ ਬਾਜ਼ਾਂ ਵਾਲੇ ਦੀ। | 
