ਡਾ. ਤਾਰਨ ਸਿੰਘ (Taran Singh )
	Address Punjab India Phone Email
	Bio ਪੰਜਾਬੀ ਦੇ ਇਸ ਸੁਪ੍ਰਸਿੱਧ ਵਿਦਵਾਨ ਅਤੇ ਲੇਖਕ ਤਾਰਨ ਸਿੰਘ ਜੀ ਦਾ ਜਨਮ ਪਿੰਡ ਕਲਰ ਕਹਾਰ, ਤਹਿਸੀਲ ਚਕਵਾਲ, ਜ਼ਿਲ੍ਹਾ ਜਿਹਲਮ (ਹੁਣ ਪਾਕਿਸਤਾਨ) ਵਿਚ 8 ਫ਼ਰਵਰੀ, 1922 ਨੂੰ ਸ. ਨਿਧਾਨ ਸਿੰਘ ਦੇ ਘਰ ਹੋਇਆ। ਇਨ੍ਹਾਂ ਨੇ ਚੱਕਵਾਲ, ਲਾਹੌਰ ਤੇ ਅੰਮ੍ਰਿਤਸਰ ਤੋਂ ਵਿਦਿਆ ਪ੍ਰਾਪਤ ਕੀਤੀ। ਪੰਜਾਬੀ ਤੇ ਅੰਗਰੇਜ਼ੀ ਵਿਚ ਐਮ. ਏ. ਕਰਨ ਉਪਰੰਤ ਇਸ ਨੇ ‘Guru Nanak As a Poet’ ਦੇ ਵਿਸ਼ੇ ਉੱਤੇ ਥੀਸਿਸ ਲਿਖ ਕੇ ਪੀ.ਐਚ.ਡੀ. ਦੀ ਡਿਗਰੀ ਪ੍ਰਾਪਤ ਕੀਤੀ। ਕੁਝ ਦੇਰ ਪੰਜਾਬ ਸਿਵਲ ਸਕੱਤਰੇਤ, ਸ਼ਿਮਲੇ ਵਿਚ ਰਹਿਣ ਪਿਛੋਂ ਇਹ ਰਾਮਗੜ੍ਹੀਆ ਕਾਲਜ ਫਗਵਾੜਾ ਵਿਚ ਅਧਿਆਪਕ ਲੱਗ ਗਏ। ਫਿਰ ਕਈ ਹੋਰ ਕਾਲਜਾਂ ਵਿਚ ਪੜ੍ਹਾਉਣ ਉਪਰੰਤ ਇਸ ਨੇ ਸ੍ਰੀ ਗੁਰੂ ਗ੍ਰੰਥ ਸਾਹਿਬ ਅਧਿਐਨ ਵਿਭਾਗ, ਪੰਜਾਬੀ ਯੂਨੀਵਰਸਿਟੀ ਪਟਿਆਲਾ ਦੇ ਮੁਖੀ ਦੇ ਰੂਪ ਵਿਚ ਮਹੱਤਵਪੂਰਨ ਖੋਜ ਕਾਰਜ ਕੀਤਾ। ਡਾ. ਤਾਰਨ ਸਿੰਘ ਜੀ ਨੇ ਧਰਮ, ਸਿੱਖ ਧਰਮ, ਤੁਲਨਾਤਮਕ ਧਰਮ ਅਧਿਐਨ, ਧਾਰਮਕ ਸਾਹਿਤ, ਪੰਜਾਬੀ ਪੁਰਾਤਨ ਮੱਧ ਕਾਲੀਨ ਤੇ ਆਧੁਨਿਕ ਸਾਹਿਤ ਆਦਿ ਵਿਸ਼ਿਆਂ ਤੇ ਖੋਜ ਨਾਲ ਸਬੰਧਤ ਲੇਖਾਂ ਦੇ ਨਾਲ ਨਾਲ ਮੌਲਿਕ ਅਤੇ ਅਧਿਆਤਮਕ ਲੇਖ ਵੀ ਲਿਖੇ ਹਨ। ਇਨ੍ਹਾਂ ਦੀ ਪਹਿਲੀ ਪੁਸਤਕ ‘ਭਗਤੀ ਤੇ ਸ਼ਕਤੀ’ ਸੀ। ਇਨ੍ਹਾਂ ਦੀਆਂ ਪ੍ਰਮੁੱਖ ਮੌਲਿਕ ਰਚਨਾਵਾਂ ਵਿਚ ਸਹਜ ਤੇ ਆਨੰਦ, ਨੇਮ ਤੇ ਪ੍ਰੇਮ, ਰਹੱਸ ਤੇ ਰਮਜ਼, ਨਾਮ ਨਿਧਾਨ, ਦਸ਼ਮੇਸ਼ ਦਰਪਨ (ਜੀਵਨੀ), ਗੁਰੂ ਗ੍ਰੰਥ ਸਾਹਿਬ ਦਾ ਸਾਹਿਤਕ ਇਤਿਹਾਸ, ਦਸਮ ਗ੍ਰੰਥ ਰੂਪ ਤੇ ਰਸ, ਪੰਜਾਬੀ ਸਾਹਿਤ ਤੇ ਸਾਹਿਤਕਾਰ, ਜਪੁ ਦਰਸ਼ਨ ਦੀਦਾਰ, ਨਾਨਕ ਦਰ ਘਰ (ਜੀਵਨੀ) ਆਦਿ ਸ਼ਾਮਲ ਹਨ। ਇਸ ਤੋਂ ਇਲਾਵਾ ਇਨ੍ਹਾਂ ਨੇ ਸੰਪਾਦਨ ਅਤੇ ਟੀਕਾ ਸਾਹਿਤ ਵਿਚ ਪੰਜਾਬੀ ਮੁਹਾਵਰਾ ਕੋਸ਼, ਗੁਰੂ ਨਾਨਕ ਬਾਣੀ ਪ੍ਰਕਾਸ਼, ਬਾਰਾਮਾਹ, ਦਰਪਣ ਆਦਿ ਰਚਨਾਵਾਂ ਪੰਜਾਬੀ ਸਾਹਿਤ ਨੂੰ ਦਿੱਤੀਆਂ। 30 ਜਨਵਰੀ, 1981 ਈ. ਨੂੰ ਤਾਰਨ ਸਿੰਘ ਜੀ ਦੀ ਮੌਤ ਹੋ ਗਈ।