ਤੂੰ ਰੁਕਣਾ ਨਹੀਂ ਸਿੱਖਿਆ, ਤੂੰ ਝੁਕਣਾ ਨਹੀਂ ਸਿੱਖਿਆ,
ਮੁੱਲ ਸਿਰਾਂ ਦੇ ਪਵਾਏ, ਪਰ ਵਿਕਣਾ ਨਹੀਂ ਸਿੱਖਿਆ।
ਬਿਨਾ ਸੀਸ ਲੜਿਆ, ਤੂੰ ਖੋਪਰ ਲੁਹਾਏ,
ਬੰਦ ਬੰਦ ਕਟਵਾਏ, ਦੋ ਫਾੜ ਸੀ ਕਰਾਏ,
ਦੋ ਧਾਰੀ ਤਲਵਾਰ ਉੱਤੇ ਨੱਚਣਾ ਤੂੰ ਸਿੱਖਿਆ,
ਤੂੰ ਰੁਕਣਾ ਨਹੀਂ …………।

ਦੇਗਾਂ ਦੇ ਵਿਚ ਤੂੰ ਉਬਾਲੇ ਸੀ ਖਾਂਦਾ,
ਚਰਖੜੀਆਂ ਦੇ ਉਤੇ ਸ਼ੁਕਰ ਓਸ ਦਾ ਮਨਾਂਦਾ,
ਰੂੰ ਵਿਚ ਲਿਪਟਿਆ, ਤਨ ਆਪਣਾ ਜਲਾਂਦਾ,
ਸਿੱਖੀ ਕੇਸਾਂ-ਸਵਾਸਾਂ ਦੇ ਨਾਲ, ਨਿਭਾਉਣਾ ਤੂੰ ਸਿੱਖਿਆ,
ਤੂੰ ਰੁਕਣਾ ਨਹੀਂ …………।

ਖੰਨੀ ਖੰਨੀ ਉਤੇ ਗੁਜ਼ਾਰਾ ਸੀ ਕੀਤਾ,
ਪਾਣੀ ਦੇ ਬਜਾਏ ਖੂਨ ਆਪਣਾ ਸੀ ਪੀਤਾ,
ਟੋਟੇ ਟੋਟੇ ਕਰਵਾਏ, ਗਲ਼ ਹਾਰ ਸੀ ਪਵਾਏ,
ਮਾਂ! ਮੰਨੀ ਨਾ ਈਨ ਵੈਰੀ ਤੋਂ, ਤੂੰ ਡੋਲਣਾ ਨੀ ਸਿੱਖਿਆ,
ਤੂੰ ਰੁਕਣਾ ਨਹੀਂ …………।

ਗੜ੍ਹੀ ਕੱਚੀ ਚਮਕੌਰ ਦੀ, ਨੀਂਹ ਪੱਕੀ ਸਰਹਿੰਦ ਦੀ,
ਨਿੱਕੀਆਂ ਜਿੰਦਾਂ ਵੱਡੇ ਸਾਕੇ ਵੇਖ, ਰੂਹ ਜਾਲਮਾਂ ਦੀ ਕੰਬਦੀ
ਬੋਲੇ ਸੋ ਨਿਹਾਲ ਦਾ ਜੈਕਾਰਾ ਗੱਜਾਉਣਾ ਤੂੰ ਸਿੱਖਿਆ,
ਤੂੰ ਰੁਕਣਾ ਨਹੀਂ …………।

ਜੇ ਰਹੀਏ ਰਹਿਤ ਵਿਚ ਨਿਆਰੇ, ਤਾਂ ਕੌਮ ਕਦੇ ਵੀ ਨਾ ਹਾਰੇ,
ਮਨ ਦੀ ਮੈਲ ਦੂਰ ਕਰ, ਗੁਰਬਾਣੀ ਲੜ ਲੱਗੀਏ ਸਾਰੇ
ਨਾਮ ਜਪਣਾ, ਵੰਡ ਛਕਣਾ, ਕਿਰਤ ਕਰਨਾ ‘ਬਟਾਲਵੀ’ ਤੂੰ ਸਿੱਖਿਆ
ਤੂੰ ਰੁਕਣਾ ਨਹੀਂ ਸਿੱਖਿਆ, ਤੂੰ ਝੁਕਣਾ ਨਹੀਂ ਸਿੱਖਿਆ,
ਮੁੱਲ ਸਿਰਾਂ ਦੇ ਪਵਾਏ, ਪਰ ਵਿਕਣਾ ਨਹੀਂ ਸਿੱਖਿਆ।