ਬਹੁਤ ਘੱਟ ਲੋਕਾਂ ਨੂੰ ਪਤਾ ਹੈ ਕਿ ਸ਼੍ਰੋਮਣੀ ਗੁਰਦੁਆਰਾ ਪ੍ਰਬੰਧਕ ਕਮੇਟੀ, ਸ੍ਰੀ ਅੰਮ੍ਰਿਤਸਰ ਦਾ ਆਪਣਾ ਇੱਕ ਬਹੁਤ ਵੱਡਾ ਪਬਲਿਸ਼ਿੰਗ ਹਾਊਸ ਹੈ। ਸ੍ਰੀ ਗੁਰੂ ਗ੍ਰੰਥ ਸਾਹਿਬ ਜੀ ਦੇ ਪਾਵਨ ਸਰੂਪ, ਗੁਟਕੇ, ਸ਼ਬਦਾਰਥ ਅਤੇ ਹੋਰ ਗੁਰਮਤਿ ਲਿਟਰੇਚਰ ਛਪਵਾ ਕੇ ਸ਼੍ਰੋਮਣੀ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਵੱਲੋਂ ਲਾਗਤ ਮਾਤਰ ਭੇਟਾ ਤੇ ਸੰਗਤਾਂ ਤਕ ਪਹੁੰਚਾਇਆ ਜਾਂਦਾ ਹੈ। ਇਸ ਦਾ ਕੁਝ ਹਿੱਸਾ ਲਾਗਤ ਮਾਤਰ ਤੋਂ ਵੀ ਘੱਟ ਭੇਟਾ ’ਤੇ ਅਤੇ ਵੱਡਾ ਹਿੱਸਾ ਭੇਟਾ ਰਹਿਤ ਵੀ ਗੁਰਮਤਿ ਪ੍ਰੇਮੀਆਂ ਤਕ ਪਹੁੰਚਾਇਆ ਜਾਂਦਾ ਹੈ।

ਸ਼੍ਰੋਮਣੀ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਦੇ ਪ੍ਰਬੰਧ ਹੇਠ ਇਕ ਪ੍ਰੈੱਸ ਸ੍ਰੀ ਗੁਰੂ ਗ੍ਰੰਥ ਸਾਹਿਬ ਭਵਨ, ਅੰਬਾਲਾ ਵਿਖੇ ਹੈ। ਸ਼੍ਰੋਮਣੀ ਪ੍ਰਿੰਟਿੰਗ ਪ੍ਰੈੱਸ ਦਫ਼ਤਰ ਸ਼੍ਰੋਮਣੀ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਵਿਖੇ ਅਤੇ ਗੁਰਦੁਆਰਾ ਪ੍ਰਿੰਟਿੰਗ ਪ੍ਰੈੱਸ ਗੁਰਦੁਆਰਾ ਰਾਮਸਰ ਸਾਹਿਬ, ਸ੍ਰੀ ਅੰਮ੍ਰਿਤਸਰ ਵਿਖੇ ਕਈ ਵਰ੍ਹਿਆਂ ਤੋਂ ਚਲ ਰਹੀਆਂ ਹਨ। ਸ਼੍ਰੋਮਣੀ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਵੱਲੋਂ ਸ੍ਰੀ ਗੁਰੂ ਗ੍ਰੰਥ ਸਾਹਿਬ ਜੀ ਦੇ ਪਾਵਨ ਸਰੂਪ ਅਤੇ ਹੋਰ ਗੁਰਮਤਿ ਲਿਟਰੇਚਰ ਪਹਿਲਾਂ ਜਲੰਧਰ, ਚੰਡੀਗੜ੍ਹ ਤੇ ਦਿੱਲੀ ਦੀਆਂ ਵੱਖ-ਵੱਖ ਪ੍ਰੈੱਸਾਂ ਤੋਂ ਛਪਵਾ ਕੇ ਸੰਗਤਾਂ ਤਕ ਪਹੁੰਚਾਇਆ ਜਾਂਦਾ ਸੀ।

ਗੁਰਮਤਿ ਲਿਟਰੇਚਰ ਦਿੱਲੀ ਅਤੇ ਹੋਰ ਦੂਰ-ਦੁਰੇਡੀਆਂ ਪ੍ਰੈੱਸਾਂ ਤੋਂ ਛਪਵਾਉਣ ਨਾਲ ਇਕ ਤਾਂ ਮਹਿੰਗਾ ਪੈਂਦਾ ਸੀ ਅਤੇ ਸਭ ਤੋਂ ਵੱਡੀ ਘਾਟ ਸੀ ਕਿ ਲਿਟਰੇਚਰ ਦੀ ਛਪਾਈ ਵਿਚ ਪੂਰਨ ਗੁਰ ਮਰਯਾਦਾ ਕਾਇਮ ਰੱਖਣੀ ਸੰਭਵ ਨਹੀਂ ਸੀ। ਇਸ ਲਈ ਸ਼੍ਰੋਮਣੀ ਗੁ: ਪ੍ਰ: ਕਮੇਟੀ ਦੇ ਪ੍ਰਧਾਨ ਗੁਰਪੁਰਵਾਸੀ ਪੰਥ ਰਤਨ ਜਥੇਦਾਰ ਗੁਰਚਰਨ ਸਿੰਘ ਟੌਹੜਾ ਦੀ ਇਹ ਤੀਬਰ ਤਾਂਘ ਸੀ ਕਿ ਸ਼੍ਰੋਮਣੀ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਦੀ ਆਪਣੀ ਆਫਸੈੱਟ ਪ੍ਰੈੱਸ ਹੋਵੇ ਜਿੱਥੇ ਸ੍ਰੀ ਗੁਰੂ ਗ੍ਰੰਥ ਸਾਹਿਬ ਜੀ ਦੇ ਪਾਵਨ ਸਰੂਪਾਂ ਦੀ ਛਪਾਈ ਦਾ ਪ੍ਰਬੰਧ ਗੁਰ ਮਰਯਾਦਾ ਅਨੁਸਾਰ ਹੋ ਸਕੇ। ਗੁਰਦੁਆਰਾ ਸ੍ਰੀ ਰਾਮਸਰ ਸਾਹਿਬ ਵਿਖੇ ਜਿੱਥੇ ਸ੍ਰੀ ਗੁਰੂ ਅਰਜਨ ਦੇਵ ਜੀ ਮਹਾਰਾਜ ਨੇ ਸ੍ਰੀ ਗੁਰੂ ਗ੍ਰੰਥ ਸਾਹਿਬ ਜੀ ਦਾ ਪਹਿਲਾ ਪਾਵਨ ਸਰੂਪ ਭਾਈ ਗੁਰਦਾਸ ਜੀ ਪਾਸੋਂ ਤਿਆਰ ਕਰਵਾਇਆ ਸੀ, ਉਸ ਅਸਥਾਨ ਤੇ ਬਾਬਾ ਖੜਕ ਸਿੰਘ ਕਾਰ ਸੇਵਾ ਵਾਲਿਆਂ ਤੋਂ ਬਾਅਦ ਬਾਬਾ ਦਰਸ਼ਨ ਸਿੰਘ ਬੀੜ ਬਾਬਾ ਬੁੱਢਾ ਜੀ ਠੱਠਾ ਵਾਲਿਆਂ ਵੱਲੋਂ ਸ੍ਰੀ ਗੁਰੂ ਗ੍ਰੰਥ ਸਾਹਿਬ ਭਵਨ ਦਾ ਨਿਰਮਾਣ ਕੀਤਾ ਗਿਆ।

ਗੁਰਦੁਆਰਾ ਰਾਮਸਰ ਸਾਹਿਬ ਦਾ ਤਹਿਖਾਨਾ (ਬੇਸਮੈਂਟ) ਬਾਬਾ ਜੀ ਨੂੰ ਬੇਨਤੀ ਕਰ ਕੇ ਇਸ ਕਾਰਜ ਲਈ ਉਚੇਚੇ ਤੌਰ ਤੇ ਬਣਵਾਇਆ ਗਿਆ। ਸ਼੍ਰੋਮਣੀ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਨੇ 1991 ਈ: ਵਿਚ ਇਕ 23×36 ਸਾਈਜ਼ ਦੀ ਅਹਿਮਦਾਬਾਦ ਦੀ ਬਣੀ ਹੋਈ ਇਕ ਛਪਾਈ ਮਸ਼ੀਨ ਖਰੀਦ ਕੇ ਗੋਲਡਨ ਆਫਸੈੱਟ ਪ੍ਰੈੱਸ ਦਾ ਮੁੱਢ ਬੰਨ ਦਿੱਤਾ। ਸਮਾਂ ਆਪਣੀ ਚਾਲ ਚਲਦਾ ਗਿਆ ਪਰ ਪ੍ਰੈੱਸ ਵਿਚਲੀ ਮਸ਼ੀਨਰੀ ਗੁਰਮਤਿ ਲਿਟਰੇਚਰ ਦੀ ਮੰਗ ਦੀ ਪੂਰਤੀ ਲਈ ਹੋਰ ਛਪਾਈ ਮਸ਼ੀਨਾਂ ਦੀ ਲੋੜ ਮਹਿਸੂਸ ਕੀਤੀ ਗਈ। 1993 ਈ: ਵਿਚ ਸ਼੍ਰੋਮਣੀ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਨੇ ਜਰਮਨ ਤੋਂ ਦੋ ਰੰਗਾਂ ਵਾਲੀ 28×40 ਸਾਈਜ਼ ਦੀ ਇਕ ਮਸ਼ੀਨ ਅਤੇ ਇਕ ਆਟੋਮੈਟਿਕ ਸਿਊਇੰਗ (ਸਿਲਾਈ) ਮਸ਼ੀਨ ਮੰਗਵਾਉਣ ਦਾ ਫੈਸਲਾ ਕੀਤਾ। ਪਲੈਂਟਾ ਕੰਪਨੀ ਦੀ ਦੋ ਰੰਗਾਂ ਵਾਲੀ ਛਪਾਈ ਮਸ਼ੀਨ ਅਤੇ ਬਰੈਹਅਰ ਕੰਪਨੀ ਦੀਆਂ ਫੋਲਡਿੰਗ ਅਤੇ ਸਿਲਾਈ ਮਸ਼ੀਨਾਂ ਇੰਪੋਰਟ ਕਰਨ ਲਈ ਲੋੜੀਂਦੀਆਂ ਕਾਰਵਾਈਆਂ ਮੁਕੰਮਲ ਕਰ ਕੇ ਕੰਪਨੀ ਨੂੰ ਆਰਡਰ ਦੇ ਦਿੱਤਾ ਗਿਆ। ਮਸ਼ੀਨਾਂ ਸਮੁੰਦਰੀ ਜਹਾਜ਼ ਰਾਹੀਂ ਬੰਬਈ ਦੀ ਬੰਦਰਗਾਹ ’ਤੇ ਪੁੱਜ ਗਈਆਂ। ਲੱਗਭਗ ਇੱਕ ਕਰੋੜ ਦੀਆਂ ਮਸ਼ੀਨਾਂ ਤੇ ਪੈਂਤੀ ਲੱਖ ਰੁਪਇਆ ਕਸਟਮ ਬਣਦਾ ਸੀ ਜੋ ਪ੍ਰੈੱਸ ਦੇ ਧਾਰਮਿਕ ਕਾਰਜ ਨੂੰ ਮੁੱਖ ਰੱਖਦਿਆਂ ਪ੍ਰਬੰਧਕਾਂ ਦੇ ਯਤਨਾਂ ਸਦਕਾ ਕੇਂਦਰ ਸਰਕਾਰ ਨੇ ਮੁਆਫ ਕਰ ਦਿੱਤਾ। ਇਨ੍ਹਾਂ ਮਸ਼ੀਨਾਂ ਨੂੰ ਜਰਮਨ ਦੇ ਮਾਹਰ ਇੰਜੀਨੀਅਰਾਂ ਨੇ ਦਿਨ ਰਾਤ ਮਿਹਨਤ ਕਰ ਕੇ ਫਿੱਟ ਕੀਤਾ। ਇਨ੍ਹਾਂ ਮਸ਼ੀਨਾਂ ਦਾ ਉਦਘਾਟਨ ਡਾ. ਬਰਜਿੰਦਰ ਸਿੰਘ ਹਮਦਰਦ, ਮੈਨੇਜਿੰਗ ਐਡੀਟਰ ਰੋਜ਼ਾਨਾ ਅਜੀਤ ਨੇ 1993 ਈ: ਵਿਚ ਕੀਤਾ।

ਸ਼੍ਰੋਮਣੀ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਦੀ ਗੋਲਡਨ ਆਫਸੈੱਟ ਪ੍ਰੈੱਸ ਇਸ ਸਮੇਂ ਸ੍ਰੀ ਅੰਮ੍ਰਿਤਸਰ ਦੀ ਸਭ ਤੋਂ ਵੱਡੀ ਪ੍ਰੈੱਸ ਹੈ। ਪ੍ਰੋਸੈਸਿੰਗ, ਪੇਸਟਿੰਗ, ਪਲੇਟਮੇਕਿੰਗ, ਪ੍ਰਿੰਟਿੰਗ ਫੋਲਡਿੰਗ, ਸਿਲਾਈ ਅਤੇ ਜਿਲਦਬੰਦੀ ਆਦਿ ਸਾਰੇ ਕੰਮ ਪ੍ਰੈੱਸ ਵਿਖੇ ਹੀ ਕੀਤੇ ਜਾਂਦੇ ਹਨ ਜਿਨ੍ਹਾਂ ਲਈ ਲੋੜੀਂਦੀ ਸਾਰੀ ਮਸ਼ੀਨਰੀ ਪ੍ਰੈੱਸ ਵਿਖੇ ਮੌਜੂਦ ਹੈ।

ਗੋਲਡਨ ਆਫਸੈੱਟ ਪ੍ਰੈੱਸ ਵਿਖੇ ਸ੍ਰੀ ਗੁਰੂ ਗ੍ਰੰਥ ਸਾਹਿਬ ਜੀ ਦੇ ਵੱਖ-ਵੱਖ ਅਕਾਰਾਂ ਦੇ ਪਾਵਨ ਸਰੂਪ, ਵੱਖ-ਵੱਖ ਬਾਣੀਆਂ ਦੇ ਵੱਖ-ਵੱਖ ਸਾਈਜ਼ ਦੇ ਗੁਟਕੇ, ਸ਼ਬਦਾਰਥ, ਟੀਕੇ, ਸੰਥਾ ਸੈਂਚੀਆਂ, ਸਚਿੱਤਰ ਪੁਸਤਕਾਂ, ਸਟੀਕ, ਸਿੱਖ ਧਰਮ, ਇਤਿਹਾਸ ਦੀਆਂ ਪੁਸਤਕਾਂ, ਛੋਟੇ ਛੋਟੇ ਟ੍ਰੈਕਟ, ਰਹਿਤ ਮਰਯਾਦਾ ਤੇ ਹੋਰ ਗੁਰਮਤਿ ਸਾਹਿਤ ਤੋਂ ਇਲਾਵਾ ਹਰ ਮਹੀਨੇ ਲੱਗਭਗ 70000 ਦੀ ਗਿਣਤੀ ਵਿਚ ‘ਗੁਰਮਤਿ ਪ੍ਰਕਾਸ਼’ ਛਾਪਿਆ ਜਾਂਦਾ ਹੈ। ਇਹ ਮਾਸਿਕ ਪਰਚਾ ਸ਼੍ਰੋਮਣੀ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਦੀ ਧਰਮ ਪ੍ਰਚਾਰ ਕਮੇਟੀ ਦਾ ਹੈ ਜਿਸ ’ਤੇ ਪ੍ਰਤੀ ਕਾਪੀ ਸੱਤ ਰੁਪਏ ਤੋਂ ਲੈ ਕੇ ਦਸ ਰੁਪਏ ਤਕ ਖਰਚ ਆਉਂਦਾ ਹੈ ਪਰ ਪਾਠਕਾਂ ਨੂੰ ਇਹ ਪਰਚਾ ਵੀਹ ਰੁਪਏ ਸਲਾਨਾ ਚੰਦੇ ’ਤੇ ਉਨ੍ਹਾਂ ਦੇ ਘਰ ਭੇਜਿਆ ਜਾਂਦਾ ਹੈ। ਇਸ ਤਰ੍ਹਾਂ ਧਰਮ ਪ੍ਰਚਾਰ ਕਮੇਟੀ ‘ਗੁਰਮਤਿ ਪ੍ਰਕਾਸ਼’ ਦਾ ਪ੍ਰਤੀ ਕਾਪੀ ਦੋ ਰੁਪਏ ਤੋਂ ਵੀ ਘੱਟ ਵਸੂਲਦੀ ਹੈ ਅਤੇ ਇਸ ਵਿੱਚੋਂ ਵੀ ਇੱਕ ਰੁਪਏ ਤੋਂ ਦੋ ਰੁਪਏ ਦੀ ਟਿਕਟ ਹਰ ਪਰਚੇ ਤੇ ਲਗਦੀ ਹੈ। ਇਸੇ ਤਰ੍ਹਾਂ ਗੁਰਮਤਿ ਗਿਆਨ ਪਰਚਾ ਹਿੰਦੀ ਭਾਸ਼ਾ ਵਿਚ ਪ੍ਰਕਾਸ਼ਿਤ ਹੁੰਦਾ ਹੈ।

‘ਗੁਰਦੁਆਰਾ ਗਜ਼ਟ’ ਸ਼੍ਰੋਮਣੀ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਦਾ ਦੋ ਭਾਸ਼ੀ ਮਾਸਿਕ ਪਰਚਾ ਹੈ। ਲੱਗਭਗ ਸੌ ਸਫ਼ੇ ਦੇ ਇਸ ਮਾਸਿਕ ਪਰਚੇ ਵਿਚ ਗੁਰਮਤਿ ਤੇ ਸਿੱਖ ਧਰਮ ਨਾਲ ਸੰਬੰਧਿਤ ਖੋਜ ਭਰਪੂਰ ਲੇਖ, ਸ਼੍ਰੋਮਣੀ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਦੇ ਆਮਦਨ ਖਰਚ ਦੇ ਚਿੱਠੇ, ਦਿਨ ਤਿਉਹਾਰ, ਸ੍ਰੀ ਹਰਿਮੰਦਰ ਸਾਹਿਬ ਦੀ ਰੋਜ਼ਾਨਾ ਦੀ ਮਰਯਾਦਾ ਅਤੇ ਧਾਰਮਿਕ ਕਵਿਤਾਵਾਂ ਤੋਂ ਇਲਾਵਾ ਤਕਰੀਬਨ ਸਮੁੱਚੀਆਂ ਪੰਥਕ ਧਾਰਮਿਕ ਗਤੀਵਿਧੀਆਂ ਦੀ ਰੀਪੋਰਟ ਅਤੇ ਉਨ੍ਹਾਂ ਦੀਆਂ ਤਸਵੀਰਾਂ ਅਤੇ ਹੋਰ ਖੋਜ ਭਰਪੂਰ ਧਾਰਮਿਕ ਸਮੱਗਰੀ ਹੁੰਦੀ ਹੈ। ਇਸ ਪਰਚੇ ਦਾ ਵੀ ਵੀਹ ਰੁਪਏ ਸਲਾਨਾ ਚੰਦਾ ਹੈ।

ਸ਼੍ਰੋਮਣੀ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਗੁਰਮਤਿ ਲਿਟਰੇਚਰ ਦਾ ਕੇਵਲ ਪ੍ਰਕਾਸ਼ਨ ਹੀ ਨਹੀਂ ਕਰਦੀ ਸਗੋਂ ਇਸ ਨੂੰ ਸੰਗਤਾਂ ਤਕ ਪਹੁੰਚਾਉਣ ਲਈ ਵੀ ਉਪਰਾਲੇ ਕਰਦੀ ਹੈ। ਗੋਲਡਨ ਆਫਸੈੱਟ ਪ੍ਰੈੱਸ ਤੋਂ ਛਪਿਆ ਹੋਇਆ ਸਾਰਾ ਗੁਰਮਤਿ ਲਿਟਰੇਚਰ ਸ਼੍ਰੋਮਣੀ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਦੇ ਵੱਖ-ਵੱਖ ਗੁਰਮਤਿ ਲਿਟਰੇਚਰ ਹਾਊਸ ਤੋਂ ਮਿਲ ਸਕਦਾ ਹੈ। ਸੰਗਤ ਦੀ ਸਹੂਲਤ ਨੂੰ ਮੁੱਖ ਰੱਖਦਿਆਂ ਸ਼੍ਰੋਮਣੀ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਵੱਲੋਂ ਸ੍ਰੀ ਅੰਮ੍ਰਿਤਸਰ ਵਿਖੇ, ਘੰਟਾ ਘਰ, ਸਰਾਂ ਸ੍ਰੀ ਗੁਰੂ ਅਰਜਨ ਦੇਵ ਜੀ ਅਤੇ ਗੁਰਦੁਆਰਾ ਸ਼ਹੀਦ ਬਾਬਾ ਦੀਪ ਸਿੰਘ ਜੀ ਦੀ ਤਰ੍ਹਾਂ ਹਰ ਵੱਡੇ ਇਤਿਹਾਸਿਕ ਗੁਰਦੁਆਰਾ ਸਾਹਿਬਾਨ ਵਿਖੇ ਗੁਰਮਤਿ ਲਿਟਰੇਚਰ ਹਾਊਸ ਖੋਲੇ ਗਏ ਹਨ ਜਿੱਥੋਂ ਇਹ ਲਿਟਰੇਚਰ ਸੰਗਤਾਂ ਨੂੰ ਨਿਰਧਾਰਤ ਭੇਟਾ ’ਤੇ ਦੇਣ ਦੀ ਸੇਵਾ ਸ਼੍ਰੋਮਣੀ ਕਮੇਟੀ ਦੇ ਮੁਲਾਜ਼ਮ ਕਰਦੇ ਹਨ।

ਧਾਰਮਿਕ ਸਮਾਗਮਾਂ ਅਤੇ ਮੇਲੇ ਮੱਸਿਆ ’ਤੇ ‘ਸਿੱਖ ਰਹਿਤ ਮਰਯਾਦਾ’ ਅਤੇ ਧਰਮ ਪ੍ਰਚਾਰ ਕਮੇਟੀ ਵੱਲੋਂ ਪ੍ਰਕਾਸ਼ਿਤ ਕਿਤਾਬਚੇ ਸੰਗਤਾਂ ਵਿਚ ਮੁਫਤ ਵੰਡੇ ਜਾਂਦੇ ਹਨ। ਸ੍ਰੀ ਗੁਰੂ ਗ੍ਰੰਥ ਸਾਹਿਬ ਜੀ ਦੇ ਸਤਿਕਾਰ ਅਤੇ ਗੁਰ ਮਰਯਾਦਾ ਨੂੰ ਮੁੱਖ ਰੱਖਦਿਆਂ ਸ਼੍ਰੋਮਣੀ ਕਮੇਟੀ ਵੱਲੋਂ ਗੋਲਡਨ ਆਫਸੈੱਟ ਪ੍ਰੈੱਸ ਵਿਖੇ ਛਾਪੇ ਅਤੇ ਜਿਲਦਬੰਦੀ ਕੀਤੇ ਪਾਵਨ ਸਰੂਪ ਸੰਗਤ ਨੂੰ ਦੇਣ ਸਮੇਂ ਮਰਯਾਦਾ ਦਾ ਧਿਆਨ ਰੱਖਿਆ ਜਾਂਦਾ ਹੈ। ਪਾਵਨ ਸਰੂਪ ਪ੍ਰਾਪਤ ਕਰਨ ਲਈ ਪੀੜ੍ਹਾ ਸਾਹਿਬ, ਚੌਰ ਸਾਹਿਬ ਅਤੇ ਰੁਮਾਲਿਆਂ ਸਹਿਤ ਪੰਜ ਸਿੰਘਾਂ ਦਾ ਆਉਣਾ ਲਾਜ਼ਮੀ ਹੈ। ਸ਼੍ਰੋਮਣੀ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਵੱਲੋਂ ਪ੍ਰਕਾਸ਼ਿਤ ਦਰਮਿਆਨਾ ਅਕਾਰ ਪਾਵਨ ਸਰੂਪ ਦੀ ਭੇਟਾ ਇਸ ਸਮੇਂ ਗਿਆਰਾਂ ਸੌ ਰੁਪਏ ਅਤੇ ਵੱਡੇ ਅਕਾਰ ਦਾ ਤੇਰਾਂ ਸੌ ਇਕਵੰਜਾ ਰੁਪਏ ਹੈ। ਪਾਵਨ ਸਰੂਪ ਦੀ ਛਪਾਈ ਲਈ ਵਧੀਆ ਕਿਸਮ ਦੇ ਕਾਗਜ਼, ਸਿਆਹੀ ਅਤੇ ਆਧੁਨਿਕ ਤਕਨੀਕ ਦੀ ਵਰਤੋਂ ਤੋਂ ਇਲਾਵਾ ਜਿਲਦਬੰਦੀ ਵੀ ਮਜ਼ਬੂਤ ਅਤੇ ਸੁੰਦਰ ਕੀਤੀ ਜਾਂਦੀ ਹੈ।

ਦੂਰ-ਦੁਰੇਡੇ ਦੀਆਂ ਸੰਗਤਾਂ ਦੀ ਸਹੂਲਤ ਨੂੰ ਮੁੱਖ ਰੱਖਦਿਆਂ ਸ਼੍ਰੋਮਣੀ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਨੇ ਪਾਵਨ ਸਰੂਪ ਲੈ ਕੇ ਜਾਣ ਲਈ ਇਕ ਖਾਸ ਗੱਡੀ ਤਿਆਰ ਕਰਵਾਈ ਹੈ। ਚੰਦੋਏ ਲੱਗੀ ਇਸ ਗੱਡੀ ਵਿਚ ਸਤਿਕਾਰ ਨਾਲ ਪਾਵਨ ਸਰੂਪ ਰੱਖ ਕੇ ਦਿੱਲੀ, ਬੰਬਈ, ਕਲਕੱਤਾ, ਹਜ਼ੂਰ ਸਾਹਿਬ, ਪਟਨਾ ਸਾਹਿਬ, ਯੂ.ਪੀ. ਤੇ ਹੋਰ ਨੀਯਤ ਕੇਂਦਰਾਂ ਤੇ ਪਹੁੰਚਾਏ ਜਾਂਦੇ ਹਨ। ਗੱਡੀ ਦੇ ਨਾਲ ਪੰਜ ਪਿਆਰੇ ਭੇਜੇ ਜਾਂਦੇ ਹਨ।ਇਸ ਗੱਡੀ ਦਾ ਕੋਈ ਵਾਧੂ ਖਰਚਾ ਨਹੀਂ ਲਿਆ ਜਾਂਦਾ।

ਸ੍ਰੀ ਗੁਰੂ ਗ੍ਰੰਥ ਸਾਹਿਬ ਜੀ ਦੇ 400-ਸਾਲਾ ਪਹਿਲੇ ਪ੍ਰਕਾਸ਼ ਦਿਵਸ ਦੇ ਸੰਦਰਭ ਵਿਚ ਸ਼੍ਰੋਮਣੀ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਵੱਲੋਂ ਪਾਵਨ ਸਰੂਪ ਸ੍ਰੀ ਗੁਰੂ ਗ੍ਰੰਥ ਸਾਹਿਬ ਜੀ, ਸੰਥਾ ਸੈਂਚੀਆਂ (ਪੰਜਾਬੀ-ਹਿੰਦੀ) ਗੁਟਕੇ ਤੇ ਸ਼ਬਦਾਰਥ ਆਦਿ ਦਾ ਸਾਰਾ ਕੰਮ ਕੰਪਿਊਟਰਾਈਜ਼ ਕਰਨ ਦਾ ਯਤਨ ਅਰੰਭਿਆ ਗਿਆ ਸੀ ਤੇ ਇਹ ਸਾਰਾ ਕਾਰਜ ਪ੍ਰਧਾਨ ਸਾਹਿਬ ਜਥੇਦਾਰ ਅਵਤਾਰ ਸਿੰਘ ਜੀ ਦੀ ਪ੍ਰੇਰਨਾ ਤੇ ਸੁਹਿਰਦ ਯਤਨਾਂ ਨਾਲ ਸੰਪੂਰਨ ਹੋਇਆ।

ਪਾਵਨ ਸਰੂਪਾਂ, ਸੰਥਾ ਸੈਂਚੀਆਂ, ਗੁਟਕਾ ਸਾਹਿਬ ਆਦਿ ਲਈ ਹੋਰ ਮਲਟੀ ਕਲਰ ਕੰਮਾਂ ਲਈ ਜਰਮਨ ਦੀ ਬਣੀ ਚਾਰ ਰੰਗਾਂ ਵਾਲੀ ਮਸ਼ੀਨ ‘ਕੇ.ਬੀ.ਏ. ਰੈਪੀਡਾ- 105 ਯੂਨੀਵਰਸਲ’ ਦੀ ਖਰੀਦ ਕੀਤੀ ਗਈ। ਇਸ ਮਸ਼ੀਨ ਦੀ ਕੀਮਤ ਤਕਰੀਬਨ ਸਾਢੇ ਚਾਰ ਕਰੋੜ ਰੁਪਏ ਦੇ ਕਰੀਬ ਹੈ। ਇਸ ਮਸ਼ੀਨ ਦੀ ਕਸਟਮ ਡਿਊਟੀ ਇੱਕ ਕਰੋੜ ਪੰਜਾਹ ਲੱਖ, ਜਥੇਦਾਰ ਅਵਤਾਰ ਸਿੰਘ ਜੀ ਦੇ ਉਚੇਚੇ ਯਤਨਾਂ ਤੇ ਸਹਿਯੋਗ ਨਾਲ ਭਾਰਤ ਸਰਕਾਰ ਪਾਸੋਂ ਮੁਆਫ ਕਰਵਾਈ ਗਈ ਹੈ। ਇਹ ਮਸ਼ੀਨ ਸਾਰੀ ਕੰਪਿਊਟਰਾਈਜ਼ਡ ਹੈ। ਇਸ ਮਸ਼ੀਨ ਲਈ ਖਾਸ ਏ.ਸੀ. ਯੂਨਿਟ ਹਾਲ ਤਿਆਰ ਕਰਵਾਇਆ ਗਿਆ ਹੈ। ਪ੍ਰੈੱਸ ਦੇ ਹੋਰ ਵੀ ਸਾਰੇ ਯੂਨਿਟਾਂ ਨੂੰ ਏ.ਸੀ. ਕਰ ਦਿੱਤਾ ਗਿਆ ਹੈ। ਇਸ ਮਸ਼ੀਨਰੀ ਦਾ ਉਦਘਾਟਨ 12-12-2009 ਨੂੰ ਜਥੇਦਾਰ ਅਵਤਾਰ ਸਿੰਘ ਪ੍ਰਧਾਨ ਸ਼੍ਰੋਮਣੀ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਨੇ ਆਪਣੇ ਕਰ-ਕਮਲਾਂ ਨਾਲ ਕੀਤਾ। ਇਸ ਮਸ਼ੀਨ ਦੀ ਅਰੰਭਤਾ ਨਾਲ ਪਾਵਨ ਸਰੂਪ, ਪੁਸਤਕਾਂ ਦੇ ਟਾਈਟਲ, ਇਸ਼ਤਿਹਾਰ, ਸਕੂਲਾਂ-ਕਾਲਜਾਂ ਦੇ ਪ੍ਰਾਸਪੈਕਟਸ ਤੇ ਮੈਗ਼ਜ਼ੀਨ ਆਦਿ ਰੰਗਦਾਰ ਛਪਣੇ ਸ਼ੁਰੂ ਹੋ ਗਏ ਹਨ। ਇਨ੍ਹਾਂ ਦੀ ਦਿੱਖ ਤੇ ਕੁਆਲਟੀ ਮਿਆਰੀ ਸਾਬਤ ਹੋ ਰਹੀ ਹੈ। ਇਸ ਸਮੇਂ ਦੋ- ਰੰਗਾਂ ਵਾਲੀ ਮਸ਼ੀਨ ’ਤੇ ਸੰਥਾ ਸੈਂਚੀਆਂ, ਗੁਟਕੇ ਸਾਹਿਬ ਆਦਿ ਛਪ ਰਹੇ ਹਨ ਤੇ ਇਕ-ਰੰਗ ਵਾਲੀਆਂ ਦੋ ਮਸ਼ੀਨਾਂ ’ਤੇ ਧਾਰਮਿਕ ਪੁਸਤਕਾਂ, ਗੁਰਮਤਿ ਪ੍ਰਕਾਸ਼, ਗੁਰਦੁਆਰਾ ਗਜ਼ਟ, ਗੁਰਮਤਿ ਗਿਆਨ (ਹਿੰਦੀ) ਆਦਿ ਛਪ ਰਹੇ ਹਨ।

ਇਸੇ ਤਰ੍ਹਾਂ ਅੰਬਾਲਾ ਭਵਨ ਸ਼ਾਹਬਾਦ ਵਿਖੇ ਲੱਗੀ ਮਸ਼ੀਨ ਹਰਿਆਣੇ ਦੇ ਗੁਰਦੁਆਰਾ ਸਾਹਿਬਾਨ ਲਈ ਛਪਾਈ ਦਾ ਕਾਰਜ ਕਰਦੀ ਹੈ ਅਤੇ ਗੁਰਦੁਆਰਾ ਪ੍ਰਿੰਟਿੰਗ ਪ੍ਰੈੱਸ ਵਿਖੇ ਵੀ ਦੋ ਨਵੀਆਂ ਆਫਸੈੱਟ ਮਸ਼ੀਨਾਂ 11×16 ਤੇ 12×21 ਖਰੀਦ ਕੇ ਲਾਈਆਂ ਗਈਆਂ ਹਨ, ਇੱਥੇ 5 ਟਰੇਡਰ ਮਸ਼ੀਨਾਂ ਵੀ ਚੱਲ ਰਹੀਆਂ ਹਨ। ਇਨ੍ਹਾਂ ਪ੍ਰੈੱਸਾਂ ਵਿਚ ਸਕੂਟਰ, ਸਾਈਕਲ, ਕਾਰ ਪਾਰਕਿੰਗਾਂ ਦੀਆਂ ਪਰਚੀਆਂ, ਹਸਪਤਾਲਾਂ ਦੀ ਲੋੜ ਅਨੁਸਾਰ ਪ੍ਰਿੰਟ ਸਮੱਗਰੀ, ਲੈਟਰ ਪੈਡ, ਇਸ਼ਤਿਹਾਰ ਆਦਿ ਛਾਪੇ ਜਾਂਦੇ ਹਨ।

ਹਿੰਦੀ ਤੇ ਅੰਗਰੇਜ਼ੀ ’ਚ ਵੀ ਪੁਸਤਕਾਂ ਦੀ ਛਪਾਈ

ਸਿੱਖ ਧਰਮ ਦੇ ਇਤਿਹਾਸ ਅਤੇ ਇਸ ਦੇ ਨਾਲ ਸੰਬੰਧਿਤ ਹੋਰ ਜਾਣਕਾਰੀਆਂ ਨੂੰ ਸੌਖੇ ਢੰਗ ਨਾਲ ਦੱਸਣ ਲਈ ਸ਼੍ਰੋਮਣੀ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਨੇ ਧਰਮ ਪ੍ਰਚਾਰ ਦੀਆਂ ਪੁਸਤਕਾਂ ’ਚ ਸਮੇਂ ਅਨੁਸਾਰ ਤਬਦੀਲੀ (ਅਪਡੇਟ) ਕਰਨੀ ਸ਼ੁਰੂ ਕਰ ਦਿੱਤੀ ਹੈ। ਧਰਮ ਦੀਆਂ ਬਾਲ ਪੁਸਤਕਾਂ ਤੋਂ ਲੈ ਕੇ, ਟੀਕੇ ਅਤੇ ਗ੍ਰੰਥਾਂ ਤਕ ਸਿੱਖ ਇਤਿਹਾਸ ਦੀ ਪੜਚੋਲ ਅਤੇ ਨਵੀਂ ਖੋਜ ਦੇ ਨਤੀਜਿਆਂ ਲਈ ਵਿਦਵਾਨਾਂ ਦੇ ਪੈਨਲ ਬਣਾਏ ਜਾ ਰਹੇ ਹਨ। ਦੱਸਿਆ ਜਾ ਰਿਹਾ ਹੈ ਕਿ ਪ੍ਰਕਾਸ਼ਨ ਦਾ ਇਹ ਕੰਮ ਸਿੱਖ ਇਤਿਹਾਸ ਦਾ ਵੱਡਾ ਪ੍ਰਾਜੈਕਟ ਹੈ। ਕਿਸੇ ਵੀ ਧਰਮ ਦੇ ਗ੍ਰੰਥ ਅਤੇ ਧਾਰਮਿਕ ਪੁਸਤਕਾਂ ਉਸ ਧਰਮ ਦੀ ਨਾ- ਸਿਰਫ ਸਾਰਥਿਕਤਾ ਨੂੰ ਤਰੋ-ਤਾਜ਼ਾ ਰੱਖਦੇ ਹਨ, ਸਗੋਂ ਧਰਮ ਦੀ ਹੋਂਦ ਦੀਆਂ ਜੜ੍ਹਾਂ ਨੂੰ ਹੋਰ ਮਜ਼ਬੂਤ ਅਤੇ ਡੂੰਘਾ ਕਰਦੀਆਂ ਹਨ। ਇਸੇ ਮਕਸਦ ਨਾਲ ਸ਼੍ਰੋਮਣੀ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਦੀ ਨਿਗਰਾਨੀ ਹੇਠ ਚੱਲ ਰਹੀ ਧਰਮ ਪ੍ਰਚਾਰ ਕਮੇਟੀ ਕੰਮ ਕਰ ਰਹੀ ਹੈ। ਸਿੱਖ ਵਿਦਵਾਨ ਮੰਨਦੇ ਹਨ ਕਿ ਜਿਸ ਤੇਜੀ ਨਾਲ ਸਮਾਂ ਬਦਲ ਰਿਹਾ ਹੈ ਅਤੇ ਧਰਮ ਦੇ ਖੇਤਰ ’ਚ ਵੀ ਨਵੀਆਂ ਖੋਜਾਂ ਹੋਈਆਂ ਹਨ, ਸਿੱਖ ਧਰਮ ਨੂੰ ਉਸ ਮੁਤਾਬਿਕ ਚੱਲਣਾ ਸਮੇਂ ਦੀ ਵੱਡੀ ਲੋੜ ਹੈ। ਇਸੇ ਤਹਿਤ ਹੀ ਸ਼੍ਰੋਮਣੀ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਨੇ ਸਿੱਖ ਧਰਮ ਦੇ ਇਤਿਹਾਸ ਅਤੇ ਧਾਰਮਿਕ ਪੁਸਤਕਾਂ ਦੀ ਛਪਾਈ ਕਰਨੀ ਸ਼ੁਰੂ ਕਰ ਦਿੱਤੀ ਹੈ। ਧਰਮ ਸਬੰਧੀ ਪੁਸਤਕਾਂ ’ਚ ਬੱਚਿਆਂ ਲਈ 10 ਪੋਥੀਆਂ ਹਨ, ਜੋ ਹੁਣ ਤਕ ਲੇਖਨੁਮਾ ਵੇਰਵੇ ਨਾਲ ਹੀ ਸੰਬੰਧਿਤ ਸਨ, ਪਰ ਹੁਣ ਇਨ੍ਹਾਂ ਪੁਸਤਕਾਂ ’ਚ ਸਿੱਖ ਗੁਰੂ ਸਾਹਿਬਾਨ ਦੀਆਂ ਜੀਵਨੀਆਂ, ਕੁਰਬਾਨੀਆਂ ਅਤੇ ਯੋਧਿਆਂ ਦਾ ਜੀਵਨ ਇਤਿਹਾਸ ਰੰਗਦਾਰ ਤਸਵੀਰਾਂ ਨਾਲ ਪ੍ਰਕਾਸ਼ਿਤ ਕਰ ਦਿੱਤਾ ਗਿਆ ਹੈ। ਇਨ੍ਹਾਂ ’ਚ ਸ੍ਰੀ ਗੁਰੂ ਹਰਿਗੋਬਿੰਦ ਸਾਹਿਬ, ਬਾਬਾ ਬੁੱਢਾ ਸਾਹਿਬ ਜੀ, ਭਾਈ ਕਨ੍ਹੱਈਆ ਜੀ, ਬਾਬਾ ਬੰਦਾ ਸਿੰਘ ਬਹਾਦਰ ਜੀ ਦੇ ਵੇਰਵੇ ਤੋਂ ਇਲਾਵਾ ‘ਅਰਦਾਸ’ ਨਾਮਕ ਹਿੰਦੀ, ਪੰਜਾਬੀ ਤੇ ਅੰਗਰੇਜ਼ੀ ਦੀ ਪੁਸਤਕ ’ਚ ਦਸ ਗੁਰੂ ਸਾਹਿਬਾਨ ਦੇ ਚਿੱਤਰ, ਜੀਵਨ-ਵੇਰਵਾ ਅਤੇ ਉਨ੍ਹਾਂ ਦੇ ਜਨਮ ਅਸਥਾਨਾਂ ਦੇ ਨਾਂ ਅਤੇ ਚਿੱਤਰ ਵੀ ਹਨ। ਤਿੰਨ ਭਾਸ਼ਾਵਾਂ ’ਚ ਹੀ ਵੱਖ-ਵੱਖ ਪ੍ਰਕਾਸ਼ਿਤ ‘ਸਚਿੱਤਰ ਸ਼ਹੀਦੀ ਪ੍ਰੰਪਰਾ’ ’ਚ ਗੁਰੂ ਸਾਹਿਬਾਨ ਤੋਂ ਇਲਾਵਾ ਧਰਮ ਲਈ ਕੁਰਬਾਨੀਆਂ ਦੇਣ ਵਾਲੀਆਂ ਸ਼ਖ਼ਸੀਅਤਾਂ ਦਾ ਸਚਿੱਤਰ ਵੇਰਵਾ ਤੇ ਵੱਡੇ ਅਤੇ ਛੋਟੇ ਸਾਹਿਬਜ਼ਾਦਿਆਂ ਦੀਆਂ ਸਾਖੀਆਂ ਹਨ। ਪੁਸਤਕ ‘ਗੁਰਦੁਆਰੇ-ਗੁਰਧਾਮ’, ਪੰਜਾਬੀ, ਹਿੰਦੀ, ਅੰਗੇਰਜ਼ੀ ਅਤੇ ਉਰਦੂ ਵਿਚ ਤਸਵੀਰਾਂ ਸਾਹਿਤ ਪ੍ਰਕਾਸ਼ਿਤ ਕੀਤੀ ਗਈ ਹੈ। ਇਸੇ ਲੇਖਕ ਦੀ ਦੂਜੀ ਪੁਸਤਕ ‘ਪ੍ਰਮੁੱਖ ਸਿੱਖ ਸ਼ਖ਼ਸੀਅਤਾਂ’ ਹੈ, ਜਿਸ ਵਿਚ ਬੇਬੇ ਨਾਨਕੀ ਜੀ ਤੋਂ ਲੈ ਕੇ ਭਗਤ ਪੂਰਨ ਸਿੰਘ ਜੀ ਤਕ 66 ਪ੍ਰਮੁੱਖ ਸ਼ਖ਼ਸੀਅਤਾਂ ਸ਼ਾਮਲ ਕੀਤੀਆਂ ਗਈਆਂ ਹਨ। ‘ਸੋ ਥਾਨ ਸੁਹਾਵਾ’ ਪੁਸਤਕ, ਸ਼੍ਰੋਮਣੀ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਦੇ ਇਤਿਹਾਸਿਕ ਗੁਰਦੁਆਰਾ ਸਾਹਿਬਾਨ ਦਾ ਸੰਖੇਪ ਇਤਿਹਾਸ ਰੰਗਦਾਰ ਤਸਵੀਰਾਂ ਸਹਿਤ ਪੇਸ਼ ਕਰਦੀ ਹੈ। ਇਸ ਤੋਂ ਇਲਾਵਾ ਇਨ੍ਹਾਂ ਪੁਸਤਕਾਂ ਵਿਚ ਛੋਟੇ ਅਕਾਰ ਦੇ ਪ੍ਰਸ਼ਨ-ਉੱਤਰ ਸ਼ਾਮਲ ਕਰਨ ਦੀ ਪ੍ਰਕਿਰਿਆ ਚੱਲ ਰਹੀ ਹੈ, ਤਾਂ ਜੋ ਸਿੱਖ ਇਤਿਹਾਸ, ਗੁਰੂ ਸਾਹਿਬਾਨ ਅਤੇ ਸਿੱਖ ਸ਼ਖ਼ਸੀਅਤਾਂ ਨੂੰ ਦਿਲਚਸਪ ਢੰਗ ਨਾਲ ਪੜ੍ਹਿਆ ਜਾ ਸਕੇ। ਇਸ ਤੋਂ ਇਲਾਵਾ ਸ੍ਰੀ ਗੁਰੂ ਗ੍ਰੰਥ ਸਾਹਿਬ ਦੇ ਪ੍ਰਮਾਣਿਕ ਟੀਕਿਆਂ ਲਈ ਵੀ ਨਵਾਂ ਪ੍ਰਕਾਸ਼ਨ ਸ਼ੁਰੂ ਕੀਤਾ ਜਾ ਰਿਹਾ ਹੈ। ਹੁਣ ਤਕ ਪ੍ਰੋਫੈਸਰ ਸਾਹਿਬ ਸਿੰਘ, ਗਿਆਨੀ ਹਰਬੰਸ ਸਿੰਘ, ਫਰੀਦਕੋਟੀ ਟੀਕਾ ਅਤੇ ਸ਼੍ਰੋਮਣੀ ਕਮੇਟੀ ਵੱਲੋਂ ਪ੍ਰਕਾਸ਼ਿਤ ਹੋ ਰਿਹਾ ਡਾ. ਮਨਮੋਹਨ ਸਿੰਘ ਦਾ ਟੀਕਾ ਹੀ ਪ੍ਰਕਾਸ਼ਿਤ ਕੀਤਾ ਜਾਂਦਾ ਰਿਹਾ ਹੈ। ਇਕ ਟੀਕਾ ਸ੍ਰੀ ਅਕਾਲ ਤਖਤ ਸਾਹਿਬ ਦੇ ਜਥੇਦਾਰ ਜੋਗਿੰਦਰ ਸਿੰਘ ਵੇਦਾਂਤੀ ਦੀ ਨਿਗਰਾਨੀ ਹੇਠ ਤਿਆਰ ਹੋ ਰਿਹਾ ਹੈ। ਹੁਣ ਤਕ ਟੀਕਿਆਂ ’ਚ ਵਿਦਵਾਨਾਂ ਦੀਆਂ ਪਹਿਲਾਂ ਤੋਂ ਹੀ ਖੋਜ ਕੀਤੀਆਂ ਗੱਲਾਂ ਨੂੰ ਪ੍ਰਕਾਸ਼ਿਤ ਕੀਤਾ ਜਾਂਦਾ ਰਿਹਾ ਹੈ, ਪਰ ਹੁਣ ਨਵੀਆਂ ਖੋਜਾਂ ਅਤੇ ਪੜਚੋਲ ਲਈ ਵਿਦਵਾਨਾਂ ਦੇ ਦੋ ਪੈਨਲਾਂ ਦਾ ਗਠਨ ਕੀਤਾ ਜਾ ਰਿਹਾ ਹੈ, ਜਿਸ ’ਚ ਇਕ ਸਲਾਹਕਾਰ ਪੈਨਲ ਹੋਵੇਗਾ, ਜਿਸ ਦੇ 8 ਮੈਂਬਰ ਹੋਣਗੇ, ਜਦਕਿ ਦੂਜੇ ਪੈਨਲ ’ਚ ਗੁਰਬਾਣੀ (ਵਿਆਕਰਣ), ਭਾਸ਼ਾ, ਫ਼ਿਲਾਸਫ਼ੀ ਨਾਲ ਸੰਬੰਧਿਤ 4 ਮੁਲਾਜ਼ਮ ਵਿਦਵਾਨ ਲਏ ਜਾਣਗੇ, ਜੋ ਹੁਣ ਤਕ ਬਣੇ ਟੀਕਿਆਂ ਨੂੰ ਧਿਆਨ ਗੋਚਰਾ ਤਾਂ ਕਰਨਗੇ ਹੀ ਨਾਲ-ਨਾਲ ਨਵੀਆਂ ਖੋਜਾਂ ਤੋਂ ਇਲਾਵਾ ਇਨ੍ਹਾਂ ਦਾ ਅੰਗਰੇਜ਼ੀ ’ਚ ਤਰਜਮਾ ਵੀ ਹੋਵੇਗਾ। ਇਸ ਤੋਂ ਇਲਾਵਾ ‘ਸ੍ਰੀ ਗੁਰ ਪ੍ਰਤਾਪ ਸੂਰਜ ਗ੍ਰੰਥ’ ਦੀ ਸੰਪਾਦਨਾ ਦਾ ਕੰਮ ਵੀ ਹੁਣ ਧਰਮ ਪ੍ਰਚਾਰ ਕਮੇਟੀ ਵੱਲੋਂ ਸ਼ੁਰੂ ਕੀਤਾ ਗਿਆ ਹੈ। ਲੇਖਕ ਭਾਈ ਸੰਤੋਖ ਸਿੰਘ ਵਾਲੇ ਇਸ ਗ੍ਰੰਥ ਦੇ ਸੰਪਾਦਨ ਲਈ ਪੰਜਾਬੀ ਯੂਨੀਵਰਸਿਟੀ ਦੇ ਇਤਿਹਾਸ ਵਿਭਾਗ ਦੇ ਸੇਵਾ ਮੁਕਤ ਮੁਖੀ ਡਾ. ਕਿਰਪਾਲ ਸਿੰਘ ਅਤੇ ਤਿੰਨ ਹੋਰ ਵਿਦਵਾਨਾਂ ਦੀ ਮਦਦ ਨਾਲ ਚੱਲ ਰਹੇ ਇਸ ਗ੍ਰੰਥ ਦੇ 5 ਭਾਗ ਤਿਆਰ ਹੋ ਚੁੱਕੇ ਹਨ। ‘ਪ੍ਰਾਚੀਨ ਪੰਥ ਪ੍ਰਕਾਸ਼’ ਦੇ ਵੀ 3 ਭਾਗ ਤਿਆਰ ਹੋ ਚੁੱਕੇ ਹਨ। ਧਰਮ ਪੁਸਤਕ ਪ੍ਰਕਾਸ਼ਨ ਦੇ ਮਾਮਲੇ ’ਚ ਲੋਕਾਂ ਦੀ ਮੰਗ ਲਗਾਤਾਰ ਵਧ ਰਹੀ ਹੈ ‘ਗੁਰਮਤਿ ਪ੍ਰਕਾਸ਼’ ਦੇ ਬਹੁਕੀਮਤੀ ਲੇਖਾਂ ਦੇ ਸੰਪਾਦਨ ਉਪਰੰਤ ‘ਸਿੱਖ ਸੰਕਲਪ ਸਿਧਾਂਤ ਤੇ ਸੰਸਥਾਵਾਂ’ ਪੁਸਤਕ ਛਪਾਈ ਅਧੀਨ ਹੈ ਜਿਸ ਵਿਚ 113 ਲੇਖ ਸ਼ਾਮਲ ਹਨ। ‘ਗੁਰਮਤਿ ਪ੍ਰਕਾਸ਼’ ਦੇ ਪਿਛਲੇ 50 ਸਾਲਾਂ ਦੇ ਲੇਖਾਂ ਨੂੰ ਦੁਬਾਰਾ ਸੰਪਾਦਨ ਕਰ ਕੇ ਪੁਸਤਕਾਂ ਦਾ ਰੂਪ ਦਿੱਤਾ ਜਾ ਰਿਹਾ ਹੈ। ਧਰਮ ਪ੍ਰਚਾਰ ਕਮੇਟੀ ਹੁਣ ਤਕ 65 ਪੁਸਤਕਾਂ, 22 ਸਚਿੱਤਰ ਪੁਸਤਕਾਂ, 13 ਅੰਗਰੇਜ਼ੀ ਪ੍ਰਕਾਸ਼ਨ, ਪਾਵਨ ਸਰੂਪ ਅਤੇ ਗੁਰਬਾਣੀ ਪੋਥੀਆਂ, ਅੰਗਰੇਜ਼ੀ ਦੇ ਹੋਰ 18 ਪ੍ਰਕਾਸ਼ਨ ਅਤੇ ਸਿੱਖ ਇਤਿਹਾਸ ਖੋਜ ਬੋਰਡ ਦੀਆਂ ਪੰਜਾਬੀ, ਹਿੰਦੀ ਅਤੇ ਅੰਗਰੇਜ਼ੀ ਦੀਆਂ 29 ਪ੍ਰਕਾਸ਼ਨਾਵਾਂ ਸ਼ਾਮਲ ਹਨ। ਹਰ ਮਹੀਨੇ 10 ਹਜ਼ਾਰ ਤੋਂ ਵੱਧ ਟੀਕੇ, 10 ਹਜ਼ਾਰ ਸ਼ਬਦਾਰਥ ਅਤੇ 25 ਤੋਂ 30 ਹਜ਼ਾਰ ਪੋਥੀਆਂ ਦੇ ਪ੍ਰਕਾਸ਼ਨ ਦਾ ਕੰਮ ਹੁੰਦਾ ਹੈ। ਧਰਮ ਪ੍ਰਚਾਰ ਕਮੇਟੀ ਦੇ ਮਾਸਿਕ ਪੱਤਰ ‘ਗੁਰਮਤਿ ਪ੍ਰਕਾਸ਼’ ਦੇ ਸੰਨ 2008 ਵਿਚ ਸ੍ਰੀ ਗੁਰੂ ਗ੍ਰੰਥ ਸਾਹਿਬ ’ਤੇ ਦਸ ਵਿਸ਼ੇਸ਼ ਅੰਕ ਪ੍ਰਕਾਸ਼ਿਤ ਕੀਤੇ ਗਏ ਹਨ। ਪ੍ਰਸਿੱਧ ਇਤਿਹਾਸਕਾਰ ਗਿ. ਸੋਹਣ ਸਿੰਘ ਸੀਤਲ, ਦੇ ਵਿਸ਼ੇਸ਼ ਅੰਕ ਤੋਂ ਬਾਅਦ ਪੁਸਤਕ ਪ੍ਰਕਾਸ਼ਿਤ ਕੀਤੀ ਗਈ ਹੈ। ਬਾਬਾ ਬੰਦਾ ਸਿੰਘ ਬਹਾਦਰ ’ਤੇ ਦੋ ਵਿਸ਼ੇਸ਼ ਅੰਕ ਕੱਢੇ ਗਏ ਹਨ। ਇਸੇ ਤਰ੍ਹਾਂ ‘ਗੁਰਮਤਿ ਗਿਆਨ’ ਹਿੰਦੀ ਦੇ ‘ਸਿੱਖ ਸ੍ਰੋਤਾਂ ਵਿਚ ਸ੍ਰੀ ਗੁਰੂ ਨਾਨਕ ਦੇਵ ਜੀ’ ਦੋ ਵਿਸ਼ੇਸ਼ ਅੰਕ ਅਤੇ ਇਵੇਂ ਹੀ ਬਾਕੀ ਸਿੱਖ ਸ੍ਰੋਤਾਂ ਦੇ ਆਧਾਰ ’ਤੇ ਨੌਂ ਪਾਤਸ਼ਾਹੀਆਂ ’ਤੇ ਅੰਕ ਪ੍ਰਕਾਸ਼ਿਤ ਹੋਏ ਹਨ। ਕਈ ਨਵੇਂ ਰੰਗਦਾਰ ਟ੍ਰੈਕਟ ਤੇ ਪੁਸਤਕਾਂ ਆਦਿ ਛਾਪੀਆਂ ਗਈਆਂ ਹਨ। ਸ਼੍ਰੋਮਣੀ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਵੱਲੋਂ ਕੀਤੇ ਜਾ ਰਹੇ ਇਸ ਉੱਦਮ ਨੂੰ ਪੰਥਕ ਹਲਕਿਆਂ ’ਚ ਭਰਪੂਰ ਹੁੰਗਾਰਾ ਮਿਲ ਰਿਹਾ ਹੈ। ਵਰਤਮਾਨ ਸਮੇਂ ਅਤੇ ਚੱਲ ਰਹੇ ਡੇਰਾਵਾਦ ਦੇ ਭਰਮਾਂ ਨੂੰ ਦੂਰ ਕਰਨ ਲਈ ਹੇਠਲੇ ਪੱਧਰ ’ਤੇ ਹੀ ਇਹ ਉੱਦਮ ਬੇਹੱਦ ਪ੍ਰਭਾਵਸ਼ਾਲੀ ਹੋਵੇਗਾ।

ਸ਼੍ਰੋਮਣੀ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਦੀ ਗੋਲਡਨ ਆਫਸੈੱਟ ਪ੍ਰੈੱਸ ਵਿਖੇ ਛਪਿਆ ਗੁਰਮਤਿ ਲਿਟਰੇਚਰ ਬਜ਼ਾਰ ਨਾਲੋਂ ਹਰ ਪੱਖ ਤੋਂ ਬੇਹਤਰ ਤਾਂ ਹੁੰਦਾ ਹੀ ਹੈ, ਇਸ ਦੀ ਸੁਧਾਈ ਵੱਲ ਵਿਸ਼ੇਸ਼ ਧਿਆਨ ਦਿੱਤਾ ਜਾਂਦਾ ਹੈ। ਦੂਰ-ਦੁਰੇਡੇ ਦੀਆਂ ਸੰਗਤਾਂ ਦੀ ਖਾਹਸ਼ ਵੀ ਇਹੀ ਹੁੰਦੀ ਹੈ ਕਿ ਗੁਰਮਤਿ ਲਿਟਰੇਚਰ ਸ਼੍ਰੋਮਣੀ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਵੱਲੋਂ ਪ੍ਰਕਾਸ਼ਿਤ ਕੀਤਾ ਹੋਇਆ ਹੀ ਲਿਆ ਜਾਵੇ।