ਮੈਂ ਅਣਜੰਮੀ ਧੀ ਨੀ ਮਾਏ, ਹੱਥ ਜੋੜ ਫਰਿਆਦ ਕਰਾਂ,
ਬਣ ਜਾਵਾਂ ਬਾਬਲ ਦੀ ਜਾਈ, ਜਨਮ ਤੋਂ ਪਹਿਲਾਂ ਕਿਉਂ ਮਰਾਂ?
ਤੇਰੀ ਸੇਵਾ ਕਰੂੰ ਰੱਜ ਕੇ, ਲਾਲਚ ਪਿੱਛੇ ਨਾ ਮਰੀਂ,
ਮੈਨੂੰ ਕੁੱਖ ਦੇ ਵਿਚ ਨਾ ਮਾਰੀਂ, ਤੂੰ ਮਾਏ ਨਾ ਕਹਿਰ ਕਰੀਂ। ਜ਼ਿੰਦਗੀ ਵੀ ਇਕ ਹੱਕ ਹੈ ਮੇਰਾ, ਇਹ ਹੱਕ ਮੈਥੋਂ ਖੋਵੀਂ ਨਾ,
ਜਾਂ ਤੇਰੇ ਘਰ ਜਨਮ ਲਵਾਂਗੀ, ਤੇਲ ਵੀ ਭਾਵੇਂ ਚੋਂਵੀ ਨਾ।
ਸੁਬਹ ਹੋਣ ਤੋਂ ਪਹਿਲਾਂ ਮਾਏ, ਤਿੱਖੀ ਨਾ ਦੁਪਹਿਰ ਕਰੀਂ,
ਮੈਨੂੰ ਕੁੱਖ ਦੇ ਵਿਚ ਨਾ ਮਾਰੀ, ਤੂੰ ਮਾਏ ਨਾ ਕਹਿਰ ਕਰੀਂ। ਕੋਈ ਕਹੇ ਬਘਿਆੜੀ ਮੈਨੂੰ, ਕੋਈ ਖੇਖਣਹਾਰੀ ਹੈ,
ਕੋਈ ਨਾਗਣ ਨਰਕ ਦੁਆਰੀ, ਕੋਈ ਟੂਣੇਹਾਰੀ ਹੈ।
ਪਰ ਤੂੰ ਕਰੀਂ ਵਿਸ਼ਵਾਸ ਮੇਰੇ 'ਤੇ, ਤੂੰ ਵੀ ਨਾ ਕਿਤੇ ਗੈਰ ਕਰੀਂ,
ਮੈਨੂੰ ਕੁੱਖ ਦੇ ਵਿਚ ਨਾ ਮਾਰੀ, ਤੂੰ ਮਾਏ ਨਾ ਕਹਿਰ ਕਰੀਂ, ਗੁਰਮੁਖ ਫਲ ਸੁਖ ਨਿਹਚਉ ਨਾਰੀ, ਭਾਈ ਗੁਰਦਾਸ ਜੀ ਕਹਿੰਦੇ ਨੇ,
ਜੋ ਧੀਆਂ ਨੂੰ ਦੁੱਖ ਪੁਚਾਉਂਦੇ,ਆਖਰ ਦੁਖੜੇ ਸਹਿੰਦੇ ਨੇ।
ਤਨ ਮੇਰੇ ਦੀ ਰਫਲ ਬਣਾ ਕੇ,ਮਤਲਬ ਲਈ ਨਾ ਫਾਇਰ ਕਰੀਂ,
ਮੈਨੂੰ ਕੁੱਖ ਦੇ ਵਿਚ ਨਾ ਮਾਰੀਂ, ਤੂੰ ਮਾਏ ਨਾ ਕਹਿਰ ਕਰੀਂ। ਬਤੀਹ ਸੁਲਖਣੀ ਸਚੁ ਸੰਤਤਿ ਮੈਂ, ਆਗਿਆਕਾਰੀ ਪੂਤ ਬਣੂ,
ਸਭ ਪਰਵਾਰੈ ਮਾਹਿ ਸਰੇਸਟ, ਜਿੰਦਾਂ ਦਿਲ ਸਪੂਤ ਬਣ।
ਬਿਨ ਮਾਲੀ ਨਹੀਂ ਬੂਟਾ ਹੁੰਦਾ, ਪਲ ਤੋਂ ਨਾ ਤੂੰ ਕਿਤੈ ਪਹਿਰ ਕਰੀਂ,
ਮੈਨੂੰ ਕੁੱਖ ਦੇ ਵਿਚ ਨਾ ਮਾਰੀਂ, ਤੂੰ ਮਾਏ ਨਾ ਕਹਿਰ ਕਰੀਂ। ਹਰ ਕੋਈ ਹੱਕ ਮੈਂ ਲੈ ਲਵਾਂਗੀ, ਬਣ ਕੇ ਤੇ ਬਲਵਾਨ
ਸੋ ਕਿਉ ਮੰਦਾ ਆਖੀਐ ਜਿਤੁ ਜੰਮਹਿ ਰਾਜਾਨ,
ਬਾਬੇ ਨਾਨਕ ਨੇ ਵਡਿਆਇਆ, ਸਤਰਾਂ ਦਿਲ ਦੇ ਵਿਚ ਧਰੀਂ।
ਮੈਨੂੰ ਕੁੱਖ ਦੇ ਵਿਚ ਨਾ ਮਾਰੀਂ, ਤੂੰ ਮਾਏ ਨਾ ਕਹਿਰ ਕਰੀਂ। ਰੂਪ ਕੌਰ, ਗੁਰਸ਼ਰਨ ਕੌਰ, ਜਿੰਦਾਂ ਬਣਜੂੰ ਮੈ,
ਮਾਈ ਭਾਗੋ ਵਾਗੂੰ ਹੱਸ ਕੇ, ਸਾਹਵੇਂ ਜ਼ੁਲਮ ਦੇ ਤਣਜੂੰ ਮੈਂ।
ਉੱਚੀ ਵਿੱਦਿਆ ਦੇ ਕੇ ਮੈਨੂੰ ਹਰ ਕਿੱਤੇ ਵਿਚ ਮਾਹਿਰ ਕਰੀਂ,
ਮੈਨੂੰ ਕੁੱਖ ਦੇ ਵਿਚ ਨਾ ਮਾਰੀਂ, ਤੂੰ ਮਾਏ ਨਾ ਕਹਿਰ ਕਰੀਂ। ਧੀਆਂ ਹੋ ਕੇ ਹੀ ਧੀਆਂ ਨੂੰ ਹੀ, ਕਾਹਤੋਂ ਧੀਆਂ ਮਾਰਦੀਆਂ,
ਉਹੀ ਧੀਆਂ ਫਿਰ ਪੁੱਤਰਾਂ ਲਈ, ਆਪਣਾ ਸਭ ਕੁਝ ਹਾਰਦੀਆਂ।
ਲਾਲਚ ਲਈ ਪੁੱਤ ਸੇਵਾ ਕਰਦੇ, ਵਾਸਤਾ ਰੱਬ ਦਾ ਖੈਰ ਕਰੀਂ।
ਮੈਨੂੰ ਕੁੱਖ ਦੇ ਵਿਚ ਨਾ ਮਾਰੀਂ, ਤੂੰ ਮਾਏ ਨਾ ਕਹਿਰ ਕਰੀਂ। ਬਿਨ ਧੀਆਂ ਦੇ ਕੋਈ ਨੀ ਰਿਸ਼ਤਾ, ਇਹ ਦੁਨੀਆ ਬੰਦ ਹੋਜੂਗੀ,
ਚਾਰੇ ਪਾਸੇ ਗਮੀਆਂ ਹੋਵਣ, ਰੌਣਕ ਬੂਹਾ ਢੋਜੂ ਗੀ
ਦਲਬੀਰ ਘਰਿਆਲੀ ਜਿਉਂ ਸਮਝਾਵਣ, ਰੱਬਾ ਪੈਦਾ ਸ਼ਾਇਰ ਕਰੀਂ,
ਮੈਨੂੰ ਕੁੱਖ ਦੇ ਵਿਚ ਨਾ ਮਾਰੀਂ, ਤੂੰ ਮਾਏ ਨਾ ਕਹਿਰ ਕਰੀਂ। |
