ਇਹ ਬੂਟਾ ਦੇਖੋ ਸਿੱਖੀ ਦਾ, ਅੱਜ ਝੁੱਲ ਰਿਹਾ ਆਸਮਾਨ ਦੇ ਅੰਦਰ।
ਜੜ੍ਹ ਇਹਦੀ ਪਾਤਾਲ ਦੇ ਅੰਦਰ, ਸਿਖ਼ਰ ਇਹਦਾ ਅਸਮਾਨ ਦੇ ਅੰਦਰ। ਗੁਰੂ ਨਾਨਕ ਬੂਟਾ ਲਾਇਆ ਏ, ਗੁਰੂ ਅੰਗਦ ਪਾਣੀ ਪਾਇਆ ਏ।
ਗੁਰੂ ਅਮਰਦਾਸ ਨੇ ਸੇਵਾ ਕਰ ਕੇ, ਫਲ ਮਿੱਠਾ ਲਾ ਦਿਖਾਇਆ ਏ।
ਗੁਰੂ ਰਾਮਦਾਸ ਨੇ ਹੁਕਮ ਮੰਨ ਕੇ,ਪਿਆਰ ਦਾ ਰਸ ਚੁਆਇਆ ਏ
ਗੁਰੂ ਅਰਜਨ ਫਿਰ ਰੰਗਤ ਦਿੱਤੀ, ਜਦੋਂ ਖ਼ੂਨ ਫੁਹਾਰਾ ਲਾਇਆ ਏ।
ਜੋ ਭਾਣਾ ਮੰਨਿਆ ਮਿੱਠਾ ਕਰ ਕੇ, ਹੈ ਕੋਈ ਅੱਜ ਜਹਾਨ ਦੇ ਅੰਦਰ।
ਇਹ ਬੂਟਾ ਦੇਖੋ ਸਿੱਖੀ ਦਾ, ਅੱਜ ਝੂਲ ਰਿਹਾ ਅਸਮਾਨ ਦੇ ਅੰਦਰ। ਗੁਰੂ ਹਰਿਗੋਬਿੰਦ ਨੇ ਰਾਖੀ ਕੀਤੀ, ਪਹਿਰਾ ਲਾ ਤਲਵਾਰਾਂ ਦਾ।
ਗੁਰੂ ਹਰਿਰਾਇ ਨੇ ਰੋਕ ਰੱਖਿਆ, ਸੇਕ ਸੀ ਜੋ ਅੰਗਿਆਰਾਂ ਦਾ।
ਗੁਰੂ ਹਰਿਕ੍ਰਿਸ਼ਨ ਨੇ ਹੋਰ ਝੁਲਾਇਆ, ਦੁੱਖ ਹਰ ਕੇ ਬੀਮਾਰਾਂ ਦਾ।
ਗੁਰੂ ਤੇਗ ਬਹਾਦਰ ਧਰਮ ਦੀ ਚਾਦਰ, ਮੂੰਹ ਮੋੜਿਆ ਸਰਕਾਰਾਂ ਦਾ।
ਜ਼ੁਲਮ ਦੀ ਜਦੋਂ ਹੱਦ ਸੀ ਹੋਈ, ਝੱਟ ਆਏ ਮੈਦਾਨ ਦੇ ਅੰਦਰ।
ਇਹ ਬੂਟਾ ਦੇਖੋ ਸਿੱਖੀ ਦਾ. . . ਦਸਵੇਂ ਗੁਰੂ ਗੋਬਿੰਦ ਸਿੰਘ ਜੀ ਨੇ, ਐਸੀ ਬਣਤ ਬਣਾਈ ਏ।
ਭਗਤੀ ਦੇ ਨਾਲ ਸ਼ਕਤੀ ਭਰ ਕੇ, ਖੰਡੇ ਦੀ ਪਾਣ ਚੜ੍ਹਾਈ ਏ।
ਗਿੱਦੜਾਂ ਤੋਂ ਸ਼ੇਰ ਬਣਾਇਆ, ਸੁੱਤੀ ਅਣਖ ਜਗਾਈ ਏ। ਏ।
ਆਪੇ ਗੁਰੂ ਤੇ ਆਪੇ ਚੇਲਾ, ਅਨੋਖੀ ਰੀਤ ਚਲਾਈ ਏ।
ਪੰਥ ਲਈ ਸਰਬੰਸ ਵਾਰਿਆ, ਫਿਰ ਵੀ ਰਹੇ ਸ਼ੁਕਰਾਨ ਦੇ ਅੰਦਰ।
ਇਹ ਬੂਟਾ ਦੇਖੋ ਸਿੱਖੀ ਦਾ. . . ਕਈਆਂ ਕੋਸ਼ਿਸ਼ ਕੀਤੀ ਵੱਢਣ ਦੀ, ਕਈਆਂ ਫੜ ਹਲੂਣਿਆਂ ਇਸ ਨੂੰ,
ਕਈਆਂ ਇਸਦੇ ਬੰਦ-ਬੰਦ ਕੱਟੇ, ਕਈਆਂ ਫੜ੍ਹ ਮਚਕੂਣਿਆ ਇਸ ਨੂੰ,
ਕਈਆਂ ਇਸ ਨੂੰ ਚਰਖੀ ਚਾੜਿਆ, ਰੂੰ ਦੇ ਵਾਂਗ ਪਿੰਜੂਣਿਆਂ ਇਸ ਨੂੰ,
ਕਈਆਂ ਖੋਪਰ ਸਿਰੋਂ ਉਤਾਰੇ ਵਾਲੋਂ ਫੜ ਝੰਜੂਣਿਆਂ ਇਸ ਨੂੰ।
ਸਬਰ ਸਿਦਕ ਤੇ ਭਾਣਾ ਮੰਨ ਕੇ, ਸਦਾ ਰਿਹਾ ਮੁਸਕਾਨ ਦੇ ਅੰਦਰ।
ਇਹ ਬੂਟਾ ਦੇਖੋ ਸਿੱਖੀ ਦਾ. . . ਸਵਾ-ਸਵਾ ਮਣ ਪੀਸਣ ਪੀਸੇ ਐਪਰ ਐਸਾ ਸਿਦਕ ਨਿਭਾਇਆ ਸੀ।
ਟੋਟੇ ਕਰ ਕੇ ਬੱਚਿਆਂ ਦੇ ਗ਼ਲ਼ ਵਿਚ ਹਾਰ ਪੁਆਇਆ ਸੀ।
ਆਰੇ ਨਾਲ ਦੋਫ਼ਾੜ ਵੀ ਕੀਤਾ, ਵਿਚ ਰੂੰ ਦੇ ਪਾ ਜਲਾਇਆ ਸੀ।
ਦੇਗਾਂ ਵਿਚ ਉਬਾਲਿਆ ਇਸ ਨੂੰ, ਕਈ ਵਾਰੀ ਮਾਰ ਮੁਕਾਇਆ ਸੀ।
ਜ਼ਾਲਮ ਜਦੋਂ ਜੜ੍ਹੋਂ ਹੱਥ ਪਾਇਆ ਬਿਨਾਂ ਸਿਰ ਤੋਂ ਲੜੇ ਮੈਦਾਨ ਦੇ ਅੰਦਰ।
ਇਹ ਬੂਟਾ ਦੇਖੋ ਸਿੱਖੀ ਦਾ . . . ਬਾਬਰ ਹਮਾਯੂੰ ਅਕਬਰ ਵਰਗੇ ਜਹਾਂਗੀਰ ਤੇ ਸ਼ਾਹਜਹਾਨ,
ਔਰੰਗਜ਼ੇਬ ਬਹਾਦਰ ਸ਼ਾਹ ਹੋਰ ਵੀ ਆਏ ਮੁਗ਼ਲ ਪਠਾਨ,
ਮੀਰ ਮੰਨੂ ਅਬਦਾਲੀ ਵਰਗੇ ਮੱਸਾ ਰੰਗੜ, ਜ਼ਕਰੀਆ ਖਾਨ।
ਇਸ ਬੂਟੇ ਨੂੰ ਪੁੱਟਣ ਲਈ, ਸਾਰਿਆਂ ਲਾਇਆ ਪੂਰਾ ਤਾਨ।
ਇੰਦਰਾ ਨੇ ਵੀ ਕਸਰ ਨਹੀਂ ਛੱਡੀ, ਆਪਣੇ ਹਿੰਦੁਸਤਾਨ ਦੇ ਅੰਦਰ।
ਟਾਇਰ ਗ਼ਲਾਂ ਵਿਚ ਪਾ ਕੇ ਸਾੜਿਆ, ਪਰ ਆਇਆ ਨਹੀਂ ਕੁਮਲਾਨ ਦੇ ਅੰਦਰ।
ਇਹ ਬੂਟਾ ਦੇਖੋ ਸਿੱਖੀ ਦਾ. . . ਧੰਨ ਮਾਲੀ ਜਿਨ ਬੂਟਾ ਲਾਇਆ, ਇਹ ਝੂਲੇਗਾ ਅਸਮਾਨ ਦੇ ਅੰਦਰ।
ਹਾਕਮ ਸਿੰਘ ਜੱਗ ਧੰਨ ਧੰਨ ਕਹਿੰਦਾ, ਇਹ ਝੂਲੇਗਾ ਅਸਮਾਨ ਦੇ ਅੰਦਰ।
ਇਹ ਬੂਟਾ ਦੇਖੋ ਸਿੱਖੀ ਦਾ ਅੱਜ ਝੁੱਲ ਰਿਹਾ ਅਸਮਾਨ ਦੇ ਅੰਦਰ।
ਜੜ੍ਹ ਇਹਦੀ ਪਾਤਾਲ ਦੇ ਅੰਦਰ, ਸਿਖ਼ਰ ਇਹਦਾ ਅਸਮਾਨ ਦੇ ਅੰਦਰ। |
